ឯកអគ្គរដ្ឋទូត Williamson ធ្វើសេចក្តីថ្លែងចុងក្រោយ ក្នុងដំណើរទស្សនកិច្ចនៅកម្ពុជា

ភ្នំពេញ
ថ្ងៃទី ២២ ខែឧសភា ឆ្នាំ ២០០៩

ឯកអគ្គរដ្ឋទូតគោចរ​សហរដ្ឋអាមេរិក Clint Williamson

នៅ​ថ្ងៃ​​ទី​២២ ខែ​ឧសភា ឆ្នាំ​២០០៩ លោក Clint Williamson ឯកអគ្គ​រដ្ឋទូត​គោចរ​​សហរដ្ឋ​​អាមេរិក​​ទទួល​បន្ទុក​​កិច្ចការ​​ឧកិ្រដ្ឋកម្ម​​សង្រ្គាម បាន​​ធ្វើ​សេច​ក្តី​ថ្លែងចុងក្រោយ​របស់លោក បន្ទាប់​ពីបំពេញ​ទស្សន​កិច្ច​លើក​​ទី ២ របស់​​លោក នៅ​ប្រទេស​កម្ពុជា។ ថ្លែងនៅ​ក្នុងសន្និសីទ​កាសែត​មួយ នៅ​ស្ថាន​ទូត​សហ​រដ្ឋ​អាមេ​រិក ក្នុង​ទី​ក្រុង​​ភ្នំពេញ លោក​ឯកអគ្គ​រដ្ឋទូតបាន​សរសើរ​ដំណើរ​ជឿន​លឿនដែល​កម្ពុជា​ទទួល​បាន ចាប់​តាំង​ពី​ទស្សន​កិច្ច​លើក​មុនរបស់​លោក កាល​ពីខែ​ធ្នូ ឆ្នាំ ២០០៧ ។

នៅក្នុងសុន្ទរកថារបស់លោក លោក​ឯកអគ្គ​រដ្ឋទូត​បានថ្លែង​ពីភាព​ជឿន​លឿន​ទៅមុខ និង​ការផ្លាស់​ប្តូរនៅ​ក្នុង​ស្រុក​និងផ្នែក​ច្បាប់ នៅ​កម្ពុជា។ បន្ទាប់​ពីរំលឹក​ពីទស្សន​កិច្ចលើក​ដំបូង​របស់លោក​នៅប្រទេស​កម្ពុជា លោក​ឯក​អគ្គរដ្ឋទូត Williamson បាន​មាន​ប្រសាសន៍​ថា “ទិដ្ឋ​ភាពនៃ​ទីក្រុង​ភ្នំពេញ​មានការ​ប្រែប្រួ​លតាំង​ពីពេល​នោះ​​ ហើយ​​តុលាការ​ក៏មាន​ការវិវត្ត​ដូចគ្នា​នេះ​ដែរ។ តុលា​ការដែល​ត្រូវបាន​បង្កើត​ឡើង​ដើម្បី​ស្វែង​រក​យុត្តិធម៌​ចំពោះ​អំពើ​យង់ឃ្នង​របស់ពួក​ខ្មែរ​ក្រហម ក៏​កំពុងតែ​បញ្ចប់​ដំណាក់​កាលធ្វើ​ផែនការ​របស់​ខ្លួនផងដែរ នៅ​ចុង​ឆ្នាំ ២០០៧ (ដោយ​នៅពេល​នោះ ខ្ញុំនៅទីនេះ) ហើយ​វិធានផ្ទៃ​ក្នុងរបស់​តុលា​ការទើប​តែមាន​អាយុ​ប៉ុន្មាន​ខែ​តែ​ប៉ុណ្ណោះ។”

សព្វថ្ងៃនេះ អង្គជំនុំជំរះវិសាមញ្ញក្នុង​តុលា​ការ​កម្ពុជា (ECCC) កំពុង​មាន​ដំណើរ​ការពេញ​លេញ ក្នុង​ការ​កាត់​ទោស​ពួក​ខ្មែរ​ក្រហម។ ក្នុង​ដំណើរ​ទស្សន​កិច្ចរ​យៈពេល ៥ ថ្ងៃ​នៅកម្ពុជា​របស់​លោក ឯក​អគ្គរដ្ឋ​ទូត Williamson បាន​ជួបជា​មួយ​ឯក​ឧត្តម ឧប​នាយក​រដ្ឋ​មន្រ្តី សុខ អាន  តំណាង​ម្ចាស់​ជំនួយ​ដល់ ECCC និង​អង្គការ​មិនមែន​​រដ្ឋាភិ​បាលដែល​មាន​ការពាក់​ព័ន្ធ។ លោក​ឯកអគ្គ​រដ្ឋទូត​ក៏បាន​ទស្សនា ECCC ផង​ដែរ ហើយ​បានមើល​សវនា​ការ​ករណីទី ១ ទៅ​លើ ឌុច​ អតីត​ប្រធាន​មជ្ឈ​មណ្ឌល​ទារុណកម្ម​ដ៏មានឈ្មោះ​អាសោច ដែល​ត្រូវ​បានគេ​ស្គាល់​ថាជា​គុកទួល​ស្លែង ឬ ស ២១ ។ លោក​បានជួប​ជាមួយ​មន្រ្តី​ក្រសួង​មួយ​ចំនួន។

លោកឯក​អគ្គរដ្ឋ Williamson បាន​មាន​ប្រសាសន៍​ថា “ក្នុង​ពេល ៤ ថ្ងៃ​កន្លង​ទៅនេះ ខ្ញុំបាន​ទៅ​មើល ECCC។ ខ្ញុំមាន​ការស្ញប់​ស្ញែងនឹង​បន្ទប់​កាត់ក្តី​ទំនើប ដែល​ចង់ធ្វើ​អោយ​ប្រជាជន​ខ្មែរជា​ច្រើនអាច​ចូលរួម​​ក្នុង​សវនា​ការ​ ជាមួយបន្ទប់​ធំទូ​លាយ​ និងចូល​រួមស្តាប់​តាម​រយៈ​ប្រព័ន្ធ​ឃោស​នា។ សំខាន់​ជាងនេះ​ទៅ​ទៀត ខ្ញុំ​ជឿថា ដំណើរ​ការ​សវនាការ​នៅ ECCC កំពុង​មានភាព​ជឿន​លឿន​ពិត​ប្រាកដ។”
លោកឯកអគ្គរដ្ឋទូតបាន​ធ្វើកា​រកត់​សំគាល់​ថាថ្វីត្បិត​តែដំណើរ​ការ​សាលា​ក្តីបន្ត​មាន​ភាព​ជឿន​លឿន​ទៅមុខ​ក្តី តែ​មិនមែន​មាន​ន័យថា​វាមិនមាន​បញ្ហា​នោះទេ។​ លោក​បាន​សង្កត់​ធ្ងន់ថា “បន្ថែម​ទៅលើ​ឧបសគ្គ​រាល់ថ្ងៃ​ផ្នែក​រដ្ឋបាល ECCC ត្រូវ​យកចិត្ត​ទុក​ដាក់​ច្រើន​ថែម​ទៀតទៅ​លើ​បញ្ហា​ទំនាក់​ទំនង​ជាមួយ​នឹងសា​ធារណ​ជន ការ​ចូលរួម​របស់​ជន​ស៊ីវិល​និងជន​រងគ្រោះ ហើយ​និងតួនា​ទីរបស់​មេធា​វីក្នុងតុលា​ការ។”

ក្នុងពេលថ្មីៗនេះ ECCC បាន​ប្រឈម​នឹងការ​ចោទ​ប្រកាន់​ថាមិនមាន​ការគ្រប់​គ្រងបាន​ត្រឹម​ត្រូវនិង​មាន​​ការ​ប្រព្រឹត្ត​មិន​សមរម្យ ក្នុង​ការិយាល័យ​រដ្ឋបាល​របស់​ខ្លួន។ រដ្ឋាភិ​បាលសហ​រដ្ឋអាមេ​រិកយក​ចិត្តទុក​ដាក់​លើ​ការ​ចោទ​ប្រកាន់​ទាំងនេះ​យ៉ាង​ខ្លាំង។ លោក​ឯកអគ្គរដ្ឋទូត​បាន​ធ្វើការ​កត់​សំគាល់​ថា ក្នុង​ឆ្នាំនេះ មាន​ការ​សិក្សា​វាយ​តំលៃយ៉ាង​ច្រើន​ទៅលើ​ការគ្រប់​គ្រង​រដ្ឋបាល​របស់ ECCC ។​ ការ​វាយតំលៃ​ទាំងនេះ​មាន​សារៈ​សំខាន់​ហើយ​អាចកែ​លំអ​ចំណុច​ខ្សោយ ក្នុង​ការ​ងារ​របស់ ECCC ។​ ពេល​ឆ្លើយ​សំណួរ​ទាក់ទង​នឹងរឿង​នេះ​របស់​អ្នក​សារ​ព័ត៌មាន ដែល​មានវត្ត​មាននៅ​ក្នុងសន្និ​សីទកាសែត​នោះ លោក​ឯកអគ្គ​រដ្ឋទូត Williamson បាន​និយាយ​សង្កត់​ធ្ងន់ថា រដ្ឋា​ភិបាល​សហ​រដ្ឋអាមេ​រិក​ “កំពុង​តែខិតខំ​ធ្វើការ​ដើម្បី​អោយ​តុលាការ​កែលំអ​ការ​​គ្រប់​គ្រង​របស់​ខ្លួន និង​ដោះ​ស្រាយ​បញ្ហាពុក​រលួយ។” លោក​ឯកអគ្គ​រដ្ឋទូត​បានមាន​ប្រសាសន៍​ថា លោក​មាន​សង្ឃឹម​ថា រចនា​សម្ព័ន្ធ​និតិរដ្ឋ​នៅ​ក្នុងប្រទេស​នឹងត្រូ​វបាន​ពង្រឹង។ “យើង​សង្ឃឹម​ថានឹង​បន្តការ​ខិតខំ​របស់​យើង​ជាមួយ​រាជរដ្ឋា​ភិបាល​កម្ពុជា​ ដើម្បី​បង្កើន​ថែមទៀត​នូវជោគ​ជ័យ​ដែលសំរេច​បាន​កន្លង​មក។”

ប្រវត្តិរបស់លោកឯកអគ្គរដ្ឋទូត Clint Williamson

លោកឯកអគ្គរដ្ឋទូត Williamson​ ដែលមាន​អាជីព​ជាព្រះ​រាជអាជ្ញា​សហ​ព័ន្ធ បាន​ទទួល​ការយល់​ព្រម​​អោយ​ចូលកាន់​តំណែង​បច្ចុប្បន្ន​នេះ ពីព្រឹទ្ធ​សភា​សហរដ្ឋ​អាមេរិក នៅ​ថ្ងៃទី ២៩ ខែ​មិថុនា ឆ្នាំ ២០០៦។ មុន​ចូល​បំរើ​ការ​ងារនេះ លោក​បានបំរើ​ការនៅ​ក្នុង​ក្រុម​ប្រឹក្សា​សន្តិសុខ​ជាតិ (ពីឆ្នាំ ២០០៣ ដល់​ឆ្នាំ ២០០៦) ដោយ​ក្នុង​នោះ លោក​បានធ្វើ​ជាអ្នក​ជំនួយ​ការពិសេស​ស្តីទី​របស់​ប្រធានា​ធិបតី និង​ជានាយក​ទទួល​បន្ទុក​ផ្នែក​សង្រ្គោះ​បន្ទាន់ ធ្វើ​អោយ​ស្ថាន​ភាពមាន​លំនឹង​​និងផ្នែក​អភិវឌ្ឍន៍។ ពីឆ្នាំ ២០០១ ដល់​ឆ្នាំ ២០០២ លោក​បានបំរើ​ការ​​ក្នុង​ផ្នែក​ប្រតិបត្តិការ​ថែ​រក្សា​សន្តិភាព​របស់​សហ​ប្រជា​ជាតិ ដោយ​ធ្វើជា​ប្រធាន​ផ្នែក​យុត្តិធម៌​ក្នុងបេសក​កម្ម​របស់​សហ​ប្រជា​ជាតិនៅ​កូសូវ៉ូ ដោយ​ត្រួត​មើល​ប្រព័​ន្ធយុត្តិធម៌​និងពន្ធនា​គារ សំរាប់​ខេត្តនេះ​គ្រប់​គ្រងដោយ​សហ​ប្រជា​ជាតិ។ អស់​រយៈ​ពេល ៧ ឆ្នាំ​មុននោះ​ទៀត គឺពី​ឆ្នាំ ១៩៩៤ ដល់​ឆ្នាំ ២០០១ លោក​បានធ្វើ​ជាមេធា​វីក្នុង​សវនា​ការ​ក្នុង​តុលា​ការឧក្រិដ្ឋ​កម្មសង្រ្គាម​អន្តរជាតិ​សំរាប់​ប្រទេស​យូហ្គោ​ស្លាវី នៅទី​ក្រុងឡា​អេ ប្រទេស​ហូឡង់។ មុន​ពេល​ចូល​ធ្វើការ​ក្នុង​តុលា​ការ​នេះ លោក​ឯក​អគ្គរដ្ឋ​ទូត Williamson​ បាន​ធ្វើជា​មេធាវី​ក្នុង​សវនា​ការ ក្នុង​ផ្នែក​ឧក្រិដ្ឋ​កម្មដែល​មាន​ការចា​ត់តាំង ក្នុង​ក្រសួង​យុត្តិធម៌​សហ​រដ្ឋអាមេ​រិក និងជា​ជំនួយ​ការមេ​ធាវី​ប្រចាំ​តំបន់ នៅ​ក្រុង New Orleans ។​