អត្ថបទនេះមានជាភាសា៖
ឯកអគ្គរដ្ឋទូត
ឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា៖ លោកស្រី Carol Rodley
លោកស្រី Carol A. Rodleyមានអាជីពជាមន្ត្រីជាន់ខ្ពស់ផ្នែកកិច្ចការបរទេស ហើយបានស្បថចូលកាន់តំណែងជាឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា នៅថ្ងៃទី ២៤ ខែតុលា ឆ្នាំ ២០០៨ ។ លោកស្រីឯកអគ្គរដ្ឋទូត Rodley ក្នុងពេលថ្មីៗនេះ បានធ្វើជាទីប្រឹក្សាអោយវិទ្យាស្ថានកិច្ចការបរទេស បន្ទាប់ពីបានត្រឡប់ពីបំពេញការងារជាទីប្រឹក្សាផ្នែកកិច្ចការនយោបាយ និងយោធា ក្នុងស្ថានទូតសហរដ្ឋអាមេរិក នៅក្រុងកាប៊ុល ប្រទេសអាហ្កានីស្ថាន។ មុននេះទៀត លោកស្រីបានធ្វើជាឧបការីរដ្ឋមន្រ្តីស្តីទី និងជាឧបការីរដ្ឋមន្ត្រីរង ក្នុងការិយាល័យស្រាវជ្រាវ និងព័ត៌មានសំងាត់ ពីឆ្នាំ ២០០៣ ដល់ឆ្នាំ ២០០៦។
លោកស្រីឯកអគ្គរដ្ឋទូត Rodley ធ្លាប់ធ្វើជាលេខាប្រតិបត្តិរងក្នុងលេខាធិការដ្ឋានប្រតិបត្តិ ពីឆ្នាំ ២០០១ ដល់ ខែកក្កដា ឆ្នាំ ២០០៣។ ពីឆ្នាំ ១៩៩៧ ដល់ឆ្នាំ ២០០០ លោកស្រីគឺជាអនុប្រធានបេសកកម្មទូតអាមេរិក នៅភ្នំពេញ ប្រទេសកម្ពុជា។ ការងារដទៃទៀត កន្លងមក ដែលលោកស្រីបានទទួលពីទីក្រុងវ៉ាស៊ីនតោនរួមមានជាជំនួយការប្រតិបត្តិរបស់អ្នកសំរបសំរួលនៅប្រទេសបូស្នី ក្នុងអំឡុងពេលនៃការរៀបចំសំរាប់ការចចារនៅក្រុង Dayton ដំណាក់កាលដំបូងនៃការអនុវត្តកិច្ចព្រមព្រៀងក្រុង Dayton អនុប្រធានផ្នែកបុគ្គលិកនៃលេខាធិការដ្ឋាន មន្រ្តីជំនាញទទួលបន្ទុកប្រទេសស៊ីព នៅក្នុងការិយាល័យកិច្ចការអឺរ៉ុបខាងត្បូង មន្រ្តីជាន់ខ្ពស់ខាងការតាមឃ្លាំមើលនៅក្នុងមជ្ឈមណ្ឌលប្រតិបត្តិការ និងជាអ្នកវិភាគព័ត៌មានសំងាត់ក្នុងផ្នែកកិច្ចការប្រទេសរុស្ស៊ី ក្នុងការិយាល័យស្រាវជ្រាវ និងព័ត៌មានសំងាត់។ ការងារនៅក្រៅប្រទេសរួមមាននៅប្រទេសអាឡឺម៉ង់ អាហ្វ្រិកខាងត្បូង សាធារណរដ្ឋដូមីនីកែន និងប្រទេសប៉ាគីស្ថាន។ ពីឆ្នាំ ២០០០ ដល់ឆ្នាំ ២០០១ លោកស្រីឯកអគ្គរដ្ឋទូត Rodley បានចូលរួមក្នុងវគ្គបណ្តុះបណ្តាលស្តីពីភាពជាអ្នកដឹកនាំជាន់ខ្ពស់របស់ក្រសួងការបរទេសអាមេរិក ដែលជាសិក្ខាសាលាជាន់ខ្ពស់លើកទី ៤៣ នៅវិទ្យាស្ថានបំរើសេវាផ្នែកកិច្ចការបរទេស។
លោកស្រីឯកអគ្គរដ្ឋទូត Rodley បានទទួលរង្វាន់ស្នាដៃការងារជាន់ខ្ពស់ពីក្រសួងការបរទេស រង្វាន់ស្តីពីសិទ្ធិមនុស្ស និងលទ្ធិប្រជាធិបតេយ្យ រង្វាន់ Christian Herter របស់សមាគមកិច្ចការបរទេសអាមេរិក ចំពោះការប្រឆាំងតាមលក្ខណៈថ្មីនិងត្រឹមត្រូវ រង្វាន់ James Clement Dunn ចំពោះភាពជាអ្នកដឹកនាំ រង្វាន់ពិសេស Humint Collector ពីនាយកផ្នែកព័ត៌មានសំងាត់ និងរង្វាន់ Community Seal Medallion ។ លោកស្រីចេះនិយាយភាសាខ្មែរ អាឡឺម៉ង់ អេស្បាញ អ៊ូឌូ និងហ៊ីនឌី។
លោកស្រីឯកអគ្គរដ្ឋទូត Rodley បានកើតនៅរដ្ឋ Massachusetts ហើយបានទទួលសញ្ញាប័ត្រពីមហាវិទ្យាល័យ Smith College ។លោកស្រីបានរៀបការជាមួយលោក David Newhall ហើយមានកូន ៣ នាក់ ដែលមានឈ្មោះ Alice, Niles និង Steven ។
