មូលនិធិរបស់ឯកអគ្គរដ្ឋទូតសំរាប់ការអភិរក្សវប្បធម៌ (Ambassador’s Fund for Cultural Preservation)
តាមរយៈមូលនិធិឯកអគ្គរដ្ឋទូតសំរាប់ការអភិរក្សវប្បធម៌ ក្រសួងការបរទេសសហរដ្ឋអាមេរិក កំពុងតែជួយប្រទេសដែលត្រូវជួយនៅជុំវិញពិភពលោកក្នុងការអភិរក្សទីតាំងប្រវត្ដិសាស្ដ្រនិងសំណេរនិពន្ធ ស្នាដៃសិល្បៈនៅតាមសារៈមន្ទីរ ភ្លេង របាំប្រពៃណីនិងភាសា ។ ការិយាល័យផ្នែកកិច្ចការអប់រំនិងវប្បធម៌ គ្រប់គ្រងមូលនិធិនេះដែលត្រូវបានបង្កើតអោយមានឡើងដោយសភាសហរដ្ឋអាមេរិកនៅក្នុងឆ្នាំ២០០១ ដើម្បីជួយប្រទេសដែលមិនសូវមានការអភិវឌ្ឍន៍ដើម្បីជួយអភិរក្សបេតិកភណ្ឌវប្បធម៌របស់គេ ។ Patricia S. Harrison ឧបការីរដ្ឋមន្ដ្រីក្រសួងការបរទេសទទួលបន្ទុកផ្នែកកិច្ចការអប់រំនិងវប្បធម៌បាននិយាយថា “មូលនិធិឯកអគ្គរដ្ឋទូតបង្ហាញអោយឃើញច្បាស់ពីការតាំងចិត្ដរបស់សហរដ្ឋអាមេរិកក្នុងការស្វែងយល់ និង អភិរក្សបេតិកភ័ណ្ឌរបស់ប្រទេសដទៃ“ ។
អំណោយថវិកាសំរាប់ឆ្នាំ២០០៦ ត្រូវបានផ្ដល់ទៅអោយអង្គការដូចខាងក្រោមនេះ ៖
ការគ្រប់គ្រងបេតិកភណ្ឌនៅប្រាសាទហាន់ជ័យ: ក្រសួងវប្បធម៌និងវិចិត្រសិល្បៈ ដោយទទួលបានជំនួយពីមូលនិធិឯកអគ្គរដ្ឋទូតសំរាប់ការអភិរក្សវប្បធម៌ នឹងចាប់ដំណើរការគំរោងគ្រប់គ្រងបេតិកភណ្ឌវប្បធម៌ ដើម្បីសង្គ្រោះប្រាសាទហាន់ ជ័យ។ គំរោងនេះមានបីផ្នែក គឺការថែរក្សា ការជួសជុល និង ការលើកកំពស់ការយល់ដឹងរបស់សាធារណៈជន ។ គំរោងនេះគឺជាការសហការគ្នាលើកដំបូងរវាងក្រសួងវប្បធម៌និងវិចិត្រសិល្បៈនិងស្ថានទូតសហរដ្ឋអាមេរិកនៅទីក្រុងភ្នំពេញ ។
ការស្រាវជ្រាវការគ្រប់គ្រងធនធានវប្បធម៌និងដីលើករាងរង្វង់ពីសម័យបូរាណនៅជើងឯក: នេះគឺជាសំណើសុំជំនួយថវិកាសំរាប់ការស្រាវជ្រាវមួយទាក់ទងនឹងការបំផ្លិចបំផ្លាញដែលកើតមានទៅលើកន្លែងដីលើកជារាងរង្វង់មូលនិងទីតាំងបូរាណដទៃៗទៀតនៅតំបន់ជើងឯកនៅប្រទេសកម្ពុជា ។ សំណើសុំនេះរួមមានការស្រាវជ្រាវសំរាប់គោលបំណងរៀនសូត្រ ការបណ្ដុះបណ្ដាល ការអប់រំសាធារណៈ និង ការគ្រប់គ្រងធនធានវប្បធម៌ ។ នេះគឺជាទីតាំងដែលមានសារៈសំខាន់ផ្នែកវប្បធម៌ និងវិទ្យាសាស្ដ្រដែលមិនមានកន្លែងណាដូចទេនៅអាស៊ីអាគ្នេយ៍ ។ ទីតាំងនេះកំពុងតែប្រឈមមុខនឹងការបំផ្លិចបំផ្លាញហើយត្រូវការការគិតគូរជាបន្ទាន់ ។
