ពត៌មានមិនត្រឹមត្រូវ

ជំងឺ​អេដស៍​ជា​អាវុធ​ជីវសាស្ដ្រ (AIDS as a Biological Weapon)

មាន​ការចោទ​ប្រកាន់​ដោយ​គ្មាន​ភស្ដុតាង​ថា​មេរោគ​អេដស៍​ត្រូវ​បាន​បង្កើត​ឡើង​ដោយ​សហរដ្ឋ​អាមេរិក

នៅពេល​គេ​ដឹង​ថា​មាន​ជំងឺ​អេដស៍​ជា​លើក​ដំបូង​នៅ​ដើម​ទសវត្ស​ទី ៨០ គេ​មិន​ដឹង​ថា​ជំងឺ​នេះ​មាន​ប្រភព​ដើម​មក​ពី​ណា​ទេ ។ ជំងឺ​កាចសាហាវ​នេះ​ស្រាប់​តែ​លេច​ឡើង ដោយ​គេ​មិន​ដឹង​មូលហេតុ​ថា​តើ​វា​បណ្ដាល​មក​ពី​អ្វី​ទេ ។ នៅក្នុង​ស្ថានភាព​បែប​នេះ តែងតែ​មាន​លេចឡើង​នូវ​ពាក្យ​ចចាម​អារាម​និង​ពត៌មាន​មិន​ពិត​ហើយ​អ្នក​ឯកទេស​ខាង​ផ្សព្វផ្សាយ​ពត៌មាន​មិន​ពិត​របស់​សូវៀត​ឆ្លៀត​កេង​យក​ប្រយោជន៍​ពី​រឿង​នេះ និង​បាន​លើកឡើង​នូវ​សំដី​មិន​ពិត​ដែល​គេ​បាន​នាំគ្នា​ប្រឌិត​ឡើង ដើម្បី​ជំរុញ​ដល់​យុទ្ធនាការ​ខ្លី តែ​មាន​ប្រសិទ្ធិភាព​ខ្លាំង​ក្នុង​ការផ្សព្វផ្សាយ​ពត៌មាន​មិន​ពិត​ស្ដីពី​បញ្ហា​នេះ ។

ការចាប់ផ្ដើម​នៃ​ពត៌មាន​មិន​ពិត​ដែល​ត្រូវ​បាន​ផ្សព្វផ្សាយ​ដោយ​ចេតនា​និង​ដោយ​អចេតនា (The Beginning of Misinformation and Disinformation) 

នៅ​ខែ​មិនា ឆ្នាំ ១៩៩២ លោក Yevgeni Primakov ដែល​នៅពេល​នោះ​ជា​នាយក​ពត៌មាន​សំងាត់​របស់​រុស្ស៊ី និង​ក្រោយមក​បាន​ក្លាយ​ជា​នាយក​រដ្ឋមន្ដ្រី​រុស្ស៊ី បាន​សារភាព​ថា​ផ្នែក​ដែល​ទទួល​បន្ទុក​ផ្សព្វផ្សាយ​ពត៌មាន​មិន​ពិត​របស់​ទីភ្នាក់ងារ​ស៊ើបការ​សំងាត់ KGB របស់​សូវៀត​បាន​ប្រឌិត​រឿង​មិន​ពិត​ថា​មេរោគ​អេដស៍​ត្រូវ​បាន​បង្កើត​ឡើង​នៅក្នុង​បន្ទប់​ពិសោធន៍​ផ្នែក​យោធា​របស់​សហរដ្ឋ​អាមេរិក​ដើម្បី​ធ្វើ​អាវុធ​ជីវសាស្ដ្រ ។ កាសែត​របស់​រុស្ស៊ី​ឈ្មោះ Izvestiya បាន​ចេញ​ផ្សាយ​នៅ​ថ្ងៃទី ១៩ ខែ​មិនា ឆ្នាំ ១៩៩២ ថាៈ

“Primakov បាន​និយាយ​ពី​អត្ថបទ​ល្បី​មួយ​ដែល​ត្រូវ​បាន​បោះពុម្ព​កាលពី​ប៉ុន្មាន​ឆ្នាំ​មុន​នៅ​ក្នុង​កាសែត​ធំ​ៗ​របស់​យើង​ស្ដីពី​ជំងឺ​អេដស៍​ដែល​គេ​បាន​និយាយ​ថា​ចេញ​មកពី​បន្ទប់​ពិសោធន៍​របស់​មន្ទីរ​បញ្ចកោណ ។ បើ​យោល​ទៅ​តាម Primakov  អត្ថបទ​ដែល​បកអាក្រាត​ពី “កលល្បិច“​របស់​អ្នក​វិទ្យាសាស្ដ្រ​អាមេរិក​គឺ​ត្រូវ​បាន​ប្រឌិត​ឡើង​នៅ​ក្នុង​ការិយាល័យ​របស់​ទីភ្នាក់ងារ​សំងាត់ KGB សូវៀត ។

សូវៀត​នៅ​ទីបំផុត​បាន​បោះបង់​ចោល​យុទ្ធនាការ​ផ្សព្វផ្សាយ​ពត៌មាន​ប្រឌិត​នៅ​ខែ​សីហា ឆ្នាំ ១៩៨៩ ក្រោម​ការគាបសង្កត់​របស់​សហរដ្ឋ​អាមេរិក ។

ប្រភព​ដើម​ពិត​ប្រាកដ​នៃ​ជំងឺ​អេដស៍

នៅ​ពាក់​កណ្ដាល​ទសវត្ស​ទី ៨០ នៅ​មាន​ការយល់ច្រឡំ​ច្រើន​នៅ​ឡើយ​ស្ដីពី​រឿង​ថា​តើ​ជំងឺ​អេដស៍​កើត​ចេញ​ពី​អ្វី ទោះបីជា​អ្នក​វិទ្យាសាស្ដ្រ​យល់ស្រប​គ្នា​ជា​សាកល​ថា​វា​ជា​ជំងឺ​ដែល​កើតឡើង​ដោយ​ឯកឯង​ពី​ធម្មជាតិ​ក្ដី ។ នៅក្នុង​ឆ្នាំ​ក្រោយ​ៗ​មក វិទ្យាសាស្ដ្រ​បាន​ជួយ​ច្រើន​ក្នុង​ការទំលាយ​អាថ៌កំបាំង​នេះ ។ ឥឡូវ​នេះ​មាន​ភស្ដុតាង​ច្បាស់លាស់​ផ្នែក​វិទ្យាសាស្ដ្រ​ថា​មេរោគ​អេដស៍​កើត​ចេញ​ពី​វីរុស​ដែល​ច្រើន​មាន​នៅក្នុង​ខ្លួន​នៃ​សត្វ​ស្វា​ម្យ៉ាង​នៅ​ទ្វីប​អាហ្វ្រិក​ភាគ​និរតី នៅ​ជិត​តំបន់​អេក្វាទ័រ ។ ក្នុង​អត្ថបទ​មួយ​ចុះ​ថ្ងៃទី ៤ ខែ​កុម្ភៈ ឆ្នាំ ១៩៩៩​របស់​ទស្សនាវដ្ដី​ធម្មជាតិ (Nature Magazine)  បាន​ពន្យល់​ថា​មេរោគ​អេដស៍​ដែល​មាន​នៅក្នុង​ខ្លួន​មនុស្ស​ត្រូវ បាន​គេ​ឃើញ​ថា​ដូចគ្នា​នឹង​មេរោគ​ដែល​មាន​នៅក្នុង​ខ្លួន​ស្វា​នោះ បន្ទាប់ពី​មាន​ការវិភាគ​ឌីអិនអេ ។ ………​(មាន​អត្ថបទ​ភ្ជាប់​បន្ដ​ជា​ភាសា​អង់គ្លេស)។

គេ​អាច​មើល​ឃើញ​ច្បាស់​ថា:

• មេរោគ​អេដស៍ (HIV-1) ដែល​បណ្ដាល​អោយ​មាន​ជំងឺ​អេដស៍​រាតត្បាត​មិន​អាច​បង្កើត​ឡើង​ដោយ​មនុស្ស​បាន​ទេ ពីព្រោះ​ភស្ដុតាង​ដោយ​ផ្ទាល់​បង្ហាញ​ថា​មេរោគ​អេដស៍​មាន​នៅ​ក្នុង​ខ្លួន​មនុស្ស​តាំងពី​ឆ្នាំ​១៩៥៩ ហើយ​ការវិភាគ​ផ្នែក​វិទ្យាសាស្ដ្រ​បង្ហាញ​ថា​មេរោគ​នេះ​មាន​ប្រហែល​៧៥ ឆ្នាំ​មុន​នេះ ដែល​កាល​នោះ មនុស្ស​មិន​ទាន់​ចេះ​បង្កើត​មេរោគ​នៅ​ឡើយ​ទេ ។
• មេរោគ​អេដស៍ HIV-1 នេះ​ដូចគ្នា​នឹង​វីរុស​ដែល​គេ​បាន​ឃើញ​នៅក្នុង​ខ្លួន​សត្វ​ស្វា​នៅ​ទ្វីប​អាហ្វ្រិក ភាគ​ខាង​លិច ។
• ភស្ដុតាង​ផ្នែក​វិទ្យាសាស្ដ្រ​បាន​បង្ហាញ​ថា​វីរុស HIV-1 បណ្ដាល​មកពី​ការឆ្លង​ពី​អំបូរ​មួយ​ទៅ​អំបូរ​មួយ​ដែល​គេ​ដឹង​ថា​បាន​កើត​មាន​ក្នុង​ជំងឺ​ដទៃ​ទៀត​របស់​មនុស្ស ដូចជា​ផ្ដាសាយ របេង និង​ជំងឺ​ដទៃ​ទៀត​ជាច្រើន​ពិសេស​ដោយសារ​វីរុស​ប្រភេទ​នេះ​មាន​ទំនោរ​ខ្លាំង​ក្នុង​ការបំលែង​ខ្លួន​ជា​ញឹកញាប់​ដែល​ជា​ការធ្វើអោយ​ការនៅ​ជាប់លាប់​ក្នុង​ខ្លួន​មនុស្ស​មាន​ភាពងាយស្រួល​សំរាប់​វា ។
• ស្ថានភាព​ផ្នែក​សង្គម​និង​សេដ្ឋកិច្ច​នៅក្នុង​ទ្វីប​អាហ្វ្រិក​ភាគ​និរតី ជិត​ខ្សែ​អេក្វាទ័រ​មាន​ការប្រែប្រួល​យ៉ាង​ខ្លាំង​នៅក្នុង​សតវត្ស​ទី ២០​ដែល​អាច​ពន្យល់​បាន​ថា​ហេតុអ្វី​ក៏​ជំងឺ​អេដស៎៍​រាតត្បាត​នៅក្នុង​ពេលនេះ ហើយ​មិន​រាតត្បាត​នៅ​ពេល​មុន​ៗ ។