សនិ្នសីទស្តីពីបញ្ហាប្រឈមទាក់ទងនឹងភេរវកម្ម នៅអាស៊ីអាគ្នេយ៍
ភ្នំពេញ
ថ្ងៃទី ១៧ ខែសីហា ឆ្នាំ ២០០៩
 |
លោកស្រីឯកអគ្គរដ្ឋទូត Rodley ថ្លែង
សុន្ទរកថាក្នុងសន្និសីទ។ រូបពង្រីក |
នៅថ្ងៃទី ១៧ ខែសីហា លោកស្រីឯកអគ្គរដ្ឋទូតអាមេរិក Carol A. Rodley និងសម្តេច នាយករដ្ឋមន្រ្តី ហ៊ុន សែនបានថ្លែងសុន្ទរកថាបើក នៅពេលចាប់ផ្តើមវគ្គរៀនសូត្រពេញ រយៈពេល ៤ ថ្ងៃ ស្តីពីបញ្ហាប្រឈមទាក់ទងនឹងភេរវកម្មនៅអាស៊ីអាគ្នេយ៍។ វគ្គរៀនសូត្រនេះ ដែលត្រូវបានធ្វើឡើងនៅភ្នំពេញ ពីថ្ងៃទី ១៧ ដល់ថ្ងៃទី ២១ ខែសីហា ផ្តោតលើការដោះស្រាយបញ្ហាប្រឈមសំខាន់ ទាក់ទងនឹងកំលាំងវិវត្តនៃភេរវកម្ម នៅអាស៊ីអាគ្នេយ៍។ វគ្គរៀនសូត្រនេះ ដែលសហការរៀបចំដោយមជ្ឈមណ្ឌលអាស៊ីប៉ាស៊ីហ្វិកសំរាប់ការសិក្សាពីសន្តិសុខ (APCSS) និងគណកម្មាធិការជាតិកម្ពុជាប្រឆាំងភេរវកម្ម មានបំណងបំពេញបន្ថែមលើកម្មវិធីនៃវគ្គរៀនសូត្រ ដែលមានស្រាប់ស្តីពីការឆ្លើយតបពេញលេញផ្នែកសន្តិសុខចំពោះភេរវកម្ម (CSRT) របស់ APCSS តែត្រូវបានធ្វើឡើងនៅក្នុងតំបន់ ហើយមានបំណងផ្តល់ព័ត៌មានដល់អ្នកចូលរួមថ្នាក់ខ្ពស់ និងសមស្រប ដែលរួមមានអ្នកមានអាជីពថ្នាក់ខ្ពស់ ក្នុងការងារប្រឆាំងភេរវកម្ម។ សិក្ខាកាមក្នុងវគ្គរៀនសូត្រនេះរួមមានអ្នកឯកទេស និងតំណាងមកពីប្រទេសចំនួន ៩ នៅអាស៊ីអាគ្នេយ៍ គឺកម្ពុជា ថៃ ឥណ្តូនេស៊ី ម៉ាឡេស៊ី ហ្វីលីពីន វៀតណាម ឡាវ សឹង្ហបូរី និងប្រ៊ុយណេ។
នៅក្នុងសុន្ទរកថាបើករបស់លោកស្រី លោកស្រីឯកអគ្គរដ្ឋទូត Rodley បានថ្លែងថា “ភេរវកម្មនៅតែជាការគំរាមកំហែងមួយពិតប្រាកដ ចំពោះសុវត្ថិភាពនៃមនុស្សម្នាក់ៗ និងស្ថេរភាពនៃបណ្តារដ្ឋ នៅអាស៊ីអាគ្នេយ៍។” លោកស្រីបានថ្លែងបន្ថែមទៀតថា “ភេរវកម្មមិនមែនគ្រាន់តែជាបញ្ហាផ្នែកយោធាតែប៉ុណ្ណោះទេ។ វាជាការគំរាមកំហែងដែលមានលក្ខណៈច្រើនយ៉ាង ដោយមិនគិតពីភាពខុសគ្នាផ្នែកសាសនា សង្គម សេដ្ឋកិច្ច និងរដ្ឋាភិបាលឡើយ។”
សន្និសីទនេះ ដែលត្រូវបានបិទក្នុងពិធីមួយនៅថ្ងៃទី ២១ សីហា ដោយមានការចូលរួមជាអធិបតីដោយឯកឧត្តមឧបនាយរដ្ឋមន្រ្តី សុខ អាន ត្រូវបានរៀបចំឡើងដើម្បីជាជំនួយក្នុងការរកមើលមធ្យោបាយលើកកំពស់ការសហការខិតខំ ដែលកំពុងមាននៅក្នុងតំបន់អាស៊ីអាគ្នេយ៍ ដើម្បីតាមរក និងធ្វើអោយបរាជ័យដល់អំពើភេរវកម្ម ទាំងនៅថ្នាក់តំបន់ ទាំងនៅថ្នាក់អន្តរជាតិ ពិសេសក្នុងការបន្ទុចបង្អាក់ ទប់ស្កាត់ និងបំបាត់ហឹង្សានយោបាយរបស់ពួកជ្រុលនិយម ដែលចោទជាបញ្ហាប្រឈមដោយផ្ទាល់ចំពោះអភិបាលកិច្ចដ៏មានប្រសិទ្ធភាព នៅក្នុងតំបន់។
ក្នុងមតិចុងក្រោយមួយរបស់លោកស្រី លោកស្រីឯកអគ្គរដ្ឋទូតបានមានប្រសាសន៍ថា “សិក្ខាសាលានេះគឺជាឧទាហរណ៍មួយនៃការប្តេជ្ញាចិត្តរបស់សហរដ្ឋអាមេរិក ដើម្បីសន្តិភាព និងសន្តិសុខនៃប្រទេសកម្ពុជា រដ្ឋទាំងអស់នៅអាស៊ីអាគ្នេយ៍ និងតំបន់អាស៊ីប៉ាស៊ីហ្វិក។ ប្រជាជាតិល្អៗទាំងអស់ត្រូវតែរួបរួមគ្នាជាដៃគូ ដើម្បីប្រយុទ្ធប្រឆាំងនឹងការគំរាមកំហែងនៃភេរវកម្ម។”
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
