សេចក្តីប្រកាសជាសេវាសាធារណៈចំពោះបញ្ហាឱសថក្លែងក្លាយ
ភ្នំពេញ
ថ្ងៃទី ៨ តុលា ឆ្នាំ ២០០៩
 |
| លោក Flynn Fuller នាយកបេសកកម្មនៃទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិ បានធ្វើសេចក្តីថ្លែងនៅក្នុងពីធីចាប់ផ្តើមសេចក្តីប្រកាសជាសេវាសាធារណៈ។ រូបពង្រីក |
សហរដ្ឋអាមេរិកបានធ្វើសេចក្តីប្រកាសជាសេវាសាធារណៈមួយចំនួន នៅថ្ងៃទី ៨ ខែតុលា ឆ្នាំ ២០០៩ ដើម្បីលើកកំពស់ការយល់ដឹងស្តីពីគ្រោះថ្នាក់នៃឱសថក្លែងក្លាយ និងការស៊ាំទៅនឹងថ្នាំប្រឆាំងជំងឺគ្រុនចាញ់ នៅកម្ពុជា។ ដោយត្រូវបានរៀបចំឡើងដោយផ្នែកឯកសាររួមរបស់អាមេរិក ស្តីពីឱសថ ដែលជាដៃគូអនុវត្តមួយ សេចក្តីប្រកាសនេះនឹងត្រូវបានចាក់ផ្សាយតាមទូរទស្សន៍ជាតិ ប៉ុស្តលេខ ៣ ជាផ្នែកមួយនៃយុទ្ធនាការក្នុងតំបន់ ដើម្បីប្រយុទ្ធប្រឆាំងនឹងឱសថក្លែងក្លាយ នៅប្រទេសកម្ពុជា ឡាវ វៀតណាម និងប្រទេសថៃ។
លោក Flynn Fuller នាយកបេសកកម្មនៃទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិ បានធ្វើសេចក្តីថ្លែងនៅក្នុងពីធីចាប់ផ្តើមសេចក្តីប្រកាសជាសេវាសាធារណៈនេះ នៅសណ្ឋាគារ MetaHouse ក្នុងទីក្រុងភ្នំពេញ។ លោកបានមានប្រសាសន៍ក្នុងពិធីបើកថា “សហរដ្ឋអាមេរិកយកចិត្តទុកដាក់យ៉ាងខ្លាំងចំពោះបញ្ហានៃឱសថក្លែងក្លាយ ហើយយើងមានឆន្ទៈធ្វើការជាមួយក្រសួងសុខាភិបាល និងដៃគូសុខាភិបាលដទៃទៀតរបស់យើង ដើម្បីការពារប្រជាជនកម្ពុជាពីគ្រោះថ្នាក់នេះ។ តាមរយៈការនិទានរឿង ការសំដែងបានល្អ និងការចង្អុលបង្ហាញបានល្អ ខ្ញុំជឿថា សេចក្តីប្រកាសទាំងនេះនឹងលើកកំពស់ការយល់ដឹងស្តីពីគ្រោះថ្នាក់នៃឱសថក្លែងក្លាយ ក្នុងចំណោមជនងាយរងគ្រោះរាប់ពាន់នាក់។”
ឱសថក្លែងក្លាយ និងឱសថខូចគុណភាពមានច្រើននៅតាមកន្លែងលក់ឱសថ នៅទូទាំងប្រទេសកម្ពុជា និងមហាអនុតំបន់ទន្លេមេគង្គ ដែលជាការនាំអោយមានភាពស៊ាំទៅនឹងឱសថ និងប្រតិកម្មមិនល្អចំពោះអ្នកជំងឺ ដូចជាជំងឺរ៉ាំរ៉ៃ និងការស្លាប់។ បើយោងតាមទិន្នន័យរបស់ផ្នែកឯកសាររួមរបស់អាមេរិក ស្តីពីឱសថ ១៣% នៃឱសថដែលត្រូវបានយកមកធ្វើជាសំណាកតួយ៉ាង ពីឆ្នាំ ២០០៣ ដល់ ២០០៨ នៅប្រទេសកម្ពុជា ដែលភាគច្រើនជាថ្នាំជំងឺគ្រុនចាញ់ គឺជាឱសថខូចគុណភាព។ នៅតំបន់អាស៊ីអាគ្នេយ៍ ឱសថប្រមាណពី ១០% ទៅ ១៥% អាចជាឱសថក្លែងក្លាយ។
តំបន់ព្រំដែនកម្ពុជាថៃកន្លងមកគឺជាកន្លែងដើមនៃភាពស៊ាំថ្មីៗទៅនឹងថ្នាំព្យាបាលជំងឺគ្រុនចាញ់។ ប្រសិទ្ធិភាពកាន់តែថយចុះនៃថ្នាំព្យាបាលជំងឺគ្រុនចាញ់ខ្លះ ដែលត្រូវបានប្រើនៅក្នុងតំបន់នេះ គឺជាបញ្ហាចោទមួយយ៉ាងធ្ងន់សំរាប់សុខភាពសាធារណៈ ហើយទាមទារការឆ្លើយតបរួមគ្នាពីអ្នកពាក់ព័ន្ធ ក្នុងវិស័យនេះ។
សហរដ្ឋអាមេរិកគាំទ្របណ្តាញមួយនៃមន្ទីរពិសោធន៍ឱសថខ្នាតតូច និងមន្ទីរពិសោធន៍ថ្នាក់ជាតិ នៅភ្នំពេញ រួមជាមួយនឹងការយល់ដឹងរបស់សាធារណៈស្តីពីការថែរក្សាសុខភាព និងគុណភាពឱសថ ធ្វើជាផ្នែកមួយនៃការខិតខំរបស់ខ្លួន ដើម្បីការពារប្រជាជនកម្ពុជាពីគ្រោះថ្នាក់នៃឱសថក្លែងក្លាយ។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
