កម្មវិធីផ្សេងៗ ក្នុងឆ្នាំ២០១៣
- បកប្រែ:
- English
ដំណើរទៅរកសេរីភាព៖ ការពិភាក្សាពីទាសភាពសម័យទំនើប
ថ្ងៃទី២៥ ខែកុម្ភៈ ឆ្នាំ២០១៣
អ្នកចូលរួមពិភាក្សាពីទាសភាពសម័យទំនើប។
ស្ថានទូតសហរដ្ឋអាមេរិកបានរៀបចំការចាក់ផ្សាយតាមអ៊ិនធ័រណែតស្តីពីការប្រឆាំងការជួញដូរមនុស្ស ដែលមានចំណងជើងថា “ដំណើរទៅរកសេរីភាព ការបកស្រាយអក្សរសំងាត់សំរាប់បើកភួយពីរជាន់នាំដល់ការរំដោះមនុស្សអោយរួចជាអ្នកជាវិញ (Journey to Freedom – Decoding Quilts Lead to Emancipation) ដើម្បីអោយសិស្ស និងអង្គការមិនមែនរដ្ឋាភិបាលចូលរួមធ្វើការពិភាក្សាពីទាសភាពសម័យទំនើប។ ពិធីចាក់ផ្សាយនោះផ្តល់ដល់អ្នកចូលរួម នូវឱកាសបានធ្វើការពិភាក្សាជាមួយអ្នកចូលរួមមកពីប្រទេសឡាវ វៀតណាម រដ្ឋ Ohio និងទីក្រុង Washington, DC ។
លោកស្រី Karen Stewart ឯកអគ្គរដ្ឋទូតសហរដ្ឋអាមេរិកប្រចាំប្រទេសឡាវ ដែលបានបង្ហាញភួយចំនួន ១២ នៅផ្ទះរបស់លោកស្រី នៅទីក្រុងវៀងចន្ទ នៅក្នុងពិធីមួយ ដើម្បីកត់សំគាល់ខួបលើកទី ១៥០ ឆ្នាំនៃសេចក្តីប្រកាសអោយទាសករនៅសហរដ្ឋអាមេរិកបានរួចជាអ្នកជាវិញ បានផ្តល់មតិស្តីពីការជួញដូរមនុស្សនៅសម័យទំនើប ហើយនិងការទាក់ទងរបស់វាទៅនឹងទាសភាព ហើយនិងការរំដោះអោយរួចជាអ្នកជាវិញ។ បន្ទាប់ពីការថ្លែងរបស់លោកស្រីឯកអគ្គរដ្ឋទូត Karen Stewart លោកស្រី Nancy Walraven បានធ្វើបទបង្ហាញមួយស្តីពីភួយពីរជាន់ចំនួន ១២ របស់លោកស្រី ដែលជំរុញទឹកចិត្តដោយសៀវភៅមួយស្តីពីភួយពីរជាន់ពិសេសមួយ ដែលសមាជិកនៃក្រុមអ្នកធ្វើការតាមរថភ្លើងក្រោមដីបានប្រើដើម្បីជួយអោយមនុស្សគេចចេញពីទាសភាព នៅសហរដ្ឋអាមេរិក នៅដើមសតវត្សទី១៩។
ពិធីនោះក៏មានផងដែរនូវឈុតមួយ ក្នុងខ្សែភាពយន្តឯកសារ ដែលមានចំណងជើងថា “ដំណើរទៅកាន់សេរីភាព” ដែលរៀបរាប់ពីរឿងក្នុងសតវត្សទី ២១ របស់បុរសជនជាតិខ្មែរម្នាក់ ឈ្មោះ ព្រំ វណ្ណៈ និងរឿងក្នុងសតវត្សទី ១៩ របស់បុរសជនជាតិអាមេរិកម្នាក់ ឈ្មោះ Solomon Northup ។ អ្នកទាំងពីរគឺជាជនរងគ្រោះ ដោយការជួញដូរមនុស្ស ហើយរស់នៅក្នុងអំឡុងពេលឆ្ងាយពីគ្នាចំនួនជាង ១៥០ ឆ្នាំ។
រដ្ឋាភិបាលសហរដ្ឋអាមេរិកគាំទ្របេសកកម្មរបស់ប្រទេសកម្ពុជា ក្នុងការប្រយុទ្ធប្រឆាំងនឹងការជួញដូរមនុស្ស ដើម្បីការពារសិទ្ធិមនុស្សជាមូលដ្ឋានរបស់បុគ្គល ហើយនៅតែមានការប្តេជ្ញាចិត្តក្នុងការលុបបំបាត់បញ្ហាអាក្រក់នេះ ដែលមាននៅទូទាំងពិភពលោក។
