សហរដ្ឋអាមេរិកបើកសិក្ខាសាលាស្ដីពីការធ្វើកោសល្យវិច័យសំរាប់មន្ដ្រីអនុវត្ដច្បាប់កម្ពុជា
មជ្ឈមណ្ឌលជាតិប្រឆាំងចារកម្ម ភ្នំពេញ
ថ្ងៃទី ១៣ ខែមិថុនា ឆ្នាំ ២០០៨
 |
សិក្ខាកាមម្នាក់ក្នុងសិក្ខាសាលាប្រមូល
ភស្ដុតាង ក្នុងការសំដែងការស៊ើបអង្កេត
កន្លែងប្រព្រឹត្ដបទល្មើស ។ រូបពង្រីក |
ភ្នាក់ងារពិសេសមកពីមន្ទីរស៊ើបអង្កេតបទឧក្រិដ្ឋរបស់កងនាវាសហរដ្ឋអាមេរិក (US Naval Criminal Investigative Service ឬ NCIS) បានបើកវគ្គបណ្ដុះបណ្ដាលស្ដីពីវិទ្យាសាស្ដ្រកោសល្យវិច័យ និងត្រួតពិនិត្យ មើលទីកន្លែងប្រព្រឹត្ដបទឧក្រិដ្ឋ សំរាប់មន្ដ្រីអនុវត្ដច្បាប់កម្ពុជា ពីថ្ងៃទី ៩ ដល់ថ្ងៃទី ១៣ ខែមិថុ នា ឆ្នាំ ២០០៨ ។ វគ្គនេះមានបំណងបង្រៀនមន្ដ្រីអនុវត្ដន៍ច្បាប់នូវភស្ដុតាងផ្សេងៗ (ដាន រូបវ័ន្ដ ឌីអិនអេ ជីវសាស្ដ្រ ស្នាមដិត) និង វិធីរៀបចំពិនិត្យនិងរក្សាទុកភស្ដុតាងកោសល្យវិច័យនៅកន្លែងប្រព្រឹត្ដបទឧក្រិដ្ឋ ។ គ្រូបង្ហាត់នឹងធ្វើការបង្រៀននៅក្នុងថ្នាក់ ហើយបន្ទាប់មកបង្រៀនលើការអនុវត្ដន៍ជាក់ស្ដែងដើម្បីអោយអ្នករៀនយល់ពីខ្លឹមសារមេរៀន ហើយអាចធ្វើបង្ហាញនូវបច្ចេកទេសក្នុងការពិនិត្យ និងរៀបចំភស្ដុតាងកោសល្យវិច័យ ។
ភ្នាក់ងារពិសេសជាអ្នកប្រឹក្សាយោបល់ផ្នែកកោសល្យវិច័យរបស់ NCIS និងលោកស្រី Kiyomi Griffey គ្រូបង្ហាញក្នុងសិក្ខាសាលា បានមានប្រសាសន៍ថា "សិក្ខាសាលានេះគឺជាបទពិសោធន៍មួយយ៉ាងល្អ ដោយមន្ដ្រីកម្ពុជានិងមន្ដ្រីអាមេរិកបានរៀនសូត្រពីគ្នាទៅវិញទៅមក ។"
សិក្ខាកាមចំនួន ២៤ នាក់នឹងចូលរួមក្នុងវគ្គរៀនសូត្ររយៈពេលមួយសប្ដាហ៍នេះ ។ សិក្ខាកាមត្រូវបានជ្រើសរើសចេញពីមជ្ឈមណ្ឌលជាតិប្រឆាំងភេរវកម្ម នគរបាលជាតិកម្ពុជានិងកងរាជអាវុធហាត់នៃកងយោធពលខេមរភូមិន្ទកម្ពុជា ។
NCIS ធ្លាប់បានបើកវគ្គបណ្ដុះបណ្ដាលដូចគ្នានេះដល់មន្ដ្រីអនុវត្ដន៍ច្បាប់នៅក្នុងប្រទេសកូរ៉េខាងត្បូងប្រទេសម៉ាល់ឌីវ និងប្រទេសឥណ្ឌូនេស៊ី ផងដែរ។
NCIS គឺជាសាខាផ្នែកពង្រឹងច្បាប់ និងប្រឆាំងភេរវកម្មរបស់មន្ទីរកងនាវាសហរដ្ឋអាមេរិក។ NCIS គឺជាក្រុមភ្នាក់ងារអ្នកស៊ើបអង្កេត អ្នកឯកទេសខាងកោសល្យវិច័យ អ្នកឯកទេសខាងកិច្ចការសន្ដិសុខ អ្នកវិភាគ និងបុគ្គលិកជំនួយ ដែលមានលក្ខណៈពិសេស មានជំនាញ និងសមត្ថភាពច្បាស់លាស់ ។ ក្រុមនេះធ្វើការជិតស្និទ្ធជាមួយទីភ្នាក់ងារក្នុងស្រុកនិងបរទេស សហព័ន្ធរដ្ឋ ដើម្បីប្រឆាំង និង ស៊ើបអង្កេតបទឧក្រិដ្ឋធ្ងន់ធ្ងរ ដូចជាភេរវកម្ម ចារកម្ម ការជ្រៀតចូលក្នុងប្រព័ន្ធកុំព្យូទ័រ មនុស្សឃាត ការរំលោភផ្លូវភេទ ការរំលោភធ្វើបាបកុមារ ការបង្ករអគ្គីភ័យ ការបន្លំបោកប្រាស់ និងរឿងជាច្រើនទៀត ។ ការងាររបស់ NCIS ត្រូវបានផលិតផ្សាយជារឿងភាគតាមទូរទស្សន៍ ដោយដាក់ចំណងជើងតាមឈ្មោះរបស់ក្រុមនេះ។
ឯកអគ្គរដ្ឋទូត
ដំណឹងថ្មី
សុន្ទរកថា
សេចក្តីប្រកាសពត៌មាន
