ការធានាលទ្ធភាពក្នុងការទទួលបានសេវាសុខភាពសំរាប់អ្នកក្រនៅប្រទេសកម្ពុជា
ខេត្ដក្រចេះ
ថ្ងៃទី ២២ ខែមករា ឆ្នាំ ២០០៨
 |
ឯកអគ្គរដ្ឋទូត Mussomeli ចុះមើលស្ដ្រី
ក្មេងម្នាក់ ដែលកើតកូនភ្លោះ ក្រោមកម្មវិធី
សមធម៌ទ្រទ្រង់វិស័យ សុខាភិបាល ។ រូបពង្រីក |
ទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្ដរជាតិ (USAID) ដោយសហការជាមួយរដ្ឋាភិបាលកម្ពុជា និងប្រទេសជំនួយសំខាន់ៗជាច្រើនទៀត បានអនុវត្ដកម្មវិធីពិសេសនេះសំរាប់ប្រជាពលរដ្ឋក្រីក្រជាច្រើននៅកម្ពុជា ។ កម្មវិធីនេះមានឈ្មោះថាថវិកាសមធម៌សំរាប់ទ្រទ្រងវិស័យសុខាភិបាល ហើយដំណើរការដោយសាកលវិទ្យាល័យស្រាវជ្រាវ (University Research Co. ឬ URC) ។ គ្រួសារក្រីក្រដែលមានលក្ខណៈសម្បត្ដិគ្រប់គ្រាន់អាចទទួលបាននូវសេវាសុខភាព ដោយមិនបាច់បង់ប្រាក់នៅតាមមន្ទីរពេទ្យ និង មណ្ឌលសុខភាពដែលចូលរួមក្នុងកម្មវិធីថវិកាសមធម៌នេះ តាមរយៈការធ្វើសំភាសន៍នៅថ្នាក់សហគមន៍ ។ គ្រួសារទាំងឡាយដែលមានប្រាក់ចំណូលទាប បានទទួលប័ណ្ណពិនិត្យសុខភាពដែលចេញថវិកាអោយទាំងស្រុង ដោយពួកគាត់អាចយកវាទៅប្រើនៅតាមមណ្ឌលសុខភាព និង មន្ទីរពេទ្យរដ្ឋដែលចូលរួមជាមួយកម្មវិធីសមធម៌នេះ ។ គ្រួសារក្រីក្រដែលគ្មានលក្ខណៈសម្បត្ដិគ្រប់គ្រាន់ជាមុននោះ ក៏នៅតែអាចមានលទ្ធភាពទទួលការព្យាបាលដោយអត់គិតថ្លៃផងដែរ នៅពេលដែលមានបញ្ហាសុខភាពហើយត្រូវការការព្យាបាល ដោយធ្វើការសំភាសន៍ជាបន្ទាន់មួយ។ នៅពេលបច្ចុប្បន្ននេះ កម្មវិធីជួយដល់ប្រជាពលរដ្ឋក្រីក្រចំនួនជាង៧០០.០០០ នាក់នៅក្នុងខេត្ដ ចំនួន៥ - ចំនួននេះត្រូវជា ១៥% នៃប្រជាជនក្រីក្រកម្ពុជាដែលស្ថិតក្នុងស្ថានភាពមានលក្ខណៈសម្បត្ដិអាចទទួលបានជំនួយបែបនេះបាន ។
មន្ទីរពេទ្យនិងមណ្ឌលសុខភាព ហើយនិងអ្នកផ្ដល់សេវាសុខភាពទទួលបានប្រាក់តាមចំនួនកំណត់ចំពោះសេវាដែលគេបានផ្ដល់ដល់អ្នកជំងឺម្នាក់ៗ ក្នុងកម្មវិធី ។ ពិតមែនតែប្រាក់នេះមិនច្រើនក្ដី តែ៦០% សំរាប់មន្ទីរពេទ្យនិងមណ្ឌលសុខភាពហើយត្រូវបានចែកចាយអោយដូចប្រាក់ខែ ។ ការធ្វើដូច្នេះជួយដោះស្រាយដោយផ្ទាល់នូវបញ្ហាប្រាក់ខែទាបដែលជាហេតុផលចំបងធ្វើអោយគេមិនសូវមានទឹកចិត្ដព្យាបាលអ្នកជំងឺក្រីក្រ ធ្វើការអោយបានពេញម៉ោងនិងមិនរត់ចោលការងារ ។ ប្រាក់ឈ្នួលដែលបង់អោយជួសមុខអោយអ្នកក្រត្រូវបានបង់ដោយផ្ទាល់ទៅមន្ទីរពេទ្យឬមណ្ឌលសុខភាពដោយ URC ។ ប្រាក់នេះគឺជាប្រភពជំនួយថវិកាបន្ថែមដល់មណ្ឌលសុខភាព និងមន្ទីរពេទ្យ ហើយលើកទឹកចិត្ដអោយគេចូលរួម ហើយទទួលអ្នកជំងឺក្រីក្រ ។
USAID និងក្រសួងសុខាភិបាលកម្ពុជាបានប្រើប្រាស់នូវយន្ដការផ្ដល់ថវិកាសំរាប់វិស័យសុខភាពនេះដើម្បីបង្កើនគុណភាពសេវាកម្មសុខភាពអោយមានលក្ខណៈល្អប្រសើរតាមរយៈការប្រើមធ្យោបាយ (Tools) ដើម្បីវាស់ស្ទង់និងកត់ត្រានូវធនធានដែលមានតាមទីតាំងផ្ដល់សេវាសុខភាព និងដោយតំរូវអោយមានពិន្ទុ ត្រឹមកំរិតអប្បរិមាណាមួយ ទើបអាចអោយមូលនិធិសមធម៌ទ្រទ្រង់វិស័យសុខាភិបាលជួយបាន ។ ដើម្បីអាចពិនិត្យសុខភាពដល់ប្រជាជនក្រីក្រតាមរយៈកម្មវិធីថវិកាសមធម៌នេះបានមណ្ឌលសុខភាពនានាត្រូវតែមានស្ដង់ដាគុណភាពដែលកំណត់ដោយក្រសួងសុខាភិបាលកម្ពុជា និងត្រូវបានវាយតំលៃរួមគ្នាដោយក្រសួង និង URC។ ពិន្ទុវាយតំលៃក្រោម ៦៥% ដែលទទួលបានមិនអាចធ្វើអោយមណ្ឌលសុខភាព/មន្ទីរពេទ្យចូលរួមក្នុងកម្មវិធីនេះបានទេ ។ ពិន្ទុអប្បរិមាកំណត់នេះកើនឡើងពីមួយឆ្នាំទៅមួយឆ្នាំ ។ នាពេលបច្ចុប្បន្ននេះ មន្ទីរពេទ្យបង្អែកចំនួន ៧ និងមណ្ឌលសុខភាពចំនួន ១៩ ត្រូវបានទទួលស្គាល់និងទទួលថវិកាពីសេវាកម្មព្យាបាលអ្នកជំងឺក្រោមកម្មវិធីសមធម៌នេះ ។ ចំនួនមណ្ឌលសុខភាព និង មន្ទីរពេទ្យមានកំណើនរាល់ខែ ដោយសារតែកម្មវិធីនេះចេះតែរីកធំឡើងៗ ។ កំរិតគុណភាពនៃមន្ទីរពេទ្យដែលចូលរួមក្នុងកម្មវិធីនេះ ដែលត្រូវបានវាយតំលៃដោយក្រសួងសុខាភិបាល និង URC កំពុងតែមានការកើនឡើងជាលំដាប់ដែលក្នុងនោះមានកំនើនជាមធ្យម៦២ ភាគរយ ហើយនៅតាមខេត្ដដែលកម្មវិធីនេះកំពុងអនុវត្ដ ប្រជាជនក្រីក្រនៅពេលនេះបានប្រើប្រាស់សេវាកម្មផ្ដល់សុខភាពនេះច្រើនជាង ពេលមុនពេលកម្មវិធីនេះចាប់ផ្ដើមដំណើរការសកម្មភាពគំរោងរបស់ខ្លួន។
តំលៃនៃឯកសារមធ្យោបាយវាយតំលៃមន្ទីរពេទ្យក្នុងការកំណត់បរិមាណតំរូវការមន្ទីរពេទ្យ និង មជ្ឈមណ្ឌលសុខភាពបានធ្វើអោយរដ្ឋាភិបាលចេញក្រិត្យមួយអោយធ្វើការសិក្សាវាយតំលៃតាមគ្រប់មន្ទីរពេទ្យទាំងអស់ ។ គំរោងរបស់ USAID-URC បានក្លាយជាស្ដង់ដាមួយសំរាប់កម្ពុជា ហើយក្នុងឯកសាររបស់ធនាគារពិភពលោក និងក្រសួងសុខាភិបាលក៏មានលើកឡើងយ៉ាងដូច្នេះដែរ ។ កម្មវិធីបែបនេះរបស់បារាំងនិងបែលហ្សិចបានធ្វើតាមផ្នែកធំៗនៃគំរូរបស់ USAID - URC ផងដែរ ។ ការចាប់អនុវត្ដកម្មវិធីសមធម៌ដើម្បីទ្រទ្រង់វិស័យសុខាភិបាលឃើញថាទទួលបានជោគជ័យ ហើយគេមានគំរោងពង្រីកកម្មវិធីនេះថែមទៀតអោយបានទូទាំងប្រទេសក្រោមផែនការថ្មីជាយុទ្ធសាស្ដ្ររបស់ក្រសួងសុខាភិបាល ។ ឆន្ទៈនយោបាយ និង ការប្ដេជ្ញាចិត្ដគ្រប់គ្រាន់របស់រដ្ឋាភិបាលកម្ពុជា និងម្ចាស់ជំនួយសំខាន់ៗមានសារៈសំខាន់ចាំបាច់ក្នុងការជំរុញការប្រឹងប្រែងទាំងនេះ ។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
