ស្ថានទូតអាមេរិកអបអរបុណ្យរ៉ាម៉ាដានជាមួយសហគមន៍ខ្មែរឥស្លាម
ខេត្តកំពង់ចាម ថ្ងៃទី ១០ កញ្ញា/ក្រុងភ្នំពេញ ថ្ងៃទី ១៤ កញ្ញា
 |
ពិធីអាហារស្រាយបួសរៀបចំដោយឯកអគ្គ
រដ្ឋទូតអាមេរិក Carol A. Rodley ។ រូបពង្រីក |
ស្ថានទូតអាមេរិក នៅទីក្រុងភ្នំពេញបានអបអរបុណ្យរ៉ាម៉ាដានជាមួយខ្មែរឥស្លាមចំនួនជាង ១៦០ នាក់ ជាមួយនិងពីធីហូបអាហារស្រាយបួស Iftar ចំនួន ២ ដង។ ម្តង នៅខេត្តកំពង់ចាម នៅថ្ងៃទី ១០ ខែកញ្ញា និងម្តងទៀត នៅនិវេសដ្ឋានឯកអគ្គរដ្ឋទូត នៅថ្ងៃទី ១៤ ខែកញ្ញា។ អាហារស្រាយបួស Iftar គឺជាពាក្យដែលមានន័យថាអាហារពេលល្ងាច ដែលឥស្លាមសាសនិកបរិភោគពេលដាច់ខែតមអាហាររ៉ាម៉ាដាន តាមសាសនា។ ស្ថានទូតអាមេរិកបានរៀបចំអាហារស្រាយបួសនេះ ក្នុងស្មារតីនៃការយោគយល់ សហប្រតិបត្តិការ និងមិត្តភាព។ អាហារពេលល្ងាចទាំងពីរនេះមានការចូលរួមពីមេដឹកនាំសហគមន៍ឥស្លាមចំនួនជាង ១៥០ នាក់ ដូចជាអ៊ីម៉ាម នាយកសាលាឥស្លាម និងគ្រូផ្នែកសាសនា ដែលគេហៅថាតួន ជាភាសាខ្មែរ។
នៅពិធីអាហារស្រាយបួសទាំងពីរនេះ បន្ទាប់ពីភ្ញៀវបានមកជួបជុំ គេបានធ្វើការសូត្រធម៌ថ្វាយបង្គុំ (Maghreb prayer) សូត្រដោយអ៊ីម៉ាមម្នាក់ នៅពេលថ្ងៃលិច ហើយឯកអគ្គរដ្ឋទូតអាមេរិកបានថ្លែងសុន្ទរកថាស្វាគមន៍។ លើសពីនេះទៀត សុន្ទរកថារបស់លោកប្រធានាធិបតី អូបាម៉ាសំរាប់បុណ្យរ៉ាម៉ាដាន (ដែលត្រូវបានបញ្ចូលសំលេងជាភាសាខ្មែរ) ត្រូវបានចាក់បង្ហាញក្នុងពិធីទាំងពីរ មុនពេលនៃការចាប់ផ្តើមបរិភោគអាហារហាឡោះ (halal) ។ ក្នុងសាររបស់លោក លោកប្រធានាធិបតីបានមានប្រសាសន៍ថា “ការខិតខំទាំងនេះទាំងអស់គឺជាផ្នែកមួយនៃការប្តេជ្ញាចិត្តរបស់ប្រទេសអាមេរិកក្នុងការទាក់ទងជាមួយប្រទេសកាន់សាសនាឥស្លាម និងប្រទេសដែលប្រជាជនភាគច្រើនជាអ្នកកាន់សាសនាឥស្លាម ដោយឈរលើមូលដ្ឋាននៃផលប្រយោជន៍ទៅវិញទៅមក និងការគោរពគ្នាទៅវិញទៅមក។ ពេលនេះ ជាថ្មីម្តងទៀត ខ្ញុំសូមសំដែងម្តងទៀតនូវការប្តេជ្ញាចិត្តរបស់ខ្ញុំចំពោះការចាប់ផ្តើមថ្មីមួយ រវាងប្រទសអាមេរិក និងសាសនិកឥស្លាម នៅទូទាំងពិភពលោក។
នៅក្នុងពិធីអាហារស្រាយបួសទាំងពីរ នៅខេត្តកំពង់ចាម និងនៅភ្នំពេញ មេដឹកនាំទាំងឡាយ នៅសហរដ្ឋអាមេរិក និងកម្ពុជាបាននិយាយស្របតាមទស្សនៈរបស់លោកប្រធានាធិបតី។ ក្នុងសុន្ទរកថារបស់លោក លោក Zakarya Adam សមាជិកសភា និងជាអនុប្រធាន Mufti បានមានប្រសាសន៍ថា “យើងគិតថាអាហារពិសេសនេះ ដែលរៀបចំទទួលដោយលោកស្រីឯកអគ្គរដ្ឋទូត មិនត្រឹមតែផ្តល់អាហារល្អៗតែប៉ុណ្ណោះទេ តែថែមទាំងផ្តល់អោយយើងនូវមិត្តភាព និងធ្វើអោយទំនាក់ទំនងរបស់យើងកាន់តែមានភាពជ្រាលជ្រៅថែមទៀត ក្នុងចំណោមប្រជាជនរបស់យើង ដោយមិនគិតពីជំនឿសាសនារបស់យើងឡើយ។”
ក្នុងពិធីអាហារស្រាយបួសនៅខេត្តកំពង់ចាម លោកស្រីឯកអគ្គរដ្ឋទូត Carol A. Rodley បានពន្យល់ពីសាររបស់លោកប្រធានាធិបតី ដោយមានប្រសាសន៍ថា “ដូចលោក លោកស្រីបានលឺហើយ លោកប្រធានាធិបតីបានលើកទឹកចិត្តអោយពួកយើងចាប់ផ្តើម និងក្នុងករណីខ្លះ បន្តការសន្ទនា ដែលយើងមានជាមួយសហគមន៍ឥស្លាមសាសនិក នៅជុំវិញពិភពលោក។ ការសន្ទនានេះគឺជាហេតុផលដែលពួកយើងមកទីនេះ។ យើងជឿថា ដើម្បីយល់ពីសហគមន៍ចាមអោយបានច្បាស់ យើងត្រូវស្តាប់ពីកង្វល់របស់អស់លោក លោកស្រី។” ក្នុងពេល ៤ ឆ្នាំជាប់គ្នាមកនេះ ស្ថានទូតអាមេរិកនៅទីក្រុងភ្នំពេញបានអបអររដូវបុណ្យរ៉ាម៉ាដានជាមួយសហគមន៍ឥស្លាម នៅកម្ពុជា។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
