ក្ដាផ្ដល់ព័ត៌មានដែលឧបត្ថម្ភដោយសហរដ្ឋអាមេរិកដើម្បីជំរុញតំលាភាពក្នុងតុលាការខេត្ដ
ក្រសួងយុត្ដិធម៌ ភ្នំពេញ
ថ្ងៃទី ២១ ខែឧសភា ឆ្នាំ ២០០៨
 |
ភារធារី Piper A.W. Campbell បង្ហាញក្តាផ្តល់ព័ត៍មាន
ថ្មីសំរាប់តាំងក្នុងតុលាការ។ រូបពង្រីក |
តុលាការកម្ពុជានឹងដាក់បង្ហាញក្ដាបង្ហាញពត៌មានសាធារណៈ ដើម្បីធ្វើឱ្យប្រសើរឡើងនូវលទ្ធភាពទទួលបាននូវពត៌មាន និងតម្លាភាពនៃប្រព័ន្ធច្បាប់នៅកម្ពុជា។ ក្រសួងយុត្ដិធម៌នឹងប្រកាសដាក់អោយប្រើប្រាស់ក្ដាបង្ហាញពត៌មាននេះនៅភ្នំពេញដោយគ្រប់តុលាការខេត្តក្រុងទាំងអស់កំណត់ត្រូវដាក់ក្ដាតាំងពត៌មាននេះមិនអោយយឺតជាងពាក់កណ្ដាលខែកក្ដដា ឆ្នាំ២០០៨។ ទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្ដរជាតិ (USAID) ផ្ដល់ជំនួយឧបត្ថម្ភដល់កម្មវិធីនេះ ដែលត្រូវអនុវត្ដដោយវិទ្យាស្ថានគ្រប់គ្រងអាស៊ីបូពាណ៌បច្ចឹម (EWMI)។
ក្នុងសុន្ទរកថារបស់លោកស្រីក្នុងពិធីសម្ពោធ លោកស្រី Piper A.W. Campbell ភារធារីស្ថានទូតអាមេរិកបានមានប្រសាសន៍ថា "ក្ដារផ្ដល់ព័ត៌មានទាំងអស់នេះនឹងជួយច្រើនក្នុងការធានាអោយតុលាការកម្ពុជាកាន់តែមានភាពងាយស្រួលអោយគេទាក់ទងសុំព័ត៌មាន និងមានតម្លាភាព។ ដោយសារតែក្ដារផ្ដល់ព័ត៌មានជាសាធារណៈទាំងអស់នេះនឹងត្រូវយកទៅតាំងនៅគ្រប់តុលាការខេត្ដក្រុងនៅទូទាំងប្រទេស ក្ដារផ្ដល់ព័ត៌មានទាំងអស់នេះនឹងរំលឹកស្មារតីសាធារណៈមិនត្រឹមតែលើការទទួលខុសត្រូវទៅលើប្រព័ន្ធគតិយុត្ដិតែប៉ុណ្ណោះទេ តែថែមទាំងរំលឹកពីកាតព្វកិច្ចរបស់ប្រព័ន្ធតុលាការចំពោះពលរដ្ឋកម្ពុជាទៀតផង។"
ក្ដាតាំងពត៌មាននេះបង្ហាញលំអិតពីច្បាប់ និងនិតិវិធីតុលាការដែលមិនធ្លាប់មានពីមុនមកសំរាប់អ្នកដែលប្រើប្រាស់សេវាតុលាការ។ គំនិតនេះផ្ដើមចេញពីតុលាការគំរូដែលត្រូវបានធ្វើឡើងនៅខេត្ដកណ្ដាលដោយក្រសួងយុត្ដិធម៌ក្រោមជំនួយឧបត្ថម្ភរបស់ទីភ្នាក់ងារ USAID។ តុលាការខេត្ដកណ្ដាលបានសាកល្បងដាក់តាំងក្ដារពត៌មាននេះកាលពីខែធ្នូឆ្នាំ២០០៦ ទទួលបានប្រតិកម្មវិជ្ជមានពីសាធារណជនដែលធ្វើឱ្យ USAID និងក្រសួងយុត្ដិធម៌សំរេចធ្វើការពង្រីកកម្មវិធីនេះដល់គ្រប់តុលាការទាំងអស់នៅក្នុងប្រទេស។
ក្ដាតាំងពត៌មានទាំងនេះចែកជាផ្នែកបីៗ ។ ក្ដាទី ១ តាំងពត៌មានស្ដីពីថ្លៃសេវាកសាងសំណុំរឿងវិវាទរដ្ឋប្បវេណី និងបង្ហាញពីលក្ខណៈវិនិច្ឆ័យសំរាប់ការលើកលែងការបង់ថ្លៃសេវាសំរាប់ប្រជាជនក្រក្រីដែលគ្មានលទ្ធភាពបង់ប្រាក់។ បន្ទះក្ដាទី ២ បង្ហាញពីសិទ្ធិរបស់ចុងចោទក្រោមក្រមនីតិវិធីព្រហ្មទណ្ឌថ្មី។ បន្ទះក្ដាទី ៣ តាំងពត៌មានស្ដីពីសិទ្ឋិរបស់ជនដែលត្រូវបានគេចោទ អនីតិជន និងជនរងគ្រោះដោយបទឧក្រិដ្ឋ។
ក្ដាពត៌មាននេះគឺជាផ្នែកមួយនៃគំរោងកម្មវិធីរបស់ USAID ដែលមានថវិកា ២លានដុល្លារអាមេរិកសំរាប់ឆ្នាំនេះ ដើម្បីពង្រឹងប្រពន្ធ័ច្បាប់នៅកម្ពុជាដោយធ្វើការបណ្ដុះបណ្ដាលចៅក្រម និងមេធាវី និងផ្ដល់ឱ្យសាធារណជននូវលទ្ធភាពច្រើនជាងមុន ក្នុងការទទួលបានពត៌មានស្ដីពីតុលាការ ។ នៅឆ្នាំ ២០០៦ ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្ដរជាតិបានចុះហត្ថលេខាលើអនុស្សារណៈយោគយល់ជាមួយរាជរដ្ឋាភិបាលកម្ពុជា ដើម្បីចាប់ផ្ដើមសហប្រតិបត្ដិការពង្រឹងប្រព័ន្ធយុត្ដិធម៌របស់ប្រទេស។ គោលបំណងរបស់គម្រោងទាំងមូលនោះ គឺការធ្វើឱ្យប្រសើរឡើងដល់សមត្ថភាពរបស់អ្នកពាក់ព័ន្ធសំខាន់ៗនៅកម្ពុជាទាំងក្នុងរដ្ឋាភិបាលទាំងក្រៅរដ្ឋាភិបាលក្នុងការធ្វើការតស៊ូមតិឱ្យមានប្រសិទ្ធិភាពការងារអប់រំ និងការបណ្ដុះបណ្ដាល ដើម្បីធានាថាយុត្ដិធម៌និងសិទ្ធិមនុស្សត្រូវបានប្រតិបត្ដិតាម និងលើកស្ទួយបានសមរម្យ។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
