ស្ថានទូតអាមេរិកនិងសាកលវិទ្យាល័យបញ្ញាសាស្រ្តរួមគ្នាលើកកំពស់បញ្ហាកម្មសិទ្ធិបញ្ញា នៅកម្ពុជា
សាកលវិទ្យាល័យបញ្ញាសាស្រ្ត
ថ្ងៃទី ២៧ ខែមេសា ឆ្នាំ ២០០៩
នៅថ្ងៃទី ២៧ ខែមេសា ឆ្នាំ ២០០៩ លោកស្រីឯកអគ្គរដ្ឋទូតអាមរិក Carol A. Rodley បានថ្លែងសុន្ទរកថាបើកក្នុងពិធីមួយដែលរៀបចំដោយស្ថានទូតអាមេរិក និងសាកលវិទ្យាល័យបញ្ញាសាស្រ្ត ដើម្បីកត់សំគាល់ទិវាសិទ្ធិកម្មសិទ្ធិបញ្ញាពិភពលោក ដែលត្រូវនឹងថ្ងៃទី ២៦ មេសា។ ប្រទេសកម្ពុជាមានបញ្ហាច្រើនស្តីពីកម្មសិទ្ធិបញ្ញា ដូចជាថា ជាង ៩៥% នៃកុំព្យូទ័រដែលលក់នៅក្នុងប្រទេសមិនមានការចំលងស្របច្បាប់នៃប្រព័ន្ធប្រតិបត្តិការទេ។ កម្មវិធីនេះត្រូវបានរៀបចំឡើងដើម្បីលើកកំពស់ការយល់ដឹងទៅលើបញ្ហានេះ ក្នុងចំណោមនិស្សិត ហើយមានការចូលរួមរបស់វាគ្មិនពិភាក្សាពីខាងវិស័យឯកជននិងស្ថានប័នរាជរដ្ឋាភិបាល ទាក់ទងនឹងសិទ្ធិបញ្ញា។
អ្នកចូលរួមទាំងអស់បានសង្កត់ធ្ងន់លើការទាក់ទងគ្នារវាងការបង្កើតអោយមានការងារធ្វើ និងការគាំទ្រកម្មសិទ្ធិបញ្ញា នៅក្នុងប្រទេស ជាពិសេសក្នុងវិស័យព័ត៌មានវិទ្យា ដែលត្រូវការទីផ្សាសំរាប់លក់ផលិតផលរបស់ខ្លួន ដើម្បីអោយប្រទេសកម្ពុជាអាចពង្រីកនិងបង្កើតការងារសំរាប់អោយមនុស្សជំនាន់ក្រោយរបស់ខ្លួនធ្វើ។
ក្នុងសុន្ទរកថារបស់លោកស្រី លោកស្រីឯកអគ្គរដ្ឋទូត Rodley ក៏បានសង្កត់ធ្ងន់ផងដែរលើការទាក់ទងគ្នានេះ ហើយបានមានប្រសាសន៍ថា “ការការពារនិងការអនុវត្តមានប្រសិទ្ធិភាពល្អលើសិទ្ធិស្តីពីកម្មសិទ្ធិបញ្ញាមានសារៈសំខាន់ចាំបាច់ណាស់ដល់ការលូតលាស់សេដ្ឋកិច្ច ក្នុងប្រទេសកំពុងអភិវឌ្ឍ។ វាជំរុញដល់ពាណិជ្ជកម្ម ការវិនិយោគ និងការលូតលាស់បានល្អរបស់ប្រទេស។” លោកស្រីក៏បានធ្វើការកត់សំគាល់ផងដែរពីផលប៉ះពាល់ក្នុងស្រុកនិងអវិជ្ជមាននៃការមិនអើពើចំពោះសិទ្ធិស្តីពីកម្មសិទ្ធិបញ្ញា និងការលួចចំលង ដោយលោកស្រីបានលើកឡើងថា “ក្នុងឆ្នាំ ១៩៩៩ មានមនុស្សយ៉ាងហោចណាស់ចំនួន ៣០ នាក់បានស្លាប់ នៅប្រទេសកម្ពុជា បន្ទាប់ពីបានប្រើថ្នាំគ្រុនចាញ់ក្លែងក្លាយ។”
នៅក្នុងពិធីនោះ ក៏មានបញ្ចាំងភាពយន្តរបស់សេវា National Geography ផងដែរ ដែលមានចំណងជើងថា “ខុសច្បាប់” ។ ខ្សែភាពយន្តនេះពិនិត្យទៅលើបញ្ហាប្រឈមសំរាប់ប្រទេសទាំងអស់ ក្នុងការដោះស្រាយបញ្ហានេះ ដែលមិនមានព្រំដែនប្រទេសច្បាស់លាស់ ហើយអ្នកក្លែងបន្លំមានភាពប៉ិនប្រសប់ ហើយពិបាកចាប់ខ្លួន។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
