កម្មវិធីភាពជាអ្នកដឹកនាំសំរាប់អ្នកធ្វើទស្សនកិច្ចអន្តរជាតិ
(International Visitor Leadership Program)
កម្មវិធីភាពជាអ្នកដឹកនាំសំរាប់អ្នកធ្វើទស្សនកិច្ចអន្តរជាតិនាំជនបរទេសចំនួនប្រហែល ៥ ០០០ នាក់ពីទូទាំងពិភពលោក ក្នុងមួយឆ្នាំៗ មកកាន់សហរដ្ឋអាមេរិក ដើម្បីជួបជាមួយសមភាគីក្នុងអាជីពរបស់គេ និងស្វែងយល់ដោយផ្ទាល់ពីប្រទេសអាមេរិក។ អ្នកធ្វើទស្សនកិច្ច ដែលត្រូវបានជ្រើសរើសដោយមន្រ្តីផ្នែកកិច្ចការបរទេសរបស់សហរដ្ឋអាមេរិក នៅក្រៅប្រទេស គឺជាអ្នកកំពុងដឹកនាំ ឬអ្នកដែលអាចក្លាយជាអ្នកដឹកនាំ ក្នុងរដ្ឋាភិបាល ផ្នែកនយោបាយ ប្រព័ន្ធផ្សព្វផ្សាយ វិស័យអប់រំ សិល្បៈ មុខជំនួញ និងវិស័យផ្សេងៗទៀត។
ក្នុងចំណោមមនុស្សឆ្នើមៗរាប់ពាន់នាក់ ដែលបានចូលរួមក្នុងកម្មវិធីភាពជាអ្នកដឹកនាំសំរាប់អ្នកធ្វើទស្សនកិច្ចអន្តរជាតិ តាំងពីកម្មវិធីនេះត្រូវបានបង្កើតឡើងជិត ៧ ទសវត្សកន្លងទៅ មាន ២៩០ នាក់ កំពុងឬបានធ្វើជា ប្រមុខរដ្ឋាភិបាលនិង ប្រមុខរដ្ឋ ២ ០០០ នាក់មានឋានៈជារដ្ឋមន្រ្តី និងមានមនុស្សជាច្រើនទៀតជាមេដឹកនាំឆ្នើមៗក្នុងវិស័យឯកជន និងវិស័យសាធារណៈ។
អ្នកធ្វើទស្សនកិច្ចអន្តរជាតិធ្វើដំណើរមកកាន់សហរដ្ឋអាមេរិក តាមគំរោងសំរាប់ម្នាក់ៗ ឬតាមគំរោងសំរាប់ជាក្រុម។ គំរោងសំរាប់ជាក្រុមឬដែលផ្តោតលើការពិភាក្សាប្រធានបទអ្វីមួយ ផ្តោតលើបញ្ហាជាក់លាក់មួយៗ ដូចជាសេដ្ឋកិច្ចឬប្រព័ន្ធបោះឆ្នោត នៅសហរដ្ឋអាមេរិក។គំរោងសំរាប់ជាក្រុមអាចមានការចូលរួមនៃសហការី ដែលមានចំណាប់អារម្មណ៍ក្នុងជំនាញអាជីពដូចគ្នា ហើយមកពីប្រទេស តំបន់ភូមិភាគតាមការកំណត់ ឬមកពីទូទាំងពិភពលោក។
សេចក្តីអញ្ចើញអោយមកធ្វើទស្សនកិច្ចនៅសហរដ្ឋអាមេរិក ក្រោមការឧបត្ថម្ភរបស់កម្មវិធី ភាពជាអ្នកដឹកនាំសំរាប់អ្នកធ្វើទស្សនកិច្ចអន្តរជាតិ ចេញដោយស្ថានទូតអាមេរិក។ ដូច្នេះ គេមិនអាចដាក់ពាក្យសុំចូលរួមក្នុងកម្មវិធីនេះទេ។
តាំងពីឆ្នាំ ១៩៩៤ មក ស្ថានទូតអាមេរិកបានបញ្ជូនមនុស្សចំនួន ១៦៥ នាក់ពីប្រទេសកម្ពុជា ដើម្បីចូលរួមក្នុងកម្មវិធីនេះ។ អ្នកទាំងនេះគឺជាភ្ញៀវកិត្តិយសមកពីសភាជាតិ អនាគតអ្នកដឹកនាំក្នុងរដ្ឋាភិបាល អ្នកធ្វើការក្នុងវិស័យអប់រំសិក្សាធិការ អ្នកសារព័ត៌មាន អ្នកសេដ្ឋកិច្ច សកម្មជនសិទ្ធិមនុស្ស និងអ្នកដឹកនាំអង្គការមិនមែនរដ្ឋាភិបាល។
អារម្ភកថាស្ដីពីសហរដ្ឋ អាមេរិក
ការផ្លាស់ប្ដូរគ្នាផ្នែក សិក្សាអប់រំ
