ឯកអគ្គរដ្ឋទូត Williamson ដឹកនាំទិវាចងចាំចំពោះពួកខ្មែរក្រហម

វិទ្យាល័យហ៊ុន សែន អង្គស្នួល
ថ្ងៃទី ២០ ខែឧសភា ឆ្នាំ ២០០៩

Ambassador Clint Williamson (first from right) distributes books to students with DC-Cam Director Youk Chhang (second from right) as a female journalist asks him about the project. រូបពង្រីក

នៅថ្ងៃទី ២០ ខែឧសភា ឆ្នាំ​២០០៩ លោក​ឯកអគ្គ​រដ្ឋទូត​គោចរសហ​រដ្ឋអាមេ​រិក Clint Williamson បាន​អញ្ជើញ​ទៅដល់​វិទ្យា​ល័យ​ហ៊ុន សែន​អង្គស្នួល ដើម្បី​ថ្លែងទៅ​កាន់​សិស្ស គ្រូ និង​នាយក​សាលា ដែល​មកពី​សា​លារៀន​ចំនួន ១៦ នៅ​ខេត្ត​កណ្តាល។ សំរាប់​ប្រជា​ជន​កម្ពុជា ថ្ងៃទី ២០ ឧសភា​គឺជាទិវា​ចងចាំ ដោយ​គេ​ហៅ​ម្យ៉ាងទៀត​ថា “ទិវា​ចងកំហឹង” ចំពោះ​អំពើ​ប្រល័យ​ពូជ​សាសន៍​របស់ពួក​ខ្មែរ​ក្រហម។

ដោយថ្លែងទៅកាន់​សិស្ស​វិទ្យា​ល័យដែល​មក​កក​កុញ លោក​ឯកអគ្គ​រដ្ឋទូត Williamson បាន​មាន​ប្រសាសន៍​ថា លោក​មានការ​យល់​ចិត្ត​ប្រជាជន​កម្ពុជា​ក្មេងៗ​ ។ លោក​បាន​មាន​ប្រសាសន៍​បន្តថា “ក្នុង​សម័យ​ខ្មែរ​ក្រហម​ ខ្ញុំ​មានអាយុ​ស្មើអ្នក​ទាំង​អស់គ្នា។ មនុស្ស​ជាច្រើន​ចង់បំភ្លេច​ការ​ឈឺចាប់ តែ​យើងមិន​អាចបំភ្លេច​បាន​ទេ។ រដ្ឋាភិបាល​អាមេរិក​មាន​មោទន​ភាពនឹង​ជួយ។”

     លោកឯកអគ្គរដ្ឋទូត Williamson រួម​ជាមួយ​ឯក​ឧត្តម ទុន សាអ៊ីម អនុរដ្ឋ​លេខាធិការ​ក្រសួង​អប់រំ យុវជន និង​កីឡា និង​លោក ឆាង​ យុ នាយក​មជ្ឈ​មណ្ឌល​ឯកសារ​កម្ពុជា បានចែក​សៀវ​ភៅរាប់​ពាន់ក្បាល​ស្តីពី “ប្រវត្តិ​សាស្រ្ត​នៃរបប​កម្ពុជា​ប្រជា​ធិបតេយ្យ”​ ជូន​ដល់និស្សិត​ចំនួន​ជាង ៣ ០០០ នាក់​ដែលមាន​វត្តមាន។ សៀវភៅ​ដែលមាន​ការគាំ​ទ្រពី​រដ្ឋាភិបាល​កម្ពុជា និយាយ​លំអិតពី​ការឡើង​កាន់អំណាច ការដួល​រលំ និង​អំពើ​យង់​ឃ្នងនៃ​របប​ខ្មែរ​ក្រហម ។​ សៀវ​ភៅនេះ ដែល​សរសេរ​ដោយ​លោក ឌី ខាំបូលី ត្រូវ​បានត្រួត​ពិនិត្យ​ដោយ​អ្នក​ឯកទេស​ខ្មែរនិង​បរទេស ដែល​មាន​ជំនាញ​ខាងអំពើ​ប្រល័យ​ពូជ​សាសន៍។ សៀវ​ភៅនេះ​ត្រូវបាន​បក​ប្រែ​ជា ៧​ ភា​សា។

     ការចែកសៀវភៅនៅ​វិទ្យា​ល័យ​ហ៊ុន សែន អង្គ​ស្នួលគឺ​ជាជំហាន​ដំបូង​ក្នុងផែន​ការជាតិ​ដើម្បី​ចែក​សៀវ​ភៅ​ចំនួន​មួយ​លាន​ក្បាល​នៅតាម​សាលា​រៀន​ទាំងអស់​នៅ​កម្ពុជា របស់​មជ្ឈ​មណ្ឌល​ឯកសារ​កម្ពុជា។ ម្ចាស់​ជំនួយ​ចំនួន ១១ បាន​ជួយ​ឧបត្ថម្ភ​សំរាប់​ការចែក​ចាយ​នេះ។

     សិស្សម្នាក់​ឈ្មោះ សំអាត សុគា អាយុ ១៨ ឆ្នាំ មក​ពីវិទ្យា​ល័យ​បែក​ចាន បាន​និយាយ​ថា “ខ្ញុំបាន​ដឹង​ប្រវត្តិ​ខ្លះៗ​ពីឳពុក​ម្តាយ​របស់ខ្ញុំ។ ខ្ញុំដឹង​ថា របប​នេះបាន​ធ្វើអោយ​មានការ​ឈឺចាប់​ តែសៀវ​ភៅ​នេះ​នឹង​​ធ្វើ​​អោយខ្ញុំ​មាន​ការ​យល់​ដឹង​ច្រើន។”

     នៅពេលចែកសៀវភៅ​ លោក​ ឆាង យុ បាន​មាន​ប្រសាសន៍​ថា លោក​មាន​មោទនភាព​ជា​ខ្លាំងចំពោះ​សិស្ស​ដោយ​លោក​មាន​ប្រសាសន៍​ថា “ពួកគេ​គឺជាក្តី​សង្ឃឹម​និងជាភាព​ខ្លាំងរបស់​យើង​ទៅ​អនាគត។ ខ្ញុំមាន​ការ​រំភើប​​​ជា​ខ្លាំង ហើយ​សង្ឃឹម​ថា សិស្ស​កម្ពុជា​និង​ស្រឡាញ់​សៀវភៅ​នេះ ហើយ​ចាប់​យក​ការ​ទទួល​ខុស​ត្រូវ​ចំពោះ​​​ប្រវត្តិសាស្រ្ត​របស់គេ​ផ្ទាល់។”