លោក Luis CdeBaca ឯកអគ្គរដ្ឋទូតគោចរសហរដ្ឋអាមេរិក ទទួលបន្ទុកបញ្ហាជួញដូរមនុស្ស ធ្វើទស្សនកិច្ចនៅប្រទេសកម្ពុជា
ភ្នំពេញ
ថ្ងៃទី ១ ខែកញ្ញា ឆ្នាំ ២០០៩
 |
ឯកអគ្គរដ្ឋទូត Luis CdeBaca ក្នុងសន្និសីទសារ
ព័ត៌មានក្នុងស្ថានទូតអាមេរិក។ រូបពង្រីក |
លោកឯកអគ្គរដ្ឋទូត Luis CdeBaca ប្រធានការិយាល័យតាមដាននិងប្រយុទ្ធប្រឆាំងនឹងការជួញដូរមនុស្សរបស់ក្រសួងការបរទេសសហរដ្ឋអាមេរិក បានមកដល់ទីក្រុងភ្នំពេញ ក្នុងដំណើរទស្សនកិច្ចរយៈពេល ៤ ថ្ងៃមកកាន់ប្រទេសកម្ពុជា។ លោកឯកអគ្គរដ្ឋទូតបានចំណាយពេល ២ ថ្ងៃ នៅទីក្រុងភ្នំពេញ ដើម្បីជួបពិភាក្សាជាមួយមន្រ្តីរាជរដ្ឋាភិបាលកម្ពុជា ដែលបន្ទាប់មក លោកបានធ្វើដំណើរទៅខេត្តសៀមរាបរយៈពេល ២ ថ្ងៃ ដើម្បីជួបជាមួយអង្គការមិនមែនរដ្ឋាភិបាលមួយចំនួន និងលោក ស៊ុន ប៊ុនផង ប្រធាននគរបាលការពារអនិតិជន និងប្រឆាំងការជួញដូរមនុស្ស។
ក្នុងអំឡុងពេលទស្សនកិច្ចរបស់លោកឯកអគ្គរដ្ឋទូត នៅទីក្រុងភ្នំពេញ លោកក៏បានជួបជាមួយតំណាងក្រសួងសង្គមកិច្ច មហាផ្ទៃ និងក្រសួងយុត្តិធម៌ផងដែរ ទាក់ទងនឹងនិតិវិធីនិងគោលនយោបាយក្នុងការប្រឆាំងនឹងការជួញដូរមនុស្សរបស់ប្រទេសកម្ពុជា។ នៅក្នុងសន្និសីទកាសែតក្នុងស្ថានទូតអាមេរិក នៅភ្នំពេញ កាលពីថ្ងៃទី ១ ខែកញ្ញា លោកឯកអគ្គរដ្ឋទូត Luis CdeBaca បានថ្លែងថា ការបញ្ជូនក្នុងពេលថ្មីៗនេះនៃជនប្រព្រឹត្តអាណាចារលើកុមារ ដើម្បីកាត់ទោសនៅសហរដ្ឋអាមេរិកគឺជាឧទាហរណ៍មួយនៃភាពជឿនលឿនដែលសំរេចបានដោយប្រទេសកម្ពុជា ក្នុងការប្រយុទ្ធប្រឆាំងនឹងការជួញដូរមនុស្ស។ លោកឯកអគ្គរដ្ឋទូត Luis CdeBaca ត្រូវបានដកស្រង់សំដីដែលបាននិយាយថា “ការចាប់ខ្លូននិងការបញ្ជូនត្រឡប់ទៅវិញនៃបុរសទាំងបីនាក់នេះមិនអាចមានទៅបានទេ បើគ្មានសហប្រតិបតិ្តការរបស់អាជ្ញាធរអាមេរិក និងអាជ្ញាធរកម្ពុជា។” ក្នុងពេលដែលលោកឯកអគ្គរដ្ឋទូតអបអរសាទរការបញ្ជូនខ្លួនជនប្រព្រឹត្តអំពើអាណាចារលើកុមារ លោកបានថ្លែងថា “ភាគីមួយទៀតក្នុងបទល្មើសនេះស្ថិតក្នុងប្រទេសកម្ពុជានៅឡើយ នោះគឺម្ចាស់ផ្ទះបន ដែលបានលក់កុមារអោយជនប្រព្រឹត្តអំពើអាណាចារទាំងនេះ” ហើយបានក្រើនរំលឹកអោយរាជរដ្ឋាភិបាលកម្ពុជាបង្ហើយលើករណីនេះ ដោយធ្វើការស៊ើបអង្កេតលើជនទាំងនេះផងដែរ។ លោកឯកអគ្គរដ្ឋទូត Luis CdeBaca ស្ថិតក្នុងជើងចុងក្រោយនៃដំណើរទស្សនកិច្ចរបស់លោក បន្ទាប់ពីបានទៅប្រទេសថៃ និងប្រទេសម៉ាឡេស៊ី មុននឹងមកកាន់ប្រទេសកម្ពុជា។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
