ស្ថានទូតអាមេរិកចែកមុងចំនួន ១៥០ ដល់មជ្ឈមណ្ឌលកុមារកំព្រាឥស្លាម
ថ្ងៃទី៣០ ខែមិថុនា ឆ្នាំ២០០៩
មជ្ឈមណ្ឌលកុមារកំព្រា The House of Emirates for Orphans ទីក្រុងភ្នំពេញ
 |
លោកស្រី Amy Canon (ទីពីររាប់ពីខាងខ្វេង)
មន្រ្តីផ្នែកនយោបាយរបស់ស្ថានទូតអាមេរិក
បានចែកមុងចំនួន ១៥០ ដែលផ្តល់ដោយ
រដ្ឋាភិបាលអាមេរិក ដល់មជ្ឈមណ្ឌលកុមារ
កំព្រា The House of Emirates for Orphans
នៅទីក្រុងភ្នំពេញ។ រូបពង្រីក |
នៅថ្ងៃទី ៣០ ខែមិថុនា លោកស្រី Amy Canon មន្រ្តីផ្នែកនយោបាយរបស់ស្ថានទូតអាមេរិក បានចែកមុងចំនួន ១៥០ ដែលផ្តល់ដោយរដ្ឋាភិបាលអាមេរិក ដល់មជ្ឈមណ្ឌលកុមារកំព្រា The House of Emirates for Orphans នៅទីក្រុងភ្នំពេញ។ ការបន្លឺជាក្រុមនូវពាក្យថា “អរគុណ” បានមានឡើងនៅក្នុងបន្ទប់បន់ស្រន់ នៅពេលលោកស្រី Canon ចែកមុងអោយកុមារម្នាក់ៗ។
មជ្ឈមណ្ឌលកុមារកំព្រានេះត្រូវបានបង្កើតឡើងក្នុងឆ្នាំ ២០០៦ ហើយមានកុមារាចំនួនប្រហែល ១៥០ នាក់ ស្ថិតក្នុងអាយុពី ៦ ឆ្នាំដល់ ១៦ ឆ្នាំ មកពីខេត្តនិងសហគមន៍ឥស្លាមនានា នៅទូទាំងប្រទេសកម្ពុជា។ ក្នុងពេលចុះទៅមជ្ឈមណ្ឌលនេះ លោកស្រី Canon បាននិយាយជាមួយកុមារទាំងនោះ ដោយសួរពួកគេពីការសិក្សានិងសកម្មភាពដែលគេចូលចិត្តជាងគេ។ លោកស្រីក៏បាននិយាយផងដែរពីសារៈសំខាន់នៃអនាម័យ ការលាងដៃ និងការថែរក្សាសុខភាព ដោយដេកដាក់មុង។
ជំងឺគ្រុនចាញ់ ដែលជាជំងឺឆ្លងតាមមូសនិងបណ្តាលមកពីប៉ារ៉ាសិត សំលាប់មនុស្សជាងមួយលាននាក់ ក្នុងមួយឆ្នាំៗ ក្នុងសាកលលោក។ យោងតាមអង្គការសុខភាពពិភពលោក (WHO) ភ្នាក់ងារសុខាភិបាលក្នុងតំបន់ទន្លេមេគង្គ តាមបណ្តោយព្រំដែនកម្ពុជាថៃ “កំពុងតែមានការពិបាកក្នុងការទប់ទល់មេរោគគ្រុនចាញ់ម្យ៉ាង ដែលកាន់តែមានភាពស៊ាំនឹងថ្នាំ artemisinin ដែលជាថ្នាំមានប្រសិទ្ធិភាពបំផុតជាមួយនឹងជំងឺនេះ។ “បើការខិតខំទាំងនេះមិនមានជោគជ័យទេ នោះអង្គការសុខភាពពិភពលោកមានការបារម្ភថា ផែនការដើម្បីធ្វើកុំអោយមានការស្លាប់ដោយសារជំងឺគ្រុនចាញ់ ក៏នឹងទទួលបរាជ័យដែរ។”
បើយោងតាមរបាយការណ៍ប្រចាំឆ្នាំរបស់មជ្ឈមណ្ឌលជាតិកំចាត់ជំងឺគ្រុនចាញ់ ជំងឺគ្រុនចាញ់ជាជំងឺរាតត្បាតនៅប្រទេសកម្ពុជា តែការអប់រំសាធារណជន និងសកម្មភាពជួយនៅតាមមូលដ្ឋានបានជួយកាត់បន្ថយបានពាក់កណ្តាលនូវចំនួនសរុបនៃករណីជំងឺគ្រុនចាញ់ ក្នុងប្រទេសកម្ពុជា ពីឆ្នាំ ២០០៣ ដល់ឆ្នាំ ២០០៨។ យោងតាមរបាយការណ៍នេះ កាលពីឆ្នាំទៅ មានអ្នកស្លាប់ដោយសារជំងឺគ្រុនចាញ់ចំនួន ២០៩ នាក់ ដែលជាចំនួនតិចជាងឆ្នាំ ២០០៧ បន្តិច ដែលមានចំនួនអ្នកស្លាប់ចំនួន ២៤១ នាក់។
លោក Moth Mostoeut នាយកមជ្ឈមណ្ឌលកុមារកំព្រានេះ បានសំដែងអំណរគុណដល់លោកស្រី Canon ចំពោះអំណោយទាំងនោះ ហើយបានមានប្រសាសន៍ថា ពីមុន កុមារខ្វះមុងសំរាប់ការពារជំងឺគ្រុនចាញ់ និងជំងឺគ្រុនឈាម។ “យើងសូមអរគុណណាស់។ កុមារពិតជានឹងទទួលប្រយោជន៍ពីអំណោយទាំងនេះ។”
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
