ឯកអគ្គរដ្ឋទូតទស្សនាជំរុំព្យាបាលភ្នែក និងមន្ទីរពិសោធន៍ខ្នាតតូច នៅប៉ៃលិន
មន្ទីរពេទ្យបង្អែកប៉ៃលិន
ថ្ងៃទី០៩ ខែកក្កដា ឆ្នាំ២០០៩
 |
លោកស្រីឯកអគ្គរដ្ឋទូត Carol A. Rodley និង
លោកចាន់ថាពី USAID ប្រចាំនៅក្រុងភ្នំពេញ
ជួបជាមួយលោក Christopher Raymond និងអ្នក
វិទ្យាសាស្រ្តនៅមន្ទីរពិសោធន៍ខ្នាតតូច។ រូបពង្រីក |
លោកស្រីឯកអគ្គរដ្ឋទូត Carol A. Rodley បានសង្កេតមើលដោយផ្ទាល់នូវការវះកាត់ជំងឺភ្នែកស្បែកបាំង កាលពីថ្ងៃទី ៩ ខែកក្កដា ក្នុងអំឡុងទស្សនកិច្ចរបស់លោកស្រីទៅកាន់កន្លែងព្យាបាលជំងឺភ្នែករបស់អង្គការដែលមានឈ្មោះថា ធនធានអន្តរជាតិដើម្បីកែលំអចក្ខុវិញ្ញាណ (IRIS) នៅមន្ទីរពេទ្យបង្អែកប៉ៃលិនកាលពីថ្ងៃព្រហស្បតិ៍កន្លងទៅនេះ។ IRIS គឺជាអង្គការឯករាជ្យតូចមួយ ដែលមានឯកទេសក្នុងការការពារការខ្វាក់ និងការស្តារចក្ខុឡើងវិញ ដោយផ្តល់អោយអ្នកជំងឺក្រីក្រនូវសេវាពិនិត្យជំងឺ និងវះកាត់។
លោកស្រីឯកអគ្គរដ្ឋទូតបានដឹងពីជោគជ័យរបស់អង្គការក្នុងដំណើការរកមើល ព្យាបាល និងថែទាំអ្នកជំងឺ ក្នុងពេលពិភាក្សាជាមួយនឹងលោកស្រី Kat Anthony ដែលជាប្រធានរដ្ឋបាលនៃអង្គការនេះ។ លោកស្រី Anthony បានមានប្រសាសន៍ថា “ដំណើរការចុះរកអ្នកជំងឺត្រូវបានធ្វើ ដោយសហការជាមួយក្រសួងសុខាភិបាល។ អ្នកជំងឺដែលត្រូវការវះកាត់ទទួលបានប្រាក់ឧបត្ថម្ភសំរាប់ការធ្វើដំណើរនិងការស្នាក់នៅ បើសិនជាគេរស់នៅឆ្ងាយពីកន្លែងព្យាបាល/វះកាត់។ មួយថ្ងៃបន្ទាប់ពីទទួលការវះកាត់ គេទទួលបានការតាមដានក្រោយការវះកាត់ ការថែទាំ និងការលាងសំអាត។ មួយសប្តាហ៍បន្ទាប់ពីការវះកាត់ គេត្រូវមកពិនិត្យតាមដានម្តងទៀត។
ក្នុងអំឡុងពេល ៣ ថ្ងៃនៃជំរុំព្យាបាលភ្នែកនៅប៉ៃលិន គ្រូពេទ្យវះកាត់មានគំរោងត្រូវធ្វើការវះកាត់ភ្នែកសំរាប់អ្នកជំងឺចំនួន ៧២ នាក់។ ក្រុមបុគ្គលិករបស់អង្គការ IRIS ធម្មតាមានសមាជិក ៤ នាក់ គឺគ្រូពេទ្យវះកាត់ម្នាក់ ជំនួយការវេជ្ជបណ្ឌិតម្នាក់ គិលានុប្បដ្ឋាយិកាម្នាក់ និងអ្នកបើកបរម្នាក់ សំរាប់ដឹកអ្នកជំងឺដែលត្រូវការជំនួយយានជំនិះ។
តាំងពីខែធ្នូ ឆ្នាំ ២០០៨ មក កម្មវិធីរួមគ្នានៃជំរុំព្បាបាលភ្នែក និងជំងឺទូទៅរបស់អង្គការ IRIS ចាប់តាំងពីមានអង្គការនេះឡើងនៅប្រទេសកម្ពុជា បានផ្តល់ការពិនិត្យភ្នែកដល់មនុស្សចំនួន ១២៥ ៣១៩ នាក់ និងការវះកាត់ចំនួន ២៣ ៤៨៥ ករណី ដោយមិនគិតថ្លៃ ដោយក្នុងនោះ ការវះកាត់ចំនួន ១៥ ២៩១ ករណីជាការវះកាត់ភ្នែកស្បែកបាំង (កាតារ៉ាក់)។
ក្រៅពីការចុះទៅមើលជំរុំព្បាបាលភ្នែករបស់អង្គការIRIS លោកស្រីឯកអគ្គរដ្ឋទូត Rodley បានទៅមើលមន្ទីរពិសោធន៍ខ្នាតតូចរកមើលកំរិតគុណភាពថ្នាំ នៅមន្ទីរពេទ្យបង្អែកក្រុងប៉ៃលិន ។ មន្ទីរពិសោធន៍នេះទទួលបានជំនួយថវិកាពីរដ្ឋាភិបាលអាមេរិក តាមរយៈទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិ (USAID) នៅភ្នំពេញ ហើយដែលនៅពេលនេះ កំពុងត្រូវបានគ្រប់គ្រងដោយដៃគូរបស់ទីភ្នាក់ងារនេះ នៅទីក្រុងបាងកក ប្រទេសថៃ។
ដោយបានជួបជាមួយអ្នកវិទ្យាសាស្រ្តក្នុងស្រុក និងលោក Christopher Raymond អ្នកសំរបសំរួលគំរោង Pharmacopeia របស់សហរដ្ឋអាមេរិកសំរាប់តំបន់អាស៊ីអាគ្នេយ៍ លោកស្រីឯកអគ្គរដ្ឋទូត Rodley បានដឹងពីការគំរាមកំហែងនៃកំណើនភាពស៊ាំនៃមេរោគគ្រុនចាញ់ទៅនឹងថ្នាំព្យាបាលជំងឺគ្រុនចាញ់ និងសេចក្តីត្រូវការចាំបាច់ត្រូវធ្វើការត្រួតពិនិត្យថ្នាំដែលមានលក់តាមមូលដ្ឋាននៅប៉ៃលិន។
លោក Raymond បានធ្វើការពន្យល់ថាការធ្វើតេស្តកំណត់គុណភាពឱសថមានសារៈសំខាន់ជាខ្លាំងចំពោះសុខភាព នៅភាគពាយព្យប្រទេសកម្ពុជា ពីព្រោះតែកំណើនភាពស៊ាំទៅនឹងថ្នាំ Artemisinin ដែលជាថ្នាំព្បាបាលជំងឺគ្រុនចាញ់មានប្រសិទ្ធិភាពជាងគេក្នុងពិភពលោក។ បញ្ហានេះរឹតតែមានភាពធ្ងន់ធ្ងរថែមទៀតដោយសារតែមានឱសថក្លែងក្លាយច្រើនត្រូវបានរត់ពន្ធឆ្លងកាត់ព្រំដែនខ្មែរ ថៃ។ បើសិនជាគ្មានដំណោះស្រាយលើរឿងនេះទេ នោះការរាលដាលនៃភាពស៊ាំទៅនឹងថ្នាំប្រឆាំងជំងឺគ្រុនចាញ់ អាចមានគ្រោះថ្នាក់ខ្លាំង ពិសេសនៅទ្វីបអាហ្រ្វិក ដែលមានអ្នកជំងឺចំនួនជាងមួយលាននាក់ស្លាប់ក្នុងមួយឆ្នាំៗ ដោយសារជំងឺគ្រុនចាញ់។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
