សេចក្តីប្រកាសពត៌មាន
ការត្រឡប់មកពិនិត្យសំរេចទិដ្ឋាការអន្ដោប្រវេសន៍ទៅរស់នៅសហរដ្ឋអាមេរិក នៅទីក្រុងភ្នំពេញវិញនៅពេលនេះមានលក្ខណៈជាផ្លូវការហើយ ។
ការពិនិត្យសំរេចលើទិដ្ឋាការអន្ដោប្រវេសន៍ទៅរស់នៅក្នុងសហរដ្ឋអាមេរិកបានបែរមកធ្វើនៅកម្ពុជាវិញជាផ្លូវការហើយកាលពីថ្ងៃទី៥ ខែកុម្ភៈ ឆ្នាំ២០០៧នេះដោយមានការចេញទិដ្ឋាការបែបនេះជាលើកដំបូងដោយស្ថានទូតសហរដ្ឋអាមេរិកនៅក្រុងភ្នំពេញ ក្នុងរយៈពេលជាង៥ឆ្នាំកន្លងមកនេះ ។ អ្នកទទួលទិដ្ឋាការដំបូងនេះ គឺកញ្ញាស៊ុន ដាលីស ដោយកញ្ញាមានលក្ខណៈសម្បត្ដិគ្រប់គ្រាន់ក្នុងការទទួលបានថានៈជាជនអន្ដោប្រវេសន៍តាមរយៈពាក្យសុំរបស់ គូដណ្ដឹងនាងដែលជាពលរដ្ឋអាមេរិក ។ លោក Joseph A. Mussomeli ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជាបានប្រគល់ទិដ្ឋាការនោះដោយផ្ទាល់ដៃដល់កញ្ញាស៊ុនដាលីស ។
ការពិនិត្យសំរេចទិដ្ឋាការអន្ដោប្រវេសន៍ទៅរស់នៅសហរដ្ឋអាមេរិកសំរាប់ពលរដ្ឋខ្មែរត្រូវបានផ្ទេរទៅស្ថានទូតអាមេរិកនៅទីក្រុងបាងកកក្នុងខែធ្នូ ឆ្នាំ២០០១ ដោយសារមានបន្ទុកការងារច្រើនពេក ។ នៅពេលនោះការខ្វះខាតធនធានធ្វើអោយស្ថានទូតសហរដ្ឋអាមេរិកនៅក្រុងភ្នំពេញមិនអាចមានលទ្ធភាពទទួលពិនិត្យសំរេចករណីពាក្យសុំទិដ្ឋាការអន្ដោប្រវេសន៍ដែលចេះតែមានចំនួនកើនឡើងនោះបានទេ ។ ដោយសហរដ្ឋអាមេរិកបានបើកស្ថានទូតថ្មីរបស់ខ្លួននៅ ភ្នំពេញកាលពីខែមករា ឆ្នាំ២០០៦ ស្ថានទូតអាចធ្វើការពិនិត្យសំរេចពាក្យសុំទិដ្ឋាការនេះនៅក្រុងភ្នំពេញវិញបាន ដែលជាការបង្កអោយមានលក្ខណៈងាយស្រួល និងធ្វើអោយសេវាកាន់តែប្រសើរឡើងសំរាប់ជនជាតិខ្មែរដែលដាក់ពាក្យសុំ ។ មានឧបសគ្គផ្នែកភស្ដុភាជាច្រើនដែលត្រូវជំនះនៅក្នុងពេលប៉ុន្មានខែមុនដល់ការចាប់ផ្ដើមឡើងវិញនូវការពិនិត្យសំរេចទិដ្ឋាការអន្ដោប្រវេសន៍នៅក្រុងភ្នំពេញ ។ ការងារនោះរួមមានការជ្រើសរើសនិងបង្រៀនបុគ្គលិកខ្មែរថ្មីៗ និងការផ្ទេរការងារក្រដាសស្នាមចំនួនជាង៦ពាន់ករណីពីទីក្រុងបាងកកមកក្រុងភ្នំពេញវិញ ។
ដូចពេលមុនដែរការសំភាសន៍ជាមួយអ្នកដាក់ពាក្យសុំទិដ្ឋាការគូដណ្ដឹង ទិដ្ឋាការឆ្នោតផ្សងសំណាងទៅរស់នៅសហរដ្ឋអាមេរិក និងទិដ្ឋាការអន្ដោប្រវេសន៍ថ្មីៗទាំងអស់នឹងបន្ដធ្វើតែតាមការណាត់តែប៉ុណ្ណោះ ។ អ្នកដាក់ពាក្យសុំម្នាក់ៗនឹងត្រូវបានជំរាបអោយដឹងពីពេលវេលានៃការពិនិត្យសំរេចលើករណីរបស់គេ ។ ចូរចាំថា ផ្នែកកុងស៊ុលរបស់ស្ថានទូតមិនអាចទទួលឆ្លើយតបនឹងការសួរនាំនានារបស់អ្នក ដែលមកសួរនាំបានទេ ទាក់ទងនឹងទិដ្ឋាការគូដណ្ដឹង ទិដ្ឋាការឆ្នោតផ្សងសំណាងទៅរស់នៅសហរដ្ឋអាមេរិក និងទិដ្ឋាការអន្ដោប្រវេសន៍ ដែលកំពុងស្ថិតនៅក្នុងការរង់ចាំការពិនិត្យសំរេចនោះ ។
ពត៌មានដែលមាននៅក្នុងគេហទំព័ររបស់យើងៈ http://cambodia.usembassy.gov អាចឆ្លើយបានដោយងាយទៅ នឹងសំណួរភាគច្រើនរបស់លោកអ្នកហើយ ។ ពាក្យសួរនាំក៏អាចផ្ញើផងដែរទៅកាន់អ៊ីម៉េលថ្មីរបស់យើងតាមអាស័យដ្ឋាន visasphp@state.gov ។
អ្នកដាក់ពាក្យសុំទិដ្ឋាការអន្ដោប្រវេសន៍ ដែលបង្ហាញឯកសារមិនពិតឬក្លែងបន្លំក្នុងដំណើរពិនិត្យសំរេចទិដ្ឋាការអន្ដោប្រវេសន៍ អាចប្រឈមនឹងការចាប់ខ្លួននិងការកាត់ទោសព្រហ្មទណ្ឌ ។ ករណីដែលការរៀបអាពាហ៍ពិពាហ៍ត្រូវបានធ្វើឡើងដើម្បីគ្រាន់តែមានបំណងធ្វើអន្ដោប្រវេសន៍នឹងត្រូវបានស៊ើបអង្កេតស្រាវជ្រាវយ៉ាងដិតដល់ ។ អ្នកទាក់ទងយកកំរ៉ៃជើងសារឬឈ្មួញកណ្ដាលរត់ការសុំទិដ្ឋាការ ដែលទារលុយថ្លៃធ្វើការណាត់សំភាសន៍ ឯកសារផ្សេងៗ ការពិនិត្យសំរេចទិដ្ឋាការ ឬការចេញទិដ្ឋាការ មិនត្រូវបានអនុញ្ញាតិឡើយដោយស្ថានទូតអាមេរិក ។ ស្ថានទូតអាមេរិកធ្វើការពិចារណាការចោទប្រកាន់ស្ដីពីការបន្លំ ឬការធ្វើមិនត្រឹមត្រូវក្នុងការពិនិត្យសំរេចទិដ្ឋាការយ៉ាងហ្មត់ចត់បំផុត ។
សូមកត់សំគាល់ថា ការត្រឡប់មកធ្វើការពិនិត្យសំរេចលើពាក្យសុំទិដ្ឋាការអន្ដោប្រវេសន៍ នៅស្ថានទូតអាមេរិកនៅក្រុងភ្នំពេញមិនប៉ះពាល់ដល់ការផ្អាករបស់រដ្ឋាភិបាលសហរដ្ឋអាមេរិកលើការពិនិត្យសំរេចស្ដីពីទិដ្ឋាការអន្ដោប្រវេសន៍សំរាប់សុំកូនកំព្រា (IR3 និង IR4) ទេ ។ ផ្នែកកុងស៊ុលនៃស្ថានទូតអាមេរិកប្រចាំនៅក្រុងភ្នំពេញមិនអាចពិនិត្យសំរេចពាក្យសុំទិដ្ឋាការអន្ដោប្រវេសន៍សំរាប់សុំកូនកំព្រាទេ រហូតទាល់តែការផ្អាកនេះត្រូវបានលុបចោល ។
ចេញផ្សាយថ្ងៃទី៦ កុម្ភៈ ឆ្នាំ២០០៧
លោកស្រីភារធារី
ដំណឹងថ្មី
សុន្ទរកថា
សេចក្តីប្រកាសពត៌មាន
