សេចក្តីប្រកាសពត៌មាន
ស្ថានទូតសហរដ្ឋអាមេរិករំលឹកទិវាអន្តរជាតិស្តីពីសកម្មភាពសុខភាពស្រ្តី
ចេញថ្ងៃទី ២៨ ខែឧសភា ឆ្នាំ២០០៩
រដ្ឋាភិបាលសហរដ្ឋអាមេរិក មានការចាប់អារម្មណ៏យ៉ាងខ្លាំងនូវបញ្ហាសុខភាពរបស់ស្រ្តី ហើយសូមសរសើរដល់អង្គការសុខភាពទាំងអស់នៅក្នុងប្រទេសកម្ពុជា ដែលបានធ្វើការងារដើម្បីលើកកំពស់ សុខភាពស្រ្តីនៅក្នុងប្រទេសកម្ពុជា។
ទិវាអន្តរជាតិស្តីពីសកម្មភាពសុខភាពស្រ្តី ត្រូវបានបង្កើតឡើងក្នុងឆ្នាំ១៩៨៧ បន្ទាប់ពីជំនួបកំពូលនៃបណ្តាញសុខភាពពិភពលោកសំរាប់ស្រ្តីស្តីពីសិទ្ធិបន្តពូជ (WGNRR)ដែលបានប្រព្រឹត្តទៅនៅប្រទេសកូស្តារីកា។ WGNRR គឺជាបណ្តាញដែលមានអង្គការស្វ័យភាពនិងបុគ្គលជាសមាជិកចំនួន ២០០០ នៅក្នុងប្រទេសចំនួន១៥៧។ WGNRRបានរួមសហការធ្វើដៃគូរជាមួយរដ្ឋាភិបាលសហរដ្ឋអាមេរិក ដើម្បីអភិវឌ្ឍន៍និងរៀបចំកម្មវិធីផ្សេងៗដែលផ្តល់ផលប្រយោជន៍ដល់ស្រ្តីនៅជុំវិញពិភពលោក។
រដ្ឋាភិបាលសហរដ្ឋអាមេរិក តាមរយៈ USAID បានចូលរួមក្នុងកម្មវិធីទាក់ទងវិស័យសុខភាពជាច្រើននៅក្នុងប្រទេសកម្ពុជា។ យើងជឿជាក់ថាការផ្តល់អំណាចរួមដល់ស្ត្រីក្នុងការទទួលបានសេវាសុខភាព ជាការពង្រឹងដល់បុគ្គលនិងសមាជិកគ្រួសារ។ កម្មវិធីរបស់ USAID ត្រូវបាន ដាក់បញ្ចូលយ៉ាងដិតដល់និងក្របដណ្តប់លើវិស័យជាច្រើន ដូចជាការលើកកំពស់សុខភាពមាតា កុមារ និងសុខភាពបន្តពូជជាដើម។ កម្មវិធីទាំងនេះ ផ្តោតលើការការពារនិងព្យាបាលជំងឺ HIV/AIDS ក៏ដូចជាជំងឺឆ្លងផ្សេងៗទៀតមានជាអាទិ៍ ជំងឺរបេង ជំងឹគ្រុនផ្តាសាយមនុស្ស ផ្តាសាយបក្សី ជំងឺគ្រុនចាញ់ និងជំងឺគ្រុនឈាមផងដែរ។
ក្នុងរយៈពេលជាច្រើនឆ្នាំកន្លងមក រដ្ឋាភិបាលសហរដ្ឋអាមេរិក បានធ្វើការងារយ៉ាងសកម្ម ដើម្បី ស្តារឡើងវិញនូវសេវាសុខភាពរបស់ប្រទេសកម្ពុជា។ ក្នុងអតីតកាល អត្រាស្លាប់របស់មាតាក្នុងប្រទេស កម្ពុជា មានកំរិតខ្ពស់ក្នុងចំណោមប្រទេសនៅអាស៊ីភាគអគេ្នយ៏ ដែលអត្រាស្លាប់នេះមានចំនួនប្រមាណ ២០០០នាក់ ក្នុងមួយឆ្នាំៗ។
ដើម្បីឆ្លើយតបដល់អត្រាស្លាប់របស់មាតា មានឆ្មបប្រមាណ៦០០នាក់ ត្រូវបានបណ្តុះបណ្តាល ស្តីពីជំនាញសង្គ្រោះជីវិត ក្នុងឆ្នាំ២០០៥ ដែលចំនួននេះកើនឡើងពី៣២២នាក់ ក្នុងឆ្នាំ២០០២។ ជាលទ្ធផលមានការកើនឡើងនៃចំនួនអ្នកផ្តល់កំណើតដល់ទារក ដោយមានការចូលរួមពីបុគ្គលិកគ្រូពេទ្យ ដែលបានទទួលការបណ្តុះបណ្តាល ពីចំនួន៣២% ដល់់ ៤៤% ក្នុងឆ្នាំ២០០៥។ ក្នុងឆ្នាំ២០០៨ តាមរយៈការឧបត្ថម្ភរបស់រដ្ឋាភិបាលអាមេរិក ក្រុមបុគ្គលិកសុខភាពចំនួន ៣៩០០នាក់ ត្រូវបានបណ្តុះបណ្តាលក្នុងការថែរក្សាសុខភាពមាតានិងកុមារ។
រដ្ឋាភិបាលសហរដ្ឋអាមេរិកតាមរយៈ USAID បន្តបង្កើតកម្មវិធីរបស់ខ្លួន ក្នុងគោលបំណង ដើម្បីឆ្លើយតបនូវសេចក្តីត្រូវការរបស់ប្រជាជនកម្ពុជា នៅក្នុងតំបន់ជនបទនិងទីប្រជុំជន ដើម្បីធ្វើអោយ វិស័យសុខភាពកាន់តែប្រសើរឡើង។ យើងនាំយកការអំពាវនាវនាពេលនេះ "ឆ្ពោះទៅរកសកម្មភាព" ជាក់ស្តែង និងទន្ទឹងរង់ចាំធ្វើការរួមគ្នាជាមួយដៃគូរបស់យើង នៅក្នុងរាជរដ្ឋាភិបាលកម្ពុជា និងនៅក្នុងNGO ដើម្បីជួយដល់ស្រី្តនិងក្រុមគ្រួសាររបស់ពួកគេនៅក្នុងប្រទេសកម្ពុជា។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
