សេចក្តីប្រកាសព័ត៌មាន
សេចក្តីថ្លែងការរួមនៃកិច្ចប្រជុំថ្នាក់រដ្ឋមន្រ្តីការបរទេសសហរដ្ឋអាមេរិក និងប្រទេសក្នុងអនុតំបន់ទន្លេមេគង្គ
ចេញថ្ងៃទី ២៣ ខែកក្កដា ឆ្នាំ ២០០៩
ខាងក្រោមនេះគឺជាអត្ថបទនៃសេចក្តីថ្លែងការរួមដោយសហរដ្ឋអាមេរិក ប្រទេសកម្ពុជា ឡាវ ថៃ និងវៀតណាម ចេញថ្ងៃទី ២៣ ខែកក្កដា ឆ្នាំ ២០០៩ នៅភូកេត ប្រទេសថៃ។
រដ្ឋមន្ត្រីក្រសួងការបរទេសសហរដ្ឋអាមេរិក និងរដ្ឋមន្រ្តីក្រសួងការបរទេសនៃប្រទេសក្នុងអនុតំបន់ទន្លេមេគង្គ ដែលមានប្រទេសកម្ពុជា ឡាវ ថៃ និងវៀតណាម បានបើកការប្រជុំថ្នាក់រដ្ឋមន្រ្តីជាលើកដំបូងរវាងសហរដ្ឋអាមេរិកនិងប្រទេសនៅក្នុងអនុតំបន់ទន្លេមេគង្គ ថ្ងៃនេះ នៅភូកេត ប្រទេសថៃ ដើម្បីពិភាក្សាបញ្ហាជាប្រយោជន៍រួម ពិសេសក្នុងវិស័យបរិស្ថាន សុខាភិបាល ការសិក្សាអប់រំ និងការអភិវឌ្ឍហេដ្ឋារចនាសម្ព័ន្ធ។
លោកស្រីរដ្ឋមន្រ្តីការបរទេសអាមេរិក Hillary Clinton បានគូសបញ្ជាក់ពីសារៈសំខាន់នៃអនុតំបន់ទន្លេមេគង្គ និងប្រទេសមួយៗក្នុងតំបន់នេះ ចំពោះសហរដ្ឋអាមេរិក និងការប្តេជ្ញារបស់ប្រទេសអាមេរិក ក្នុងការលើកស្ទួយសន្តិភាព និងវិបុលភាព នៅក្នុងតំបន់ប្រទេសអាស៊ានទាំងមូល។ រដ្ឋមន្រ្តីមកពីប្រទេសកម្ពុជា ឡាវ ថៃ និងវៀតណាមបានស្វាគមន៍កិច្ចសហប្រតិបតិ្តការជិតស្និទ្ធរបស់សហរដ្ឋអាមេរិកជាមួយនឹងប្រទេសក្នុងអនុតំបន់ទន្លេមេគង្គ លើបញ្ហដែលមានសារៈសំខាន់សំរាប់តំបន់ និងមានអត្ថប្រយោជន៍ទៅវិញទៅមក ដើម្បីធ្វើអោយមានវិបុលភាព និងការអភិវឌ្ឍន៍ប្រកបដោយនិរន្តភាព នៅក្នុងតំបន់ទន្លេមេគង្គ។
បណ្តារដ្ឋមន្រ្តីទាំងនោះបានពិភាក្សាពីអាទិភាពរួម រួមទាំងការស្វែងយល់ពីផលប៉ះពាល់នៃការប្រែប្រួលអាកាសធាតុ និងវិធីធ្វើការឆ្លើយតបអោយមានប្រសិទ្ធិភាព ការប្រយុទ្ធប្រឆាំងនឹងជំងឺឆ្លង ការពង្រីកការប្រើប្រាស់បច្ចេកវិទ្យាសំរាប់ការសិក្សាអប់រំ និងការអភិវឌ្ឍន៍ ពិសេសនៅតាមតំបន់ជនបទ រួមទាំងការអភិវឌ្ឍហេដ្ឋារចនាសម្ព័ន្ធ។
រដ្ឋមន្រ្តីទាំងនោះបានពិនិត្យមើលការខិតខំរួមគ្នាជាបន្ត ក្នុងវិស័យទាំងនេះ ហើយបានព្រមព្រៀងគ្នាស្វែងយល់វិស័យធ្វើសហប្រតិបត្តិការថ្មីៗទៀត។ ជាពិសេស រដ្ឋមន្រ្តីទាំងនោះបានស្វាគមន៍គំនិតផ្តួចផ្តើមរបស់គណកម្មាការទេន្លមេគង្គ និងគណកម្មាការទេន្លេ Mississippi ក្នុងការបង្កើតដៃគូ “ទន្លេសម្ព័ន្ធមេត្រី” ដើម្បីចែករំលែកឯកទេសនិងការប្រតិបត្តិល្អៗ ក្នុងវិស័យនានា ដូចជាការសំរបសំរួលទៅនឹងការប្រែប្រួលអាកាសធាតុ ការគ្រប់គ្រងទឹកជំនន់និងការរាំងស្ងួត ទំនប់វារីអគ្គិសនី និងការសិក្សាពីផលប៉ះពាល់របស់វា តំរូវការទឹកនិងសន្តិសុខស្បៀង ការគ្រប់គ្រងធនធានទឹក និងកង្វល់រួមផ្សេងៗទៀត។
រដ្ឋមន្រ្តីទាំងនោះបានយល់ស្របគ្នាថា អ្នកឯកទេស និងមន្រ្តីជាន់ខ្ពស់នឹងធ្វើការពិភាក្សាពីសកម្មភាពនិមួយៗ សំរាប់ធ្វើសហប្រតិបតិ្តការ និងការងារជាបន្ត។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
