សេចក្តីប្រកាសព័ត៌មាន
សន្និសីទកាសែតរបស់លោកសមាជិកព្រឹទ្ធសភាអាមេរិក Jim Webb
ស្ថានទូតអាមេរិកនៅទីក្រុងភ្នំពេញមានសេចក្តីរីករាយសូមប្រកាសថា លោកព្រឹទ្ធសមាជិកសភាអាមេរិក Jim Webb នឹងអញ្ជើញមកបំពេញទស្សនកិច្ចនៅប្រទេសកម្ពុជានៅថ្ងៃទី ១៨ ខែសីហា ឆ្នាំ ២០០៩ ដែលជា ផ្នែកមួយនៃដំណើរទស្សនកិច្ចជាផ្លូវការរបស់លោកមកកាន់ប្រទេសចំនួន ៥ នៅក្នុងតំបន់។
នៅប្រទេសកម្ពុជា លោកព្រឹទ្ធសមាជិក Webb នឹងជួបជាមួយមន្រ្តីជាន់ខ្ពស់នៃរាជរដ្ឋាភិបាលកម្ពុជា។
លោកព្រឹទ្ធសមាជិក Webb នឹងធ្វើសន្និសីទកាសែតមួយ នៅថ្ងៃអង្គារ ទី ១៨ ខែសីហា ឆ្នាំ ២០០៩ វេលា ម៉ោង ៣:២៥ រសៀល នៅនិវេសដ្ឋានឯកអគ្គរដ្ឋទូតអាមេរិក។
លោក Webb មានទំនាក់ទំនងផ្ទាល់ខ្លួនជាបន្តបន្ទាប់ក្នុងកិច្ចការតំបន់អាស៊ីនិងប៉ាស៊ីហ្វិកអស់រយៈពេលយ៉ាងយូរ មុនពេលនៃការបំរើកិច្ចការរបស់លោកក្នុងព្រឹទ្ធសភាអាមេរិក។ បន្ថែមលើដំណើរទស្សនកិច្ចក្នុងពេលថ្មីៗរបស់លោក ក្នុងនាមជាសមាជិកនៃគណកម្មាធិការកិច្ចការបរទេសរបស់ព្រឹទ្ធសភា លោក Webb បានធ្វើការ និងបានធ្វើដំណើរ នៅទូទាំងតំបន់ដ៏ធំនេះ រាប់ពីកោះមីក្រូណេស៊ី ដល់ប្រទេសភូមា ហើយអស់រយៈពេលជិត ៤ ទសវត្ស លោកបានបំរើការងារជានាយទាហានកងម៉ារីន អ្នករៀបចំផែនការការពារប្រទេស អ្នកសារព័ត៌មាន អ្នកតែងរឿងប្រលោមលោក ជាមន្រ្តីទទួលខុសត្រូវក្នុងក្រសួងការពារប្រទេសអាមេរិក និងទីប្រឹក្សាពាណិជ្ជកម្ម ផងដែរ។
លោក Webb បានបំរើជាទាហានម៉ារីនជើងគោក នៅប្រទេសវៀតណាម ហើយក្រោយមកគឺជាឧបការីរដ្ឋមន្រ្តីក្រសួងការពារប្រទេស និងជាលេខាធិការកងទ័ពជើងទឹកនៅមន្ទីរបញ្ចកោណសអាមេរិក។ លោកក៏ធ្លាប់ធ្វើ ផងដែរ ជាអ្នកធ្វើផែនការយោធាសំរាប់តំបន់អាស៊ីប៉ាស៊ីហ្វិក ប្រចាំនៅកោះ Guam ហើយបានសរសេរឯកសារ ជាច្រើនស្តីពីបញ្ហាថ្នាក់មូលដ្ឋាន ថ្នាក់ជាតិ និងបញ្ហាអន្តរជាតិ នៅប្រទេសជប៉ុន ថៃ វៀតណាម និងប្រទេស ហ្វីលីពីន ហើយក្នុងទសវត្សទី ១៩៩០ លោកបានធ្វើជាទីប្រឹក្សាអោយក្រុមហ៊ុន ដែលចង់ធ្វើជំនួញក្នុងប្រទេសវៀត ណាមផងដែរ។ លោកបានបំរើការក្នុងគណកម្មាធិការកិច្ចការបរទេសរបស់ព្រឹទ្ធសភា តាំងពីលោកបានចូលបំរើការក្នុងព្រឹទ្ធសភាអាមេរិក នៅខែមករា ឆ្នាំ ២០០៧ មក។
ក្នុងនាមជាប្រធានអនុគណកម្មាធិការកិច្ចការតំបន់អាស៊ីខាងកើត និងប៉ាស៊ីហ្វិក លោក Web ទទួលខុសត្រូវលើទំនាក់ទំនងរបស់សហរដ្ឋអាមេរិកជាមួយបណ្តាប្រទេសនៅតំបន់អាស៊ីខាងកើត អាស៊ីអាគ្នេយ៍ តំបន់ជុំវិញមហាសមុទ្រប៉ាស៊ីហ្វិក និងអូសេអានី។ អនុគណកម្មាធិការនេះក៏ទទួលខុសត្រូវផងដែរលើបណ្តាអង្គការនៅក្នុងតំបន់ ដូចជាសមាគមប្រជាជាតិក្នុងតំបន់អាស៊ីអាគ្នេយ៍ (អាស៊ាន) និងប្រទេសក្នុងកិច្ចសហប្រតិបតិ្តការសេដ្ឋកិច្ចនៃតំបន់អាស៊ីនិងប៉ាស៊ីហ្វិក(APEC)។ ចំពោះព័ត៌មានបន្ថែម សូមទាក់ទង ផ្នែកកិច្ចការសាធារណៈតាមទូរស័ព្ទ លេខ ០២៣ ៧២៨ ២៥៨ ឬអ៊ីម៉េលមក ChreaV@state.gov ។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
