សេចក្តីប្រកាសព័ត៌មាន
ក្រសួងការងារសហរដ្ឋអាមេរិកចេញ “បញ្ជីនៃផលិតផល ដែលផលិតដោយប្រើពលកម្មកុមារ និងពលកម្មដោយការបង្ខិតបង្ខំ”
ចេញថ្ងៃទី ១១ ខែកញ្ញា ឆ្នាំ ២០០៩
ការិយាល័យកិច្ចការពលកម្មអន្តជាតិ របស់ក្រសួងការងារសហរដ្ឋអាមេរិកបានចេញរបាយការណ៍ចំនួន បីស្តីពីពលកម្មកុមារ និងពលកម្មដោយការបង្ខិតបង្ខំ នៅតាមប្រទេសនានា ជុំវិញពិភពលោក នៅថ្ងៃទី ១០ ខែកញ្ញា។ ឯកសារនេះរួមមាន “បញ្ជីដំបូងៗនៃផលិតផល ដែលផលិតដោយពលកម្មកុមារ ឬពលកម្មដោយការបង្ខិតបង្ខំ” ដែលទាមទារដោយច្បាប់ឆ្នាំ ២០០៥ ស្តីពីការផ្តល់សិទ្ធិអំណាចឡើងវិញដល់ការការពារជនរងគ្រោះដោយការជួញដូរ (Trafficking Victims Protection Reauthorization Act of 2005 ឬ TVPRA) ។
បញ្ជីដែលទាមទារដោយច្បាប់ TVPRA មាននិយាយលំអិតស្តីពីមុខទំនិញចំនួន ១២២ របស់ប្រទេសចំនួន ៥៨ ដែលការិយាល័យកិច្ចការពលកម្មអន្តរជាតិរបស់ក្រសួងការងារអាមេរិកមានហេតុផលជឿថា ត្រូវបានផលិតដោយប្រើពលកម្មដោយការបង្ខិតបង្ខំ ពលកម្មកុមារ ឬទាំងពលកម្មកុមារ ទាំងពលកម្មដោយការបង្ខិតបង្ខំ ដោយរំលោភលើបទដ្ឋានអន្តរជាតិ។ ការិយាល័យកិច្ចការពលកម្មអន្តរជាតិរបស់ក្រសួងការងារអាមេរិកថែមទាំងបានចេញព័ត៌មានថ្មីៗតាមការស្នើសុំ ទៅក្នុង "បញ្ជីនៃផលិតផល ដែលផលិតដោយពលកម្មកុមារដោយការបង្ខិតបង្ខំ ឬតាមកិច្ចព្រមព្រៀងជាកុងត្រា” (បញ្ជី EO) និង “លទ្ធផលរកឃើញប្រចាំឆ្នាំរបស់ខ្លួនស្តីពីទំរង់ធ្ងន់ធ្ងរបំផុតនៃពលកម្មកុមារ” ដូចដែលតំរូវដោយច្បាប់អភិវឌ្ឍន៍និងពាណិជ្ជកម្ម ឆ្នាំ ២០០០ (Trade and Development Act of 2000) ស្តីពីការខិតខំរបស់ដែនដី និងប្រទេសចំនួន ១៤១ ដើម្បីប្រយុទ្ធប្រឆាំងនឹងការកេងប្រវ័ញ្ជពលកម្មកុមារ។
គោលបំណងចំបងនៃបញ្ជី TVPRA គឺដើម្បីលើកកំពស់ការយល់ដឹងរបស់សាធារណជន លើករណីពលកម្មកុមារ និងពលកម្មដោយការបង្ខិតបង្ខំ ក្នុងការផលិតទំនិញ នៅតាមប្រទេសដែលមានក្នុងបញ្ជី និងដើម្បីជំរុញការខិតខំក្នុងការលុបបំបាត់ការប្រព្រឹត្តបែបនេះ។
របាយកាណ៍នេះលើកឡើងនូវរបស់ចំនួន ៤ មុខ នៅកម្ពុជា ដែលត្រូវបានសង្ស័យថា ត្រូវបានផលិតឡើងតាមរយៈការប្រើពលកម្មកុមារ គឺអិដ្ឋក្បឿង បង្គា កៅស៊ូ និងអំបិល។ សហរដ្ឋអាមេរិកមានការទាក់ទងយ៉ាងសកម្មជាមួយរាជរដ្ឋាភិបាលកម្ពុជា ក្នុងការខិតខំដើម្បីកាត់បន្ថយការប្រើពលកម្មកុមារ នៅតាមកន្លែងទាំងនេះ និងក្នុងសេដ្ឋកិច្ចទាំងមូល។ រាជរដ្ឋាភិបាលកម្ពុជាបានធ្វើអោយមានភាពជឿនលឿនមកហើយក្នុងរឿងនេះ ដូចជាបានតាក់តែងផែនការសកម្មភាពថ្នាក់ជាតិមួយស្តីពីទំរង់ធ្ងន់ធ្ងរបំផុតនៃពលកម្មកុមារ (ឆ្នាំ ២០០៨ - ២០១២)។ ផែនការសកម្មភាពនេះមានបំណងកាត់បន្ថយចំនួនកុមារស្ថិតក្នុងអាយុ ពី ៥ ទៅ ១៧ ឆ្នាំ ដែលកំពុងធ្វើការនៅប្រទេសកម្ពុជា អោយនៅត្រឹមចំនួន ១០,៦% ក្នុងឆ្នាំ ២០១០ និងនៅត្រឹមចំនួន ៨% ត្រឹមឆ្នាំ ២០១៥។ រាជរដ្ឋាភិបាលកម្ពុជាក៏បានចូលរួមផងដែរក្នុងកម្មវិធីមួយចំនួន ដែលដឹកនាំដោយសហរដ្ឋអាមេរិក ដើម្បីបញ្ជប់ទំរង់ធ្ងន់ធ្ងរបំផុតនៃពលកម្មកុមារ នៅតាមវិស័យ ដូចដែលមាននិយាយក្នុងរបាយការណ៍នេះ ដែលចេញដោយក្រសួងការងារសហរដ្ឋអាមេរិក។
សហរដ្ឋអាមេរិកសង្ឃឹមថា កិច្ចសហប្រតិបតិ្តការជាបន្តក្នុងរឿងនេះ នៅទីបំផុត នឹងធ្វើអោយលែងមានការប្រើពលកម្មកុមារ នៅប្រទេសកម្ពុជា ហើយសង្ឃឹមថា នឹងមានការកាត់បន្ថយក្នុងគ្រប់ទំរង់ទាំងអស់នៃការកេងប្រវ័ញ្ច និងការជួញដូរមនុស្ស។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
