លោកភារធារី Theodore Allegra បានថ្លែងពីបញ្ហាសេរីភាពក្នុងការនិយាយស្តីនៅទិវាសេរីភាពសារព័ត៌មានពិភពលោក
ភ្នំពេញ
ថ្ងៃទី ៤ ឧសភា ឆ្នាំ ២០០៩
 |
លោកភារធារី Theodore Allegra ចូលរួមក្នុង
ទិវាសេរីភាពសារព័ត៌មានពិភពលោក។ រូបពង្រីក |
លោកភារធារី Theodore Allegra បានចូលរួមក្នុងពីធីមួយរៀបចំដោយការិយាល័យអង្គការ UNESCO នៅកម្ពុជា និងគណៈកម្មាធិការអ្នកកាសែតកម្ពុជា ដោយមានបំណងអបអរទិវាសេរីភាពសារព័ត៌មានពិភពលោក ឆ្នាំ ២០០៩។ ពិធីនោះចូលរួមដោយលោករដ្ឋមន្រ្តីក្រសួងព័ត៌មាន ខៀវ កាញារីទ្ធ មន្រ្តីមកពីសហគមន៍អន្តរជាតិ ព្រមទាំងអ្នកសារព័ត៌មានក្នុងស្រុកចំនួនជាង ១០០ នាក់។ នៅក្នុងសុន្ទរកថារបស់លោក លោកភារធារីបានសង្កត់ធ្ងន់ពីសារៈសំខាន់នៃប្រព័ន្ធផ្សព្វផ្សាយឯករាជ្យ នៅក្នុងដំណើរការប្រជាធិបតេយ្យនិងក្នុងការពិភាក្សាគ្នា ក្នុងចំណោមមនុស្ស ដែលមានវប្បធម៌ខុសៗគ្នា។ លោកក៏បានកត់សំគាល់ផងដែរថា ថ្វីបើប្រទេសកម្ពុជាមានមូលដ្ឋានច្បាប់រឹងមាំសំរាប់សេរីភាពក្នុងការនិយាយស្តី និងសេរីភាពសារព័ត៌មាន ក៏ស្ថានទូតអាមេរិកនិងដៃគូរបស់ខ្លួនក្នុងសហគមន៍នៃអង្គការមិនមែនរដ្ឋាភិបាលនៅតែបន្តធ្វើការជាមួយរាជរដ្ឋាភិបាល ទាក់ទងនឹងការអនុវត្តច្បាប់ទាំងនេះ ស្តីពីប្រព័ន្ធផ្សព្វផ្សាយព័ត៌មាន។
ទិវាសេរីភាពសារព័ត៌មានត្រូវបានអបអររាល់ឆ្នាំ នៅទូទាំងពិភពលោក នៅថ្ងៃទី ៣ ខែឧសភា។ វាជាឱកាសត្រូវអបអរសាទរគោលការណ៍ជាសារវ័ន្តនៃសេរីភាពសារព័ត៌មាន វាយតំលៃសេរីភាពសារព័ត៌មាន និងការពារប្រព័ន្ធផ្សព្វផ្សាយព័ត៌មានពីការវាយប្រហារលើឯកភាពនៃប្រព័ន្ធនេះ ហើយសំដែងការដឹងគុណចំពោះអ្នកសារព័ត៌មាន ដែលបានបាត់បង់ជីវិត ក្នុងពេលបំពេញភារកិច្ច។
មហាសន្និបាតរបស់អង្គការសហប្រជាជាតិបានប្រកាសអោយមានទិវាសេរីភាពសារព័ត៌មានពិភពលោក នៅក្នុងឆ្នាំ ១៩៩៣ តាមអនុសាសន៍ដែលត្រូវបានកំណត់ធ្វើតាម នៅក្នុងសម័យប្រជុំទី ២៦ នៃសន្និបាតរបស់អង្គការ UNESCO ក្នុងឆ្នាំ ១៩៩១។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
