សន្សំទឹក
 |
| ស្លាកនិយមការពារបរិស្ថាន |
មើលពីអវកាសមក ផែនដីមានពណ៌ខៀវ ពីព្រោះផ្ទៃរបស់វាចំនួន ៧០% គ្របដណ្តប់ដោយទឹក។ តែ ៩៧,៥% នៃទឹកនៅលើផែនដីគឺជាទឹកប្រៃ ដូច្នេះទឺកសាបមានតែ ២,៥% តែប៉ុណ្ណោះ។ ក្នុងបរិមាណទឹកចំនួន ២,៥% នេះ ជិត ៧០% ស្ថិតក្នុងទឹកកក នៅប៉ូលខាងត្បូងនិងប៉ូលខាងជើង ហើយ ៣០% ស្ថិតនៅក្រោមដីជ្រៅ។ មានតែ ០,៤% ទេ ដែលមាននៅលើផ្ទៃដី។
ទឹកគឺជាធនធានដែលមានកំណត់។ មានការដេញដោលគ្នាច្រើនក្នុងចំណោមអ្នកវិទ្យាសាស្រ្ត ថាតើទឹកនៅលើផែនដីបានមកពីផ្កាយដុះកន្ទុយ ផ្កាយព្រះគ្រោះ ឬបានមកពីផ្នែកខាងក្នុងនៃផែនដីតាមភ្នំភ្លើងផ្ទុះ តែយើងដឹងថាបរិមាណទឹកមានកំណត់។ ផែនដីមិនផលិតទឹកបន្ថែមទៀតនោះទេ។ ម៉ូលេគុលទឹកនៅក្នុងខ្លួនយើងសព្វថ្ងៃនេះអាចស្ថិតនៅក្នុងខ្លួនរបស់សត្វឌីណូស័រ អាចហូរតាមទន្លេមេគង្គ ឬអាចស្ថិតនៅក្នុងពពកកាលពីសប្តាហ៍មុន។
ក្នុងពេល ៥០ ឆ្នាំទៀត មនុស្សលោកជាងពាក់កណ្តាលនឹងរស់នៅដោយមានការខ្វះទឹក។ នៅត្រឹមឆ្នាំ ២០៥០ មនុស្សជំនួន ៤ ពាន់លាននាក់នឹងមានការខ្វះទឹកធ្ងន់ធ្ងរ។
កំណើននៃការបំពុលកំពុងតែបំផ្លាញប្រព័ន្ធអេកូឡូស៊ី សុខភាព ជីវិត និងមុខរបរចិញ្ចឹមជីវិតរបស់អ្នកដែលមិនមានទឹកស្អាតគ្រប់គ្រាន់ ហើយនិងអនាម័យជាមូលដ្ឋាន។
ប្រទេសដែលមានទឺកសាបប្រើប្រាស់តិចជាងគេគិតតាមមនុស្សម្នាក់ៗ (ទឹកនៅលើដី និងនៅក្រោមដី) គឺប្រទេសគុយវេត អារ៉ាប់រួម បាហាម៉ា កាតា ម៉ាល់ឌីវ លីប៊ី អារ៉ាប៊ីសាអ៊ូឌីត ម៉ាល់តា សឹង្ហបូរី និងប្រទេសស្ហកដង់។
សំរាប់ប្រទេសជាច្រើន កសិកម្មប្រើប្រាស់ទឹកសាបច្រើនជាងគេ ចំណែកនៅសហរដ្ឋអាមេរិកវិញ ទឹកសាបត្រូវបានប្រើប្រាស់ក្នុងកំរិតភាគរយច្រើននៅតាមផ្ទះ សំរាប់រោងចក្រ ពាណិជ្ជកម្ម និងការប្រើប្រាស់ផ្សេងទៀត។ ទឹកសាបក្នុងកំរិតភាគរយតិចទេដែលបាត់ទៅវិញតាមការហួត ការជ្រាបចេញ ឬត្រូវបានប្រើក្នុងផលិតផល ឬដំណាំ សល់ពីនេះ គឺត្រូវបានប្រើប្រាស់ ហើយបង្ហូរចូលក្នុងស្ទឹងទន្លេបឹងបួរ។ ការធ្វើដូច្នេះច្រើនតែនាំអោយមានការបំពុលទឹក នៅតាមផ្លូវទឹក ដោយវានាំអោយមានបាក់តេរី ជាតិអាហ្សូត ជាតិលោហៈ និងសារធាតុពុលដទៃទៀត។
ថ្វីបើប្រជាជនពិភពលោកមានកំណើនបីដង ក្នុងសតវត្សទី ២០ តែការប្រើប្រាស់ទឹកមានកំណើន ៦ ដង។ កំណើននៃការប្រើប្រាស់ទឹកនេះមានន័យថាកំណើននៃការចំណាយលើការប្រតិបតិ្តនិងថែទាំ។ វាក៏មានន័យថាកំណើននៃតំរូវការកន្លែងផ្គត់ផ្គង់និងបន្សុទ្ធកាកសំណល់ទឹក នៅតាមតំបន់ក្រុង។ ដើម្បីជួយបន្ធូរបន្ថយតំរូវការដែលចេះតែមានកំណើនច្រើនឡើងនៃការផ្គត់ផ្គង់ទឹកសាប គេចាំបាច់ត្រូវរកមើលប្រភពផ្សេង និងបច្ចេកទេសសន្សំទឺក ដែលងាយយកមកប្រើ (From OBO Green Guide) ។
ដើម្បីរួមចំណែកធ្វើអោយផែនដីរបស់យើងមានបរិស្ថានល្អ និងធ្វើអោយធនធានទឹករបស់យើងនៅស្ថិតស្ថេរ អ្នកគួរកាត់បន្ថយបរិមាណទឹកដែលអ្នកប្រើប្រាស់រាល់ថ្ងៃ ដោយ៖
បិទក្បាលរ៉ូប៊ីណេទឹក នៅពេលដុសធ្មេញ លុបមុខ ឬកោរពុកមាត់។
បើកទឹកផ្កាឈូកកុំអោយខ្លាំង ឬសំរួលវា ដើម្បីកុំអោយខ្ជះខ្ជាយទឹកនៅពេលមុជទឹក។
ប្រើសាប៊ូនិងទឹកក្នុងបរិមាណសមស្រប នៅពេលបោកគក់។ ការប្រើសាប៊ូច្រើននាំអោយត្រូវការទឹកច្រើនដើម្បីលាងសំអាតវា។ ត្រូវសំរួលម៉ាស៊ីនបោកគក់អោយត្រូវតាមបរិមាណខោអាវ..ដែលដាក់ចូល។
ប្រើក្រណាត់បោសសំអាតឡានរបស់អ្នកសិន មុននឹងប្រើទឹកលាង។
កុំបំពុលប្រភពទឹករបស់យើង ដូចជាទន្លេ បឹង អូរ។
កុំចោលសំរាម (ដូចជាកំប៉ុងស្រាបៀ) ចូលទៅក្នុងទឹក ពេលធ្វើដំណើរតាមទឹក។
កុំចោលសំរាមឬកំទេចកំទីចូលក្នុងទន្លេឬបឹង បើអ្នករស់នៅក្បែរតំបន់ទាំងនេះ។
ក្រៅពីទឹកម៉ាស៊ីន ចូររកមើលប្រភពផ្គត់ផ្គង់ទឹកផ្សេងទៀត។ ចូរត្រងទឹកភ្លៀងនៅរដូវភ្លៀង សំរាប់ស្រោចដំណាំ និងលាងឡានរបស់អ្នក។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
