ឯកអគ្គរដ្ឋទូត​ទស្សនា​​អង្គការ​​ប្រឆាំង​​​ការ​ជួញ​ដូរ នៅ​​ក្រុងព្រះ​​សីហនុ

ក្រុងព្រះ​​សីហនុ​
ថ្ងៃទី ២០​-២២ កក្កដា ២០០៩

ឯកអគ្គរដ្ឋទូត Rodley ស្តាប់​ប្រធាន​អង្គការ​APLE និយាយពី​សកម្មភាព​នៃ​អង្គការ​របស់​លោក ជាមួយ​អ្នក​សារព័ត៌មាន ។ រូបពង្រីក

លោកស្រីឯកអគ្គរដ្ឋទូត Carol A. Rodley បាន​សំដែង​កង្វល់​ចំពោះ​ការជួញ​ដូរមនុស្ស ក្នុង​ដំណើរ​ទស្សនកិច្ច​របស់លោក​ស្រីទៅកាន់​ខេត្តព្រះ​សីហនុ ពីថ្ងៃទី ២០ ដល់​ថ្ងៃទី ២២ ខែកក្កដា។ ដោយ​ស្ថិតនៅ​ជាប់​ឆ្នេរ​ភាគនិរតីនៃ​ប្រទេស​កម្ពុជា វាលខ្សាច់​ដ៏ល្អនៃ​ក្រុងព្រះ​សីហនុ​បានទាក់​ទាញ​ទេសចរ​ជាតិ និង​អន្តរជាតិ​។ ជា​អកុសល ឋានសួគ៌​នៅតាម​ឆ្នេរសមុទ្រ​កាន់តែ​មានគ្រោះ​ថ្នាក់ច្រើន​ឡើងសំរាប់​កុមារនិង​​យុវវ័យ​ក្នុង​ស្រុក ពីព្រោះ​ពួកគេជា​ច្រើនហាក់​នៅវិលវុល​ក្នុងស្ថាន​ភាពនៃ​ភាព​​ក្រីក្រ និង​ការ​ជួញ​ដូរ​មនុស្ស។
លោកស្រីឯកអគ្គរដ្ឋទូតបាន​ជួបជា​មួយលោក​ស្បោង សារ៉ាត់ អភិបាល​ខេត្តព្រះ​សីហនុ ហើយ​បាន​ទស្សនា​អង្គការ​ប្រឆាំង​នឹងការ​ជួញដូរ និង​មិនស្វែង​រកផល​ចំណេញ​មួយចំនួន នៅ​ខេត្តព្រះ​សីហនុ ដើម្បី​សំដែង​កង្វល់​របស់​លោកស្រី​ចំពោះ​ការជួញ​ដូរមនុស្ស និង​របាយការណ៍​ដែលថា “ឪពុក​ម្តាយខ្លះ​ស្ម័គ្រចិត្ត​លក់កូន​រ​បស់គេ ទៅ​អោយ​ជនល្មើស ដើម្បី​ប្រាក់របស់​ជនប្រព្រឹត្ត​អាណាចារ​លើកុមារ។”

ក្នុងការប្រជុំរបស់លោក​ស្រីជា​មួយ​លោក​អភិបាល លោក​ស្រីឯក​អគ្គរដ្ឋ​ទូត Carol A. Rodley បាន​សុំ​អោយ​អាជ្ញាធរ​ខេត្តបង្កើន​សកម្មភាព និង “ការខិត​ខំការពារ​ការ​ជួញដូរ​មនុស្ស​ពីគ្រួសារ​នានា។”

លោកស្រី​ឯកអគ្គ​រដ្ឋទូត Carol A. Rodley បានធ្វើ​ការកត់​សំគាល់​ថា ការខិត​ខំនៅថ្នាក់​លើប្រឆាំង​នឹងការ​ជួញដូរ​មនុស្ស​មានភាព​ប្រសើរជាង​មុនច្រើន តែនៅ​ខេត្តព្រះ​សីហនុ មាន​ការចាប់អារម្មណ៍​ខ្លាំងលើ​ករណី​​ជន​ល្មើស​មកពី​ប្រទេស​លោកខាង​លិច ហើយ​កាលពី​ឆ្នាំទៅ តុលា​ការបាន​ដាក់ទោស​ដល់ជន​បរទេសខ្លះ​ដែល​បាន​​ប្រព្រឹត្តអំពើ​អាណាចារលើ​កុមារ។ រដ្ឋាភិបាល​អាមេរិក​សូមអប​អរសាទរ​ការខិត​ខំទាំង​នេះ ក្នុង​ការ​បង្ក្រាប​​​ការជួញ​ដូរផ្លូវភេទ​លើកុមារ។

លោកស្រីឯកអគ្គរដ្ឋទូត​បានធានា​ចំពោះ​លោកអភិបាល​ស្បោង សារាតពីឆន្ទៈ​របស់​សហ​រដ្ឋអាមេ​រិកក្នុង​ការ​ធ្វើជា​ដៃគូ​ជាមួយ​កម្ពុជា ក្នុងការ​ប្រយុទ្ធ​ប្រឆាំង​នឹងបញ្ហា​ជាសាកល​នៃការ​ជួញ​ដូរមនុស្ស។ លោក​ស្រីបាន​មាន​ប្រសាសន៍​ថា “យើង​ស្វាគមន៍​ឱកាស​ធ្វើការ​ជាមួយ​គ្នា និង​ជួយរាជ​រដ្ឋាភិ​បាល​កម្ពុជា ហើយ​សង្ឃឹម​ថា នឹងបន្ត​ទំនាក់​ទំនងវិជ្ជ​មានមួយ ក្នុង​ការលុប​បំបាត់​ការជួញ​ដូរមនុស្ស​នៅ​កម្ពុជា។”
ក្នុងដំណើរទស្សន​កិច្ចរបស់​លោកស្រី លោក​ស្រីឯកអគ្គ​រដ្ឋទូត Rodley ក៏បាន​ជួបផង​ដែរជាមួយ​នឹង​អង្គការ​មិនមែន​រដ្ឋាភិបាល​នានា ដូចជា​សមាគមអាដ​ហុក អង្គការ​សកម្មភាព​ដើម្បី​កុមារ (APLE) និង​អង្គការ​​ម្លប់​តា​ប៉ាង។

ក្នុងពេលចុះទៅ​សមាគម​អាដហុក ដែលជា​អង្គការ​ជួយ​សាធារណ​ជនទាក់​ទងនឹង​សិទ្ធិ​ដីធ្លី អំពើ​ហឹង្សា​ក្នុង​គ្រួសារ និង​ការរំលោភ​ផ្លូវភេទ លោក​ស្រីឯក​អគ្គរដ្ឋទូត Rodley បាន​ជួប លោក​ស្រីជាប សុធារី អ្នក​សំរប​សំរួល​​ប្រចាំ​ខេត្ត និង​បុគ្គលិក​អង្គការ។​លោក​ស្រីបាន​ស្តាប់​ការរៀប​រាប់ពី​ស្ថាន​ភាព​សិទ្ធិមនុស្ស​​នៅក្នុង​​ខេត្ត។

ក្រៅពីនេះ លោក​ស្រីបាន​ត្រូវជំរាប​និង​បានណែ​នាំបង្ហាញ​ពីលោក​សិលា សំលៀង ប្រធាន​អង្គការ APLE និង​អ្នកសំរប​សំរួល​របស់អង្គការ​នេះ ស្តីពី​ការងារ​របស់គេ​ដើម្បីការ​ពារកុមារ នៅ​ខេត្តព្រះ​សីហនុ ពីការ​រំលោភ​ផ្លូវភេទ​ក្នុង​គ្រប់ទំរង់​ទាំងអស់។ អង្គការ APLE ផ្តោត​ការងារ​ទៅលើ​ការរកជន​ប្រព្រឹត្ត​អាណា​ចារ​​បរទេស​លើ​កុមារ និង​រារាំងមិន​អោយ​មានការ​បន្តការ​រំលោភ​លើកុមារ តាម​រយៈការ​ងារតាម​ដាន​ដោយ​​លាក់​​កំបាំង។ ដោយ​ធ្វើការ​ជាមួយ​សមត្ថកិច្ច​មូលដ្ឋាន អង្គការ APLE ជួយ​ដោះលែង​កុមារ​ដែលរង​ការកេង​ប្រវ័ញ្ចផ្លូវភេទ និង​ផ្តល់​ប្រឹក្សា​យោបល់ ការ​ស្តារនិតិ​សម្បទា​សង្គម និង​ជំនួយ​ផ្លូវច្បាប់​ដល់កុមារ​រងគ្រោះ និង​គ្រួសា​រ​​របស់​គេ។

ក្នុងពេលថ្មីៗនេះ អង្គការម្លប់តាប៉ាង​បានទទួល​ថវិកា​ចំនួន ៧០ ០០០ ដុល្លា​អាមេរិក សំរាប់​រយៈ​ពេល ២ ឆ្នាំ ពីរដ្ឋា​ភិបាល​សហ​រដ្ឋអាមេ​រិក សំរាប់​ជួយដល់​ការងារ​របស់គេ ក្នុង​កម្មវិធី​សុវត្ថិភាព​កុមារ។ កម្មវិធី​សុវត្ថិ​ភាពបណ្តុះ​បណ្តាល​បណ្តាញ​អ្នកធ្វើការ​ផ្នែករៀប​ចំដំណើ​រទេសចរ និង​អ្នកធ្វើ​ការព្រម​ទាំងថៅ​កែកន្លែង​ទទួល​ភ្ញៀវ ពីវិធី​រកមើល​ករណីរំលោភ​និង​ការជួញ​ដូរ​កុមារ ហើយ​រាយការណ៍​ទៅនគរ​បាល​​ខេត្ត។ នៅអង្គ​ការម្លប់តា​ប៉ាង លោក​ស្រីឯក​អគ្គរដ្ឋទូត​ត្រូវបាន​ទទួលដោយ​លោក​ស្រី Margaret Eno អ្នក​សំរប​សំរួល​កម្មវិធី ហើយ​ត្រូវបាន​រៀបរាប់​ប្រាប់ពី​សកម្មភាព មជ្ឈ​មណ្ឌល និង​ការងារ​របស់​អង្គការ។ អង្គការ​បានជួយ​អ្នកធ្វើ​ការនិង​កុមារ​ជាង ១ ០០០ នាក់ ក្នុង​មួយ​សប្តាហ៍ តាម​រយៈមជ្ឈ​មណ្ឌល​ទាំង ១១ របស់​ខ្លួន ដែល​មាន​មជ្ឈ​មណ្ឌល​ធំសំរាប់​ពេលថ្ងៃ១ មជ្ឈ​មណ្ឌល​សំរាប់​សំរាក​ពេលយប់ ២ សំរាប់​កុមារ​ធ្វើចំណាក​​ស្រុក មជ្ឈមណ្ឌល​បណ្តុះ​បណ្តាល​វិជ្ជាជីវៈ ២ កន្លែង​សិល្បៈ​និងកីឡា​ដែលមា​នដំបូល​មួយ នៅ​ចំកណ្តាល​ទីក្រុង​ព្រះសី​ហនុ និង​មជ្ឈមណ្ឌល​សហគមន៍ ២ នៅ​តំបន់អ្នក​ក្ររស់​នៅ។

កុមារីអាយុ ១៧ ឆ្នាំម្នាក់​នៅខេត្ត​ព្រះសីហនុ បាន​និយាយ​ថា នាងនិង​ប្អូនប្រុស​របស់​នាងបាន​មកកាន់​មជ្ឈ មណ្ឌល​កាលពី ៥ ឆ្នាំមុន។ តាំងពី​ពេលនោះ​មក ពួកគេ​បានទទួល​អត្ថប្រយោជន៍​យ៉ាងច្រើន​ពីមជ្ឈ​មណ្ឌល។ នាងបាន​និយាយ​ថា “ខ្ញុំស្គាល់​មិត្តភក្តិ និង​បានរៀន​សូត្រច្រើន​ពីមជ្ឈ​មណ្ឌល ដែល​បានបង្រៀន​ខ្ញុំច្រើន​ពី​ជីវិត។”
សព្វថ្ងៃនេះ នាងកំពុងតែ​រៀននៅ​ក្នុងសាលា ហើយ​ចង់ធ្វើ​ជាអ្នកបក​ប្រែភា​សាអង់​គ្លេស ខ្មែរ​នៅថ្ងៃ​ណាមួយ។ នាងបាន​និយាយ​ថា “ខ្ញុំចង់​ធ្វើការ​នៅក្នុង​មជ្ឈ​មណ្ឌលនេះ ដើម្បី​ជួយ​សិស្ស​នៅទីនេះ។ ខ្ញុំចូល​ចិត្តលេង​ជាមួយ​ក្មេងៗ​នៅទីនេះ ហើយ​ចង់ធ្វើ​អ្វីៗដែល​ខ្ញុំអាច​ធ្វើបាន ដើម្បី​ជួយពួក​គេ។”

នៅពេលត្រូវបានសាក​សួរពីពាក្យ​ទូន្មាន​ដល់​កុមាររស់​នៅតាម​ផ្លូវនិង​កម្មរ នៅជុំវិញ​ពិភព​លោក នាង​បាន​និយាយ​ថា “ចូរធ្វើ​ជាក្មេង​ល្អ និងពល​រដ្ឋល្អ។” នៅពេល​សួរពីដំបូន្មាន​សំរាប់​​យុវវ័យ​ទូទៅ នាង​បានិយាយ​ថា​ “គេមិន​ត្រូវរើស​អើងនឹង​កម្មករ​និងក្មេង​រស់នៅ​តាមផ្លូវ​ទេ យើង​គួរតែ​លេងជា​មួយគេ​ផងដែរ។”
ក្នុងពេលទស្សន​កិច្ចរបស់​លោក​ស្រីឯក​អគ្គរដ្ឋទូត អង្គការ​ម្លប់តា​ប៉ាងក៏បាន​រៀបចំ “ការ​សំដែង” ខ្លីមួយ របស់​កុមារ​ក្នុងមជ្ឈ​មណ្ឌល ដែល​ក្នុងនោះ​រួមមាន​របាំអប្សារា និង​កីឡាអា​ក្រូបាត។
ក្រៅពីចុះមើលសកម្មភាព​ប្រឆាំង​ការជួញ​ដូរមនុស្ស លោក​ស្រីឯកអគ្គ​រដ្ឋទូត Rodley ថែម​ទាំងបាន​ទៅ​ទស្សនា​​រោងចក្រ​ផលិត​ស្រាបៀ​អង្គរ និងបាន​ជួបមន្រ្តី​មកពីកង​ទ័ពជើង​ទឹកកម្ពុជា​និងកងទ័ព​ជើងទឹក​​អាមេ​រិក នៅពេល​លោកស្រី​បានទៅ​មើលនា​វាកងទ័ព​ជើងទឹក​អាមេរិក ដែល​កំពុង​ចតនៅ​មូលដ្ឋាន​ជើងទឹក​រាម។

បើចង់ដឹងពី​របាយការណ៍​ស្តីពីការ​ជួញដូរមនុស្ស​ឆ្នាំ ២០០៩ សូម​ចុចត្រង់​នេះ http://www.state.gov/g/tip/rls/tiprpt/2009/123135.html