សហរដ្ឋអាមេរិកសន្យាផ្តល់ថវិកាចំនួន ៧,៧៩ លានដុល្លាអាមេរិក សំរាប់កំនើនសេដ្ឋកិច្ច
ទីស្តីការគណរដ្ឋមន្រ្តី ភ្នំពេញ
ចេញថ្ងៃទី ២២ ខែកញ្ញា ឆ្នាំ ២០០៩
 |
(ជួរមុខ) ឧបនាយករដ្ឋមន្រ្តីសុខអាន(ឆ្វេង)
ឯកអគ្គរដ្ឋទូត Rodley (កណ្តាល) និងប្រធាន ទី
ភ្នាក់ងារUSAIDលោក Flynn Fuller
(ស្តាំ) រូបពង្រីក |
រដ្ឋាភិបាលសហរដ្ឋអាមេរិក និងរាជរដ្ឋាភិបាលកម្ពុជាបានចុះហត្ថលេខាលើវិសោធនកម្មនៃកិច្ចព្រមព្រៀងទ្វេភាគី នៅថ្ងៃទី២៣ ខែកញ្ញានេះ ដែលនឹងផ្ដល់ថវិកាចំនួន ៧,៧៩ លានដុល្លាអាមេរិក សំរាប់ឆ្នាំ ២០០៩ ដើម្បីគាំទ្រដល់វិស័យជាអាទិភាពសំរាប់កំនើនសេដ្ឋកិច្ចនៅកម្ពុជា។ នៅក្រោមវិសោធនកម្មនៃកិច្ចព្រមព្រៀងទ្វេភាគីនេះ ដែលត្រូវបានចុះហត្ថលេខានៅឯទីស្តីការគណៈរដ្ឋមន្រ្តី នៅភ្នំពេញ រាជរដ្ឋាភិបាលកម្ពុជាត្រូវផ្តល់ការគាំទ្រជាសំភារៈ/សេវាកម្ម ដែលគិតជាទឹកប្រាក់មានតំលៃ ៤២៥ ០០០ ដុល្លាអាមេរិក។
លោកជំទាវ Carol A. Rodley ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា បានចូលរួមនៅក្នុងពិធីនេះ និងចុះហត្ថលេខាជាសាក្សី។ ឯកឧត្ដម សុខ អាន ឧបកនាយករដ្ឋមន្ដ្រី និងលោក Flynn Fuller នាយកបេសកម្មនៃទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្ដរជាតិ (USAID) ចុះហត្ថលេខាក្នុងនាមរដ្ឋាភិបាលរបស់ខ្លួន។
ថ្លែងនៅក្នុងពិធីចុះហត្ថលេខានោះ លោកស្រីឯកអគ្គរដ្ឋទូត Rodley បានមានប្រសាសន៍ថា “ខ្ញុំមានសេចក្តីរីករាយដែលមានវត្តមាននៅទីនេះ ដើម្បីបញ្ជាក់សារជាថ្មីនូវឆន្ទៈរបស់ប្រទេសអាមេរិក ក្នុងការលើកកំពស់ជីវិតរស់នៅរបស់ប្រជាជនកម្ពុជា តាមរយៈកំណើនសេដ្ឋកិច្ច។”
ជំនួយថវិកានេះនឹងត្រូវប្រើសំរាប់ពង្រីកសកម្មភាពរបស់ទីភ្នាក់ងារ (USAID) ក្នុងគំរោងអភិវឌ្ឍន៍សហគ្រាសខ្នាតតូចជាងគេ ខ្នាតតូច និងខ្នាតមធ្យម គំរោងទី២ និងក្នុងកម្មវិធីធ្វើឱ្យប្រសើរឡើងនូវបរិយាកាសមុខរបរ ដែលកំពុងកាត់បន្ថយភាពក្រីក្ររបស់ ប្រជាជនតាមជនបទ តាមរយៈការបង្កើនផលិតភាពនៃមុខរបរលក្ខណៈគ្រួសារ។ មកដល់សព្វថ្ងៃនេះ គំរោង កម្មវិធីបានជួយដល់កសិករចំនួន ៣ ០០០ នាក់ហើយ ក្នុងការបង្កើនបរិមាណផលិតផលលក់របស់ពួកគេពី ១០០% ទៅ ៣៤០% ដែលបានធ្វើឱ្យពួកគេមានលទ្ធភាពទទួលបានសេវាសុខភាព ការសិក្សាអប់រំសំរាប់កូនៗរបស់គេ និងផ្តល់ឱកាសដល់ការពង្រីកមុខរបររបស់ពួកគេ បានប្រសើរជាងមុនទៀតផង។ គំរោងនេះត្រូវអនុវត្ដ ដោយអង្គការ ឌី អេ អាយ (DAI)។
ដោយបន្ថែមទៅលើកម្មវិធីកំនើនសេដ្ឋកិច្ច សហរដ្ឋអាមេរិកក៏បានជួយដល់កម្មវិធីមួយចំនួនទៀតសំរាប់ ជាប្រយោជន៍ដល់ប្រជាជនកម្ពុជាទាំងអស់ ដូចជាកម្មវិធីសុខភាព អប់រំ សិទ្ធិមនុស្ស នីតិរដ្ឋ អភិបាលកិច្ចមូល ដ្ឋាននិងវិមជ្ឍការ ការប្រឆាំងអំពើពុករលួយ និងកម្មវិធីប្រឆាំងការជួញដូរមនុស្សជាដើម។ សហរដ្ឋអាមេរិក តាមរយៈទីភ្នាក់ងារ USAID រំពឹងថានឹងផ្ដល់ថវិកាសរុបចំនួន ៦១,៨ លានដុល្លាសហរដ្ឋអាមេរិក ជាជំនួយដល់ប្រទេសកម្ពុជា ក្នុងឆ្នាំ ២០០៩។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
