សុន្ទរកថា
សុន្ទរកថារបស់លោកស្រីឯកអគ្គរដ្ឋទូត Rodley នៅឯការប្រគុំតន្រ្តីបាតដៃស្អាតស្អំ
ពហុកីឡាដ្ឋានអូឡាំពិក ក្រុងភ្នំពេញ
ថ្ងៃទី ៣០ ខែឧសភា ឆ្នាំ ២០០៩
ខ្ញុំមានសេចក្តីរីករាយដោយធ្វើជាតំណាងសហរដ្ឋអាមេរិក ក្នុងពិធីគួរអោយរំភើបនេះ។ ខ្ញុំរីករាយដោយឃើញក្មេងៗជាច្រើន ក្នុងចំណោមហ្វូងមនុស្ស។ អ្នកគឺជាអនាគតនៃប្រទេសកម្ពុជា ហើយវត្តមានរបស់អ្នកនៅពេលនេះបង្ហាញពីការប្រឆាំងរបស់អ្នកចំពោះអំពើពុករលួយ។
អំពើពុករលួយគឺជាបញ្ហាមួយដែលប៉ះពាល់ដល់មនុស្សគ្រប់គ្នា នៅប្រទេសកម្ពុជា។ តែពួកអ្នក ដែលស្ថិតនៅក្នុងវ័យក្មេងនេះហើយដែលជាអ្នករងការខាតបង់ច្រើនជាងគេ។
ជារៀងរាល់ឆ្នាំ មានមនុស្សប្រមាណ ២៥០ ០០០ នាក់ចេញរកការងារធ្វើ តែមិនអាចរកបានការងារធ្វើ។ វិបត្តិសេដ្ឋកិច្ចពិភពលោកដែលចេះតែជ្រៅទៅៗ កំពុងតែប៉ះមកលើប្រទេសកម្ពុជា ដោយសារវិនិយោគបរទេសនិងការនាំទំនិញេចេញក្រៅស្រុកបានធ្លាក់ចុះ។ ប្រទេសដែលមានការគ្រប់គ្រងត្រឹមត្រូវនិងតាមលទ្ធិប្រជាធិបតេយ្យ ហើយប្រយុទ្ធប្រឆាំងយ៉ាងសកម្មនឹងអំពើពុករលួយ រងការប៉ះពាល់តិចពីវិបត្តិសេដ្ឋកិច្ចពិភពលោក ហើយឆាប់វិលត្រឡប់ទៅរកវិបុលភាពវិញ។ ការងើបឡើងវិញបានឆាប់នៃសេដ្ឋកិច្ចមានន័យថាមានឱកាសការងារច្រើន សំរាប់យុវវ័យនៃប្រទេសកម្ពុជា។
តាមការសិក្សាស្រាវជ្រាវនានា អំពើពុករលួយធ្វើអោយប្រទេសកម្ពុជាបាត់បង់ប្រាក់រហូតដល់ ៥០០ លានដុល្លាក្នុងមួយឆ្នាំ សំរាប់ចំណូលរដ្ឋ ។ ទឹកប្រាក់នេះអាចប្រើសំរាប់សេវាសាធារណៈ ដូចជាការសិក្សាអប់រំ ការថែទាំសុខភាព និងការងារសំរាប់យុវវ័យកម្ពុជា។ ប្រាក់ ៥០០ លានដុល្លាអាចអោយគេកសាងអាគារសិក្សាដែលមាន ៦ បន្ទប់បានចំនួន ២០ ០០០ ឬអាចបន្ថែមប្រាក់ខែអោយដល់បុគ្គលិករាជការទាំងអស់ក្នុងម្នាក់ៗចំនួន ២៦០ ដុល្លា ក្នុងមួយខែ។
ខ្ញុំសូមអំពាវនាវអោយរដ្ឋាភិបាលកម្ពុជាធ្វើតាមការសន្យារបស់ខ្លួនក្នុងការអនុម័តច្បាប់ប្រឆាំងនឹងអំពើពុករលួយ។ ក្នុងយុទ្ធនាការបោះឆ្នោតជាតិ ២០០៩ គណបក្សនយោបាយទាំងអស់បានសន្យាថានឹងអនុម័តច្បាប់នេះ ។ ឥឡូវនេះគឺជាពេលវេលាដែលត្រូវធ្វើ។
ពង្រាងច្បាប់ប្រឆាំងនឹងអំពើពុករលួយកំពុងត្រូវបានសើរើពិនិត្យមើលឡើងវិញដោយទីស្តីការគណរដ្ឋមន្រ្តី ហើយគេមានសង្ឃឹមថា ច្បាប់ប្រឆាំងនឹងអំពើពុករលួយ ដែលបំពេញបានតាមបទដ្ឋានអន្តរជាតិ អាចត្រូវបានអនុម័តក្នុងឆ្នាំនេះ។
មនុស្សចំនួនជាងមួយលាននាក់បានសំដែងចេញនូវការគាំទ្ររបស់គេចំពោះការអនុម័តច្បាប់ប្រឆាំងអំពើពុករលួយ តាមរយៈយុទ្ធនាការហត្ថលេខាចំនួនមួយលាន។ នេះគឺជាការបង្ហាញការគាំទ្រយ៉ាងខ្លាំងរបស់ប្រជាជនសាមញ្ញ ហើយពេលនេះគឺជាពេលដែលរដ្ឋាភិបាលត្រូវធ្វើការឆ្លើយតបនឹងឆន្ទៈរបស់ប្រជារាស្រ្ត។
អ្នកខ្លះអាចនិយាយបានថា អំពើពុករលួយនៅកម្ពុជាគឺជាបញ្ហាធំពេក សំរាប់ដោះស្រាយ និងថា វាមិនអាចបាត់ទៅវិញបានទេ។ តែ វាមិនមែនចេះតែយ៉ាងដូច្នេះទេ។ រាល់ការមិនព្រមប្រព្រឹត្តអំពើពុករលួយ និងរាល់ទង្វើស្អាតស្អំ ទោះបីតូចយ៉ាងណាក្តី នឹងនាំយើងខិតទៅជិតប្រទេសកម្ពុជាមួយ ដែលគ្មានអំពើពុករលួយ។
ការប្រគុំតន្រ្តីនេះគ្រាន់តែជាជំហានមួយបន្ថែមទៀត នៅក្នុងចលនាពលរដ្ឋពិតប្រាកដមួយ ក្នុងការលុបបំបាត់អំពើពុករលួយ។ ថ្ងៃនេះ សិល្បករនិងវិចិត្រករចំណានៗខ្លះរបស់ខ្មែរ កំពុងតែឈរនៅខាងអ្នកជាប្រជាជនកម្ពុជា ដែលប្រឆាំងនឹងអំពើពុករលួយ។
សហរដ្ឋអាមេរិកគឺជាដៃគូរបស់អ្នកក្នុងការតស៊ូនេះ។ នេះគឺជាការប្រគុំតន្រ្តីរបស់អ្នក និងជាចលនារបស់អ្នក តែយើងនៅទីនេះដើម្បីគាំទ្រអ្នក តាមដែលយើងអាចធ្វើទៅបាន។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
