សុន្ទរកថា
សុន្ទរកថារបស់លោកស្រី Carol A. Rodley ក្នុងពិធីប្រគល់រង្វាន់ក្នុងការប្រលងសរសេរអត្ថបទប្រឌិត Mark Twain
ស្ថានទូតអាមេរិក ភ្នំពេញ
ថ្ងៃទី ០៦ ខែមិថុនា ឆ្នាំ ២០០៩
ខ្ញុំសូមអរគុណចំពោះឯកឧត្តម ម៉ក់ វ៉ាន់ ដែលមានវត្តនៅថ្ងៃនេះ និងក្រសួងអប់រំដែលបានជួយធ្វើអោយមានការប្រលងសរសេរអត្ថបទ Mark Twain នេះឡើង។ ខ្ញុំសូមអរគុណផងដែរចំពោះនាយកសាលា លោកគ្រូអ្នគ្រូ និងសិស្សមកពីវិទ្យាល័យស៊ី សុវត្ថិ បាក់ទូក វត្តភ្នំ សន្ធរម៉ុក និងទួល ទំពូង ដែលមានវត្តមានថ្ងៃនេះ នៅទីនេះ។ បើគ្មានការខិតខំរបស់អ្នកទាំងអស់គ្នា និងការលើកទឹកចិត្តពីលោកគ្រូអ្នកគ្រូទេ នោះពិធីនេះមិនអាចមានទៅបានទេ។
តាំងតែពីខ្ញុំបានមកដល់កាលពីឆ្នាំទៅ ខ្ញុំបានកត់សំគាល់ឃើញថា សិល្បៈនៅកម្ពុជាមានការរស់ឡើងវិញបន្តិច។ តាមពិត កាលពីសប្តាហ៍មុន ខ្ញុំបានរៀបចំពិធីមួយនៅនិវេសដ្ឋានរបស់ខ្ញុំ ហើយបានមានឱកាសនិយាយជាមួយសិល្បករ ជាងចំលាក់ តន្រ្តីករនិងអ្នករបាំ ដែលកំពុងដឹកនាំចលនានេះ។ ពិតមែនតែវាជាឱកាសល្អមួយដែលបានជួបជាមួយនឹងក្រុមអ្នកមានទេពកោសល្យទាំងនេះ តែខ្ញុំបានកត់សំគាល់ឃើញថា មិនមានអ្នកនិពន្ធណាមួយនៅទីនោះទេ។
សិល្បៈសំដែងនិងសិល្បៈគំនូរចំលាក់គឺជាការឆ្លុះបញ្ចាំងយ៉ាងសំខាន់នៃវប្បធម៌ ហើយអាចប្រាប់រឿងរបស់ប្រទេសមួយ និងប្រជាជននៃប្រទេសនោះ តាមវិធីពិសេសដោយឡែករបស់គេ។ យ៉ាងណាក្តី អ្នកទស្សនារបស់គេមានមិនច្រើនទេ។ ផ្ទុយទៅវិញ អ្នកអានស្នាដៃនិពន្ធមានច្រើន ទាំងនៅក្នុងប្រទេសកម្ពុជា ទាំងនៅបរទេស ហើយដូច្នះ មានតែការស្រម៉ើស្រម៉ៃរបស់គេតែប៉ុណ្ណោះដែលកំណត់ព្រំដែនលើវេទិការសំរាប់អ្នកនិពន្ធខ្មែរវ័យក្មេង ។
ខ្ញុំបានសំគាល់ឃើញទាំងនៅក្នុងសេចក្តីរាយការណ៍ថ្មីៗនះ ទាំងក្នុងសារព័ត៌មានភាសាខ្មែរ ទាំងក្នុងសារព័ត៌មានភាសាអង់គ្លេសថា ចំនួនអ្នកអានមានការកើនឡើង នៅប្រទេសកម្ពុជា។ សិស្សដូចជាអ្នកទាំងអស់គ្នាស្វែងរកសៀវភៅកាន់តែច្រើនជាភាសាខ្មែរ ដែលនិយាយពីរឿងទាក់ទងនឹងជីវិតរស់នៅរបស់អ្នក។ ខ្ញុំដឹងផងដែរថា រឿងជាច្រើនដែលត្រូវបានផ្ញើមកក្នុងការប្រលងនេះមានលក្ខណៈដូចនេះ ។ រឿងទាំងនេះសរសេរដោយដៃផ្ទាល់របស់អ្នកនិពន្ធ ហើយឆ្លុះបញ្ចាំងពីការសប្បាយនិងការពិបាកពិតប្រាកដ នៃជីវិតសព្វថ្ងៃ នៅភ្នំពេញ និងនៅទូទាំងប្រទេស។ ខ្ញុំសង្ឃឹមថា អ្នកនឹងបន្តភាពប៉ិនប្រសប់ក្នុងការសរសេរ នៅពេលអនាគត និងសង្ឃឹមថា សំរាប់អ្នកខ្លះ ការប្រលងនេះគឺជាជំហានដំបូងក្នុងអាជីពជាអ្នកនិពន្ធ។
ការសរសេររឿងគឺជាមធ្យោបាយមួយដ៏ខ្លាំង ដែលអាចបង្កើតនិងផ្លាស់ប្តូរមតិ។ ខ្ញុំជឿថា អ្នកនិពន្ធខ្មែរមានតួនាទីសំខាន់ណាស់ក្នុងការដែលពិភពលោកប្រម៉ើលមើលមកប្រទេសរបស់អ្នក នៅពេលអនាគត។ ខ្ញុំជឿផងដែរថា អ្នកនិពន្ធក្មេងៗខ្លះនៅទីនេះ នឹងមានចំណែកក្នុងដំណើរនេះ។ សូមអរគុណម្តងទៀតចំពោះភាពក្លាហានផ្ញើស្នាដៃមក ហើយយើងសង្ឃឹមថា នឹងបានដឹងច្រើនទៀតពីអ្នកទាំងអស់គ្នា នៅពេលអនាគត។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
