សុន្ទរកថា
សុន្ទរកថារបស់លោកឯកអគ្គរដ្ឋទូត Joseph A. Mussomeli ក្នុងពិធីណែនាំនិងសំណេះសំណាលមុនចេញដំណើររបស់និស្សិតអាហារូបករណ៍ Fulbright
ស្ថានទូតអាមេរិក - ភ្នំពេញ
ថ្ងៃទី ១២ ខែមិថុនា ឆ្នាំ ២០០៨
ឯកឧត្ដម កុល ផេង ទេសរដ្ឋមន្ដ្រី និង ជារដ្ឋមន្ដ្រីក្រសួងអប់រំយុវជន និងកីឡា
និសិ្សតអាហាររូបករណ៍ Fulbright បច្ចុប្បន្ន និង អតីតនិស្សិតអាហាររូបករណ៍ Fulbright
សមាជិកបណ្ដាញសារពត៌មាន
អស់លោក លោកស្រី
ខ្ញុំមានសេចក្ដីរីករាយដោយមានវត្ដមាននៅទីនេះក្នុងព្រឹកនេះ ជាមួយឯកឧត្ដម អស់លោក លោកស្រី ដើម្បីសំដែងការកោតសរសើរដល់និស្សិតកម្ពុជាចំនួន១០ នាក់ថ្មី ដែលបានទទួលអាហារូបករណ៍ Fulbright ដើម្បីបន្ដការសិក្សាថ្នាក់អនុបណ្ឌិតនៅសហរដ្ឋអាមេរិកសំរាប់ឆ្នាំសិក្សាខាងមុខនេះ ។ ពួកគេនឹងចូលរួម ជាមួយនិស្សិតកម្ពុជាចំនួន ៨ នាក់ទៀត ដែលកំពុងសិក្សានៅសហរដ្ឋអាមេរិកក្រោមការឧបត្ថម្ភរបស់កម្មវិធីអាហាររូបករណ៍ Fulbright ដូច្នេះសំរាប់ឆ្នាំសិក្សា ២០០៨-២០០៩ នេះមាននិស្សិតកម្ពុជាសរុបចំនួន ១៨ នាក់ ដែលទទួលបានអាហាររូបករណ៍ Fulbright ។
ដូចដែលខ្ញុំបាននិយាយទៅកាន់និស្សិតអាហារូបករណ៍ Fulbright កន្លងមកដែរថា នេះជាពេលវេលាដ៏រំភើបសំរាប់អ្នកទាំងអស់គ្នា ។ ទោះជាយ៉ាងណាក៏ដោយការជ្រើសរើសរូបអ្នកគ្រាន់តែជាជំហានដំបូងតែប៉ុណ្ណោះ ។ បញ្ហាប្រឈមមុខពិតប្រាកដមិនទាន់មកដល់ទេ ។ អ្នកប្រហែលមិនទាន់ដឹងនៅឡើយទេ តែអ្នកនឹងត្រូវឈានជើងចូលទៅក្នុងការផ្សងព្រេងមួយ ដែលនឹងធ្វើអោយជីវិតរបស់ អ្នក មាន ការ ផ្លាស់ប្ដូរ ។ អ្នក មិន ត្រឹម តែ នឹង ចូលរួម ក្នុង កម្មវិធី សិក្សា ដែល នឹង ពង្រឹង ជំនាញ និង ការអភិវឌ្ឍន៍សំរាប់ខ្លួនអ្នកតែប៉ុណ្ណោះទេ តែអ្នកក៏នឹងត្រូវដើរតួជាឯកអគ្គរដ្ឋទូតវប្បធម៌នៅសហរដ្ឋអាមេរិកផងដែរ ដោយធ្វើអោយជនជាតិអាមេរិកមានការយល់ដឹងកាន់តែច្រើនស្ដីពីប្រទេសកម្ពុជា ។
ខ្ញុំសូមនិយាយដោយត្រង់ថា ពេលខ្លះជនជាតិអាមេរិកមិនសូវដឹងពីអ្វីដែលនៅជិតបង្កើយនឹងផ្ទះរបស់គេផង ដូច្នេះទំរាំប្រជាជននិងវប្បធម៌ដែលស្ថិតនៅឆ្ងាយរាប់ពាន់ម៉ៃល៍តើគេរឹតតែមានការពិបាកយល់យ៉ាងណាទៅ? តែជនជាតិអាមេរិកម្នាក់ៗដែលអ្នកនឹងជួបពិតជាមានការចាប់អារម្មណ៍ ហើយចង់ដឹងច្រើនពីអ្នក និងប្រទេសរបស់អ្នក ។ អ្នកទាំងអស់គ្នាហ្នឹងហើយដែលជាអ្នកជួយលើកកំពស់ការគោរពគ្នាទៅវិញទៅមកតាមរយៈការសិក្សាអប់រំនិងការកសាងទំនាក់ទំនងជិតស្និទ្ធនឹងគ្នា ។ អ្នកនឹងចូលរួមជាមួយនិស្សិតដែលមកពីជុំវិញពិភពលោក ហើយរៀនសូត្រពីគ្នាទៅវិញទៅមក ។ ពេលអ្នកបំពេញការសិក្សាចប់អ្នកនឹងវិលត្រឡប់មកកម្ពុជាវិញ ហើយចែករំលែកបទពិសោធន៍ និងចំណាប់អារម្មណ៍របស់អ្នកស្ដីពីប្រទេសអាមេរិកជាមួយជនរួមជាតិរបស់អ្នក ។ មនុស្សជាច្រើននឹងទទួលបានប្រយោជន៍ពីឱកាសនេះរបស់អ្នក ។ តួនាទីរបស់អ្នកជាឯកអគ្គរដ្ឋទូតវប្បធម៌គឺជាតួនាទីដែលមានសារៈសំខាន់ ។
កម្មវិធីអាហាររូបករណ៍ Fulbright បានចាប់ផ្ដើមមានឡើងវិញនៅកម្ពុជាក្នុងឆ្នាំ ១៩៩៤ ។ តាំងពីពេលនោះមកនិស្សិតកម្ពុជាចំនួន ៩៤ នាក់ បានសិក្សាថ្នាក់ក្រោយឧត្ដមសិក្សានៅសហរដ្ឋអាមេរិក ដោយមានអតីតនិស្សិតអាហាររូបករណ៍ Fulbright កំពុងធ្វើការក្នុងមុខតំណែងសំខាន់ៗក្នុងអង្គការរដ្ឋអង្គការអន្ដរជាតិអង្គការមិនមែនរដ្ឋាភិបាល និង តាមក្រុមហ៊ុនឯកជន ។ ពេលនេះអ្នកត្រូវបន្ដប្រពៃណីដ៏ល្អនេះ ។
ដោយសារថាកម្មវិធីអាហារូបករណ៍ Fulbright គឺជាកម្មវិធីធ្វើការផ្លាស់ប្ដូរគ្នា ដូច្នេះ គេក៏គួរធ្វើការកត់សំគាល់ផងដែរថា ក្នុងឆ្នាំសិក្សាក្រោយនេះយើងក៏នឹងបញ្ជូនផងដែរនូវអ្នកទទួលអាហារូបករណ៍ Fulbright ជាជនជាតិអាមេរិកចំនួន ២ នាក់ ដែលនឹងធ្វើដំណើរមកកម្ពុជា ដើម្បីរៀបចំកម្មវិធីសិក្សាផ្នែកភាពជាអ្នកដឹកនាំក្នុងការសិក្សាអប់រំនៅសាកលវិទ្យាល័យភូមិន្ទភ្នំពេញ និងផ្នែកមុខជំនួញទីផ្សានៅសាកលវិទ្យាល័យជាតិគ្រប់គ្រង ។ ក្រៅពីនេះ យើងនឹងបញ្ជូននិស្សិតអាមេរិកចំនួន ៤ នាក់មកកម្ពុជាដើម្បីធ្វើការស្រាវជ្រាវនៅកម្ពុជាជាផ្នែកមួយនៃកម្មវិធី Fubright ។ ស្ថាប័នអប់រំថ្នាក់ឧត្ដមសិក្សារបស់សហរដ្ឋអាមេរិករំពឹងលើអ្នកទាំងនេះក្នុងការផ្សព្វផ្សាយការយល់ដឹងពីប្រទេសកម្ពុជាទៅនិស្សិតអាមេរិកក្នុងឆ្នាំខាងមុខៗ ហើយយើងរីករាយនឹងឧបត្ថម្ភដល់និស្សិតទាំងនេះផងដែរ ។
ក្នុងឆ្នាំកន្លងទៅនេះឯកឧត្ដមបានសុំអោយយើងពង្រីកកម្មវិធីអាហាររូបករណ៍ Fulbright នៅកម្ពុជាអោយដល់ថ្នាក់បណ្ឌិត ខ្ញុំមានសេចក្ដីរីករាយសូមជំរាបឯកឧត្ដមថាយើងអាចបំពេញបានតាមការស្នើនេះ ។ នេះជាលើកដំបូងហើយដែលយើងនឹងផ្ដល់អាហារូបករណ៍ដល់និស្សិតកម្ពុជាដល់ទៅ ២ នាក់អោយសិក្សាថ្នាក់បណ្ឌិតនៅសហរដ្ឋអាមេរិក ។ និស្សិតទាំង ២ នាក់នេះគឺ កញ្ញា អ៊ូ ជូលី ដែលនឹងត្រូវរៀនថ្នាក់បណ្ឌិតផ្នែកវិទ្យាសាស្ដ្របរិស្ថាននៅសាកលវិទ្យាល័យ Texas A&M University និង កញ្ញា ឃុន ចាន់ណារី ដែលនឹងរៀនថ្នាក់បណ្ឌិតផ្នែកវិទ្យាសាស្ដ្រសេដ្ឋកិច្ច នៅសាកលវិទ្យាល័យ Southern Illinois University Carbondale។
ជាទីបញ្ចប់ ខ្ញុំសូមកោតសរសើរអស់ពីដួងចិត្ដដល់អ្នកទាំងអស់គ្នា និងសូមអោយអ្នកជួបតែសំណាងល្អក្នុងពេលអ្នកធ្វើការផ្សងព្រេងថ្មីនេះ ។
ឯកអគ្គរដ្ឋទូត
សន្ទរកថា
អំពីស្ថានទូត
