សុន្ទរកថា
សុន្ទរកថារបស់លោកស្រីឯកអគ្គរដ្ឋទូត Carol A. Rodley ក្នុងពិធីសម្ពោធសាលារៀន នៅខេត្តពោធិសាត់
ខេត្តពោធិសាត់
ថ្ងៃទី ២៨ កញ្ញា ឆ្នាំ ២០០៩
សូមជំរាបសួរឯកឧត្តម ភ្ញៀវកិត្តិយស នាយកសាលា គ្រូបង្រៀន និងសិស្សសាលាខេត្តពោធិសាត់។
សូមអរគុណដែលបានអញ្ជើញរូបខ្ញុំមកជួបជាមួយអស់លោក អ្នកទាំងអស់គ្នា នៅថ្ងៃនេះ។ ស្ថានទូតអាមេរិកមានសេចក្តីរំភើបដែលបានដើរតួនាទីមួយ ក្នុងការកសាងឡើងវិញនូវវិទ្យាល័យពោធិសាត់ និងពង្រីកសាលារៀនបីទៀត ក្នុងខេត្តពោធិសាត់ គឺអនុវិទ្យាល័យកែវ សុវណ្ណ សាលាបឋមសិក្សាព្រងិល និងសាលាបឋមសិក្សាសុភី។ ខ្ញុំដឹងថាការងារនិងការសំរបសំរួលគ្នាយ៉ាងច្រើនបានធ្វើអោយមានថ្ងៃនេះឡើង ហើយខ្ញុំសូមអរគុណជាពិសេសចំពោះក្រុមហ៊ុនម៉ៅការសាងសង់ក្នុងស្រុក និងជនជាតិខ្មែរទាំងអស់ ដែលបានចូលរួមក្នុងការកសាងសាលាថ្មីទាំងនេះ។
ដូចអស់លោក លោកស្រីប្រហែលជាធ្លាប់ដឹងមកហើយថា វិទ្យាល័យពោធិសាត់ត្រូវបានកសាងពីដើមមកដោយសហរដ្ឋអាមេរិក នៅក្នុងឆ្នាំ ១៩៦២។ ការដែលយើងត្រឡប់មកវិញនៅពេលនេះ ៤៧ ឆ្នាំក្រោយមក បញ្ជាក់ពីជំរៅនិងភាពយូរអង្វែងនៃការទាក់ទងរបស់យើងជាមួយប្រទេសកម្ពុជា និងការយកចិត្តទុកដាក់របស់យើង ក្នុងការជួយរាជរដ្ឋាភិបាលកម្ពុជា ក្នុងការលើកកំពស់ប្រព័ន្ធអប់រំ ទាំងផ្នែកសមត្ថភាពមនុស្ស និងទាំងផ្នែកហេដ្ឋារចនាសម្ព័ន្ធ។
តាមរយៈគំរោងនានាដូចជាគំរោងនេះ យើងជួយផ្តល់ឱកាសអោយសិស្សក្មេងៗនៅខេត្តពោធិសាត់បានរៀនសូត្រនិងលេង និងឱកាសអោយគ្រូរបស់គេផ្តោតការយកចិត្តទុកដាក់ទៅលើការបង្រៀន ជាជាងលើកង្វល់ទៅលើបរិយាកាសដែលគេកំពុងតែធ្វើការ។
សាលានេះគ្រាន់តែជាផ្នែកមួយនៃការគាំទ្រនិងជំនួយផ្នែកអប់រំរបស់យើងចំពោះប្រទេសកម្ពុជាតែប៉ុណ្ណោះ។ យើងកំពុងតែកសាងឡើងវិញ និងជួសជុលសាលាដូចគ្នានេះ នៅទូទាំងប្រទេស តាមរយៈកម្មវិធីជំនួយមនុស្សធម៌របស់យើង។ តាមរយៈកម្មវិធីជំនួយជាបន្តរបស់សហរដ្ឋអាមេរិក យើងក៏កំពុងតែធ្វើការបង្កើនគុណភាពអប់រំ និងលទ្ធភាពទទួលបានការសិក្សាអប់រំ នៅតាមតំបន់ជនបទនៃប្រទេស ហើយយើងថែមទាំងផ្តល់អាហារូបករណ៍ដល់សិស្សឆ្នើមៗ អោយទៅសិក្សានៅសហរដ្ឋអាមេរិក។
ដូច្នេះ ខ្ញុំសូមលើកទឹកចិត្តអោយសិស្សនៅខេត្តពោធិសាត់រីករាយនឹងអាគារថ្មី នៅជិតខ្ញុំនេះ ហើយខិតខំរៀន ហើយសូមចាំថា ពួកគេគឺជាអនាគតនៃប្រទេស។ ស្ថានទូតអាមេរិកមានសេចក្តីរីករាយក្នុងការផ្តល់ជំនួយតាមរយៈកម្មវិធី ដូចជាកម្មវិធីជួយជួសជុលអាគារសាលារៀននេះ តែអនាគតនៃប្រទេសកម្ពុជាអាស្រ័យលើមនុស្សជំនាន់ក្រោយជាអ្នកកំណត់។
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
