Skip Global Navigation to Main Content
Skip Breadcrumb Navigation
កម្មវិធី & ព្រឹត្តការណ៍​ផ្សេង​ៗ

បណ្ណាល័យ​អាមេរិក​នៅ​ខេត្ត​កំពង់ចាម​អបអរ​ទិវា​ផែនដី​ជាមួយ​នឹង​ការ​បោស​សំអាត​វត្ត

ថ្ងៃទី ២២ មេសា ឆ្នាំ ២០០៩

          នៅ​ថ្ងៃទី ២២ ខែ​មេសា ឆ្នាំ ២០០៩ លោក Theodore Allegra អនុប្រធាន​បេសកកម្ម​ទូត​អាមេរិក នៅ​ទីក្រុង​ភ្នំពេញ បាន​ជួប​ជាមួយ​សិស្ស​និង​និស្សិត​មួយ​ក្រុម នៅ​ឯ​បណ្ណាល័យ​របស់​ស្ថានទូត​អាមេរិក នៅ​ខេត្ត​កំពង់ចាម​។ ក្រុម​សិស្ស​និង​និស្សិត​នោះ​បាន​ពិភាក្សា​ពី​បញ្ហា​បរិស្ថាន​ដែល​ប្រឈម​មុខ​នឹង​ប្រជាជន​កម្ពុជា និង​សារៈសំខាន់​នៃ​ការ​យល់ដឹង​ពី​បរិស្ថាន​។ ការ​បោស​សំអាត​គឺជា​ការងារ​ដំបូង​ក្នុង​ចំណោម​ការងារ​មួយ​ចំនួន​របស់​ស្ថានទូត​អាមេរិក ដើម្បី​អបអរ​ទិវា​ផែនដី ឆ្នាំ ២០០៩​។

          សិស្ស​ទាំង​នោះ​ជា​អ្នក​ទទួល​បាន​អាហារូបករណ៍​ពី​កម្មវិធី​អាហារូបករណ៍​ខ្នាត​តូច​ផ្នែក​ភាសា​អង់គ្លេស​របស់​ស្ថានទូត និង​សមាជិក​ក្លឹប​ភាសា​អង់គ្លេស​នៅ​ទី​នោះ ដែល​ធ្វើ​ការ​ប្រជុំ​ទៀងទាត់ នៅ​បណ្ណាល័យ​អាមេរិក នៅ​ខេត្ត​កំពង់ចាម​។ ប្រធានបទ​ដែល​ត្រូវ​បាន​លើក​យក​មក​ពិភាក្សា មាន​ដូចជា សារៈសំខាន់​នៃ​ការ​អភិរក្ស កម្មវិធី​ស្តីពី​បរិស្ថាន​របស់​រដ្ឋាភិបាល​សហរដ្ឋ​អាមេរិក​នៅ​កម្ពុជា និង​វិធី​ដែល​ប្រទេស​ដទៃ​ដោះស្រាយ​បញ្ហា​បរិស្ថាន​។ ក្នុង​ពេល​ជួប​គ្នា​នោះ លោក Allegra បាន​ធ្វើ​ការ​កត់សំគាល់​ថា ក្នុង​នាម​ជា​ពលរដ្ឋ​កម្ពុជា ពួកគេ​គឺជា​ម្ចាស់​នៃ​ធនធាន​ធម្មជាតិ​និង​ធនធាន​ជីវសាស្រ្ត​ចំរុះ​របស់​ប្រទេស ហើយ​លោក​បាន​ជំរុញ​អោយ​ពួកគេ​ស្វែងរក​វិធី​ការពារ​ធនធាន​ទាំង​នោះ​។

         បន្ទាប់​ពី​ការ​ប្រជុំនោះ លោក​អនុប្រធាន​ទូត​បាន​ធ្វើ​ដំណើរ​ទៅ​វត្ត​នគរ​បាជ័យ ដែល​ជា​វត្ត​សល់​ពី​សម័យ​មុន​អង្គរ ស្ថិតនៅ​ក្រៅ​ទី​រួម​ខេត្ត​កំពង់ចាម​។ ពួកគេ​បាន​ជួយ​សំអាត​ទីតាំង​វត្ត ដោយ​ប្រមូល​សំរាម​និង​ដប​ជ័រ បណ្តើរ បន្ត​ការ​ពិភាក្សា​បណើ្តរ​ស្តីពី​ការ​ថែ​រក្សា​បរិស្ថាន នៅ​ក្នុង​តំបន់​។