កម្មវិធីរួមគ្នារបស់សហរដ្ឋអាមេរិកនិងអង់គ្លេសដើម្បីលើកកំពស់សុខភាពរបស់ប្រជាជនកម្ពុជា
សណ្ឋាគារ InterContinental ភ្នំពេញ
ថ្ងៃទី ៦ ខែឧសភា ឆ្នាំ ២០០៨
 |
លោកស្រី Erin Soto នាយកទីភ្នាក់ងារ USAID កាត់
ខ្សែបូរសម្ពោធកម្មវិធី ភស្ដុតាងនៃភាពជាដៃគូ ដែលធ្វើ
សកម្មភាពដើម្បីសុខភាព នៅកម្ពុជា ។ រូបពង្រីក |
កម្មវិធីថ្មីមួយនៅប្រទេសកម្ពុជាដែលមានបំណងកាត់បន្ថយអត្រាឆ្លងមេរោគអេដស៍ថ្មីៗ កាត់បន្ថយអត្រាស្លាប់របស់កុមារ និងធ្វើឱ្យប្រសើរឡើងនូវសុខភាពបន្ដពូជ និង សុខភាពផ្លូវភេទ ត្រូវបានប្រកាសបើកកាលពីថ្ងៃទី៦ ខែឧសភា ក្រោមការខិតខំរួមគ្នារបស់ទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្ដរជាតិ (USAID) និងទីភ្នាក់ងារអភិវឌ្ឍន៍អន្ដរជាតិរបស់ចក្រភពអង់គ្លេស (DFID) ។ មូលដ្ឋាននៃភាពជាដៃគូពិសេសនេះត្រូវបានបង្កើតឡើងជាមួយ នឹងការចុះហត្ថលេខាលើអនុស្សារណៈយោគយល់គ្នាមួយរវាងទីភ្នាក់ងារទាំងពីរនេះ កាលពីខែមិថុនា ឆ្នាំ ២០០៧ ។
ដោយរួមគ្នាទៅទីភ្នាក់ងារអភិវឌ្ឍន៍ទាំងពីរនឹងចំណាយថវិការហូតដល់ ២៧ លានដុល្លារសហរដ្ឋអាមេរិកក្នុងពេល ៥ឆ្នាំ ខាងមុខ ដើម្បីធ្វើអោយប្រជាជនកម្ពុជាដែលក្រីក្រ និងងាយរងគ្រោះជាងគេទទួលបានផលិតផលពន្យារកំណើតក្រោមការជួយរបស់ម្ចាស់ជំនួយ។ កម្មវិធីនេះដែលគេច្រើនហៅថា ភស្ដុតាងនៃភាពជាដៃគូដែលធ្វើសកម្មភាពដើម្បីសុខភាព (Evidence to Action Partnership for Health) នឹងប្រើយុទ្ធសាស្ដ្រទីផ្សារសង្គម ដើម្បីផ្សព្វផ្សាយ និង ចែកចាយផលិតផលពន្យារកំណើតក្នុងតំលៃសមរម្យ ព្រមទាំងកែប្រែគំនិត អាកប្បកិរិយា និងឥរិយាបថ ដើម្បីពង្រីកការប្រើប្រាស់ និងការលក់ផលិតផលពន្យារកំណើតនេះអោយបានទូលំទូលាយ នៅទូទាំងប្រទេសកម្ពុជា ។ អង្គការសេវាអន្ដរជាតិបំរើប្រជាជន (PSI) ជាអ្នកអនុវត្ដកម្មវិធីនេះ ។
លោកស្រី អេរីន សូតូ នាយកបេសកកម្មនៃទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្ដរជាតិប្រចាំនៅកម្ពុជា បានមានប្រសាសន៍ថា "តាមរយៈភាពជាដៃគូរវាង USAID និង DFID ដែលឈរនៅលើមូលដ្ឋាននេះ កម្មវិធីនេះនឹងធ្វើឱ្យប្រាកដថា ប្រជាជនកម្ពុជាទាំងអស់ ទោះស្ថិតក្នុងស្ថានភាពសេដ្ឋកិច្ចសង្គមយ៉ាងណាក៏ដោយ ក៏នៅតែអាចទទួលបាននូវផលិតផល និងពត៌មានដែលពួកគេត្រូវការ ដើម្បីធ្វើការសំរេចចិត្ដបានត្រឹមត្រូវទាក់ទងនឹងសុខភាព និង សុខមាលភាពរបស់គេ" ។
កិច្ចខិតខំប្រឹងប្រែងនេះជួយបំពេញបន្ថែមដល់កម្មវិធីប្រើប្រាស់ស្រោមអនាម័យ ១០០% របស់រាជរដ្ឋាភិបាលកម្ពុជា ដែលបានជួយកាត់បន្ថយអត្រាអ្នកផ្ទុកមេរោគអេដស៍ និងអ្នកជំងឺអេដស៍នៅកម្ពុជា ដែលជាជោគជ័យដ៏កំរមួយក្នុងការប្រយុទ្ធប្រឆាំងជំងឺនេះនៅក្នុងពិភពលោក។
ការទទួលបានផលិតផលពន្យារកំណើតដែលមានតំលៃសមរម្យ និងមានគុណភាពខ្ពស់ថែមទាំងធ្វើអោយគូស្វាមី ភរិយាអាចធ្វើផែនការពន្យារកំណើតបានកាន់តែមានប្រសិទ្ធិភាព។
ការលើកកំពស់សុខភាពរបស់ប្រជាជនកម្ពុជាគឺជាអាទិភាពអភិវឌ្ឍន៍លើគេ សំរាប់សហរដ្ឋអាមេរិក ។ គ្រាន់តែក្នុងឆ្នាំនេះ USAID បានផ្ដល់ប្រាក់ចំនួន ៣៤ លានដុល្លាអាមេរិកសំរាប់បញ្ហាសុខភាពធំៗ នៅប្រទេសកម្ពុជា ដូចជាជំងឺអេដស៍ របេង សុខភាពបន្ដពូជ សុខភាពមាតា និងកូន ហើយនិងអាហារូបត្ថម្ភ ។
លោកស្រីភារធារី
ដំណឹងថ្មី
សុន្ទរកថា
សេចក្តីប្រកាសពត៌មាន
