Assisting Cambodia to Develop an Access to Information Policy Paper

ជួយកម្ពុជាក្នុងការតាក់តែងឯកសារគោលនយោបាយស្ដីពីលទ្ធភាពទទួលពត៌មាន (Assisting Cambodia to Develop an Access to
Information Policy Paper)

ភ្នំពេញ
ថ្ងៃទី ២១ ខែមិថុនា ឆ្នាំ ២០០៧

លោក Reed Aeschliman នាយកការិយាល័យ
អភិវឌ្ឍន៍រួម និងឯកឧត្ដម ឆេង សារឿន រដ្ឋលេ
ខាធិការ MoNASRI ចុះហត្ថលេខាលើអនុស្សា
រណៈយោគយល់គ្នា ដោយ មានវត្ដមានរបស់
លោកជំទាវ ម៉ែន សំអន MoNASRI និងលោក
ស្រី Joan Silver នាយកស្ដីទីនៃ USAID ។
រូបពង្រីក

ទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្ដរជាតិ (USAID) និងក្រសួងសំរាប់ទំនាក់ទំនងជាមួយរដ្ឋសភា ព្រឹទ្ធសភានិងអធិការកិច្ចកម្ពុជា (MoNASRI) ក្នុងពេលថ្មីៗនេះបានចុះហត្ថលេខាលើអនុស្សារណសកម្មភាពដោយបង្កើតក្រុមផ្ដល់ការប្រឹក្សា ដោយមានបណ្ឌិត សៅ សុវណ្ណា និងសាស្ដ្រាចារ្យ Rick Snell ដែលជាអ្នកឯកទេសល្បីឈ្មោះក្នុងពិភពលោកផ្នែកសេរីភាពពត៌មាន ដើម្បីជួយក្រុមធ្វើសេចក្ដីព្រាងរបស់ MoNASRI ក្នុងការតាក់តែងឯកសារគោលនយោបាយស្ដីពីលទ្ធភាពទទួលពត៌មានជាលើកដំបូងនៅកម្ពុជា ។ ឯកសារគោលនយោបាយនេះគឺជាមូលដ្ឋានគ្រឹះសំរាប់បង្កើតច្បាប់ដំបូងសំរាប់ប្រទេសកម្ពុជាស្ដីពីលទ្ធភាពទទួលពត៌មាន ។

ក្រុមផ្ដល់ការប្រឹក្សានេះនឹងជួយរាជរដ្ឋាភិបាលកម្ពុជាអោយបំពេញបានតាមសន្ទស្សន៍តាមដានរួម (Joint Monitoring Indicator= JMI) ក្នុងការតាក់តែង “ក្របខ័ណ្ឌគោលនយោបាយច្បាស់លាស់មួយស្ដីពីលទ្ធភាពទទួលពត៌មានតាមរយៈរចនាសម្ព័ន្ធនៃក្រុមពិគ្រោះយោបល់របស់ប្រទេសផ្ដល់ជំនួយនិងរដ្ឋាភិបាលកម្ពុជា។ លើសពីនេះទៀត ក្នុងពេលថ្មីៗនេះ រដ្ឋាភិបាលបានអនុម័តលើផែនការសកម្មភាពសំរាប់អនុវត្ដយុទ្ធសាស្ដ្រកែទំរង់ប្រព័ន្ធច្បាប់និងតុលាការសំរាប់ក្រុមប្រឹក្សារដ្ឋមន្ដ្រី ដែលក្នុងនោះការអនុម័តច្បាប់ស្ដីពីលទ្ធភាពទទួលពត៌មានត្រូវបានមើលឃើញថាជាអាទិភាពសំរាប់រយៈពេលចំពោះមុខ។ ទីភ្នាក់ងារUSAID រួមជាមួយនឹងដៃគូអភិវឌ្ឍន៍ដទៃទៀត រីករាយនឹងជួយរាជរដ្ឋាភិបាលកម្ពុជាអោយបំពេញបានតាមការប្ដេជ្ញាចិត្ដលើ JMI ដើម្បីតាក់តែងក្របខ័ណ្ឌស្ដីពីលទ្ធភាពទទួលពត៌មានដែលអាចនឹងនាំទៅដល់ការអនុម័តច្បាប់ស្ដីពីលទ្ធភាពទទួលពត៌មាន ។

រាជរដ្ឋាភិបាលកម្ពុជា ដៃគូអភិវឌ្ឍន៍ សង្គមស៊ីវិលនិងវិស័យឯកជនមើលឃើញនូវសេចក្ដីត្រូវការច្បាប់ស្ដីពីលទ្ធភាពទទួលពត៌មានស្ដីពីរដ្ឋាភិបាលដើម្បីជំរុញតម្លាភាព និងលទ្ធភាពទទួលពត៌មានពីរដ្ឋាភិបាល ដែលនាំអោយប្រជាជនមានការទុកចិត្ដលើរដ្ឋាភិបាលនិងស្ថាប័នសាធារណៈកាន់តែច្រើន ។ ក្នុងអំឡុងពេលធ្វើសេចក្ដីព្រៀងលើឯកសារគោលនយោបាយនេះ សាស្ដ្រាចារ្យ Snell នឹងធ្វើការជិតស្និទ្ធជាមួយអ្នកជំនាញមកពីក្រសួងទំនាក់ទំនងជាមួយសភានិងក្រសួងដទៃទៀតរបស់រាជរដ្ឋាភិបាលកម្ពុជា ដែលនឹងដឹកនាំក្នុងការសរសេរឯកសារគោលនយោបាយជាភាសាខ្មែរ ហើយផ្ដល់ការណែនាំជាបន្ដ ។ យើងស្វាគមន៍ការចូលរួមរបស់សង្គមស៊ីវិលតាមរយៈក្រុមការងារសេរីភាពផ្នែកពត៌មាន ក្នុងដំណើរការធ្វើសេចក្ដីព្រាងនេះ ។ USAID មានទស្សនៈដូចរាជរដ្ឋាភិបាលកម្ពុជាដែរថា ដោយទទួលមតិយោបល់របស់អ្នកពាក់ព័ន្ធសំខាន់ៗ ក្នុងដំណើរការធ្វើសេចក្ដីព្រាងឯកសារគោលនយោបាយ ឯកសាគោលនយោបាយស្ដីពីលទ្ធភាពទទួលពត៌មាន នឹងផ្ដល់គ្រឹះដ៏រឹងមាំមួយសំរាប់ឆ្លងយ៉ាងឆាប់រហ័សពីការធ្វើពង្រាងឯកសារគោលនយោបាយទៅការតាក់តែងច្បាប់ស្ដីពីលទ្ធភាពទទួលពត៌មាន ។

សាស្ដ្រាចារ្យ Snell នឹងនាំយកបទពិសោធន៍ក្នុងវិជ្ជាជីវៈរាប់ឆ្នាំមកប្រើក្នុងការងារនេះរបស់លោក ។ លោកជាសាស្ដ្រាចារ្យជាន់ខ្ពស់ផ្នែកច្បាប់សាធារណៈនៅសាលាច្បាប់នៃសាកលវិទ្យាល័យ Tasmania ហើយត្រូវបានចាត់ទុកថាជាអ្នកឯកទេសអន្ដរជាតិស្ដីពីសេរីភាពផ្នែកពត៌មាន ។ លោកបានផ្ដល់ការប្រឹក្សានិងបង្រៀនជាអន្ដរជាតិ ស្ដីពីបញ្ហាសេរីភាពផ្នែកពត៌មាន បានធ្វើជាមន្ដ្រីរបស់រដ្ឋាភិបាលផ្នែកសេរីភាពពត៌មាន បានផ្ដល់ការប្រឹក្សាដល់រដ្ឋាភិបាល ប្រព័ន្ធឃោសនា និងអង្គការមិនមែនរដ្ឋាភិបាល បានដាក់ស្នើនូវអនុសាសន៍ជាច្រើនស្ដីពីកំណែទំរង់ច្បាប់ស្ដីពីសេរីភាពពត៌មាន និងបានធ្វើជាចាងហ្វាងទិន្នានុប្បវត្ដិសេរីភាពពត៌មាន ។

ក្នុងអំឡុងពេល ៧ សប្ដាហ៍ដែលសាស្ដ្រាចារ្យ Snell ស្នាក់នៅកម្ពុជា លោកនឹងធ្វើការពិគ្រោះយោបល់ជាមួយអ្នកពាក់ព័ន្ធជាច្រើន ជាផ្នែកមួយនៃដំណើរការធ្វើសេចក្ដីព្រាងឯកសារគោលនយោបាយស្ដីពីលទ្ធភាពទទួលពត៌មាន ព្រមទាំងបើកសិក្ខាសាលា វគ្ធបណ្ដុះបណ្ដាលនិងការពិភាក្សាទល់មុខគ្នាស្ដីពីសេរីភាពពត៌មានជាមួយមន្ដ្រីរាជរដ្ឋាភិបាល តំណាងសង្គមស៊ីវិល ប្រព័ន្ធឃោសនា និងអ្នកពាក់ព័ន្ធដទៃទៀត ។

ការងារជួយក្រសួងទំនាក់ទំនងជាមួយសភានិងព្រឹទ្ធសភាជាតិក្នុងការធ្វើសេចក្ដីព្រាងឯកសារគោលនយោបាយស្ដីពីលទ្ធភាពទទួលពត៌មានកំពុងត្រូវបានធ្វើតាមរយៈកម្មវិធីបញ្ជ្រាបការប្រឆាំងអំពើពុករលួយដើម្បីសមធម៌ (Mainstreaming Anti-Corruption for Equity Program) ដែលត្រូវបានអនុវត្ដដោយអង្គការ Pact នៅកម្ពុជា ។ កម្មវិធីនេះធ្វើការជាមួយអ្នកពាក់ព័ន្ធជាច្រើន ដែលរួមមានរាជរដ្ឋាភិបាលកម្ពុជាក្រុមសង្គមស៊ីវិលម្ចាស់ជំនួយប្រព័ន្ធឃោសនា និងវិស័យឯកជន ដើម្បីបង្កើនល្បឿននិងពង្រីកសកម្មភាពកំណែទំរង់ប្រឆាំងអំពើពុករលួយនៅកម្ពុជា ។

គេហទំព័រនេះគ្រប់គ្រងដោយក្រសួងការបរទេសសហរដ្ឋអាមេរិក។អត្ថបទផ្សេងៗទៀតភ្ជាប់ទៅនឹងគេហទំព័រដទៃទៀតមិនគួរត្រូវ បកស្រាយថាជាការយល់ព្រមទៅនឹងទស្សនៈឬគោលនយោបាយស្ដីពីភាពជាឯកជននេះទេ។

	គេហទំព័រដើម \| ពត៌មាន \| សេវាកម្មសំរាប់ពលរដ្ឋអាមេរិក \| ទិដ្ឋាការ \| គោលនយោបាយ \| ប្រភពធនធាន សូមធ្វើការទំនាក់ទំនងមកយើង \| តារាងលំដាប់ការិយាល័យ \| ភាពជាឯកជន \| អ្នកគ្រប់គ្រងគេហទំព័រ