កម្មវិធីផ្សេងៗ ក្នុងឆ្នាំ២០១២
កម្ពុជា និងសហរដ្ឋអាមេរិកយល់ព្រមពិភាក្សាគ្នា លើសន្ធិសញ្ញាវិនិយោគទ្វេភាគី
ថ្ងៃទី៤ ខែកញ្ញា ឆ្នាំ២០១២
សេចក្តីប្រកាសរបស់លោកតំណាងពាណិជ្ជកម្មសហរដ្ឋអាមេរិកនិយាយថា “អ្នកឯកទេសរបស់សហរដ្ឋអាមេរិក និងអ្នកឯកទេសកម្ពុជានឹងពិភាក្សាគ្នាលើកិច្ចព្រមព្រៀងវិនិយោគ និងគោលនយោបាយវិនិយោគរបស់យើង ដើម្បីកំណត់ចំណុចដូចគ្នា និងចំណុចខុសគ្នាសំខាន់ៗ”
លោក Ron Kirk តំណាងពាណិជ្ជកម្មសហរដ្ឋអាមេរិកបានប្រកាសនៅថ្ងៃសុក្រថា សហរដ្ឋអាមេរិក និងប្រទេសកម្ពុជាបានព្រមព្រៀងគ្នាថា នឹងចាប់ផ្តើមការពិភាក្សាស្វែងយល់លើសន្ធិសញ្ញាវិនិយោគទ្វេភាគី។ សេចក្តីប្រកាសនេះមានឡើងបន្ទាប់ពីការជួបប្រជុំគ្នារវាងលោក Kirk និងលោក ចម ប្រសិទ្ធ រដ្ឋមន្រ្តីក្រសួងពាណិជ្ជកម្មកម្ពុជា ក្នុងកិច្ចប្រជុំប្រចាំឆ្នាំនៃរដ្ឋមន្រ្តីសេដ្ឋកិច្ចអាសាន។
សេចក្តីប្រកាសរបស់លោកតំណាងពាណិជ្ជកម្មសហរដ្ឋអាមេរិកនិយាយថា “អ្នកឯកទេសរបស់សហរដ្ឋអាមេរិក និងអ្នកឯកទេសកម្ពុជានឹងពិភាក្សាគ្នាលើកិច្ចព្រមព្រៀងវិនិយោគ និងគោលនយោបាយវិនិយោគរបស់យើង ដើម្បីកំណត់ចំណុចដូចគ្នា និងចំណុចខុសគ្នាសំខាន់ៗ”។ ការពិភាក្សានឹងធ្វើឡើង ដើម្បីចែករំលែកវិធីសាស្រ្ត និងបើកអោយមានការពិភាក្សាថែមទៀត ដោយឈរលើមូលដ្ឋាននៃខ្លឹមសារគំរូរបស់សហរដ្ឋអាមេរិកសំរាប់សន្ធិសញ្ញាវិនិយោគទ្វេភាគី”។
លោកតំណាងពាណិជ្ជកម្មបានថ្លែងថា សន្ធិសញ្ញាបែបនេះនឹង “លើកទឹកចិត្តអោយមានការវិនិយោគ ដោយកែលំអបរិយាកាសវិនិយោគ ជំរុញកំណែទំរង់សេដ្ឋកិច្ចផ្អែកលើទីផ្សា និងពង្រឹងនិតិរដ្ឋ។ ការសំរេចចិត្តរបស់យើងក្នុងការសិក្សាស្វែងយល់ពីលទ្ធភាពនេះបញ្ជាក់ពីដំណើរជឿនលឿនទៅមុខរបស់ប្រទេសកម្ពុជា ក្នុងការជំរុញបរិយាកាសនៃគោលនយោបាយដែលអនុវត្តទៅលើវិនិយោគឯកជន ក្នុងលក្ខណៈបើកចំហ ប្រកបដោយតំលាភាព និងគ្មានការរើសអើង”។
សេចក្តីប្រកាសថ្លែងថា សហរដ្ឋអាមេរិកមានសន្ធិសញ្ញាវិនិយោគទ្វេភាគីចំនួនជាង ៤០ ដែលមានសុពលភាព ជាមួយប្រទេសនានាជុំវិញពិភពលោក។
