សេចក្តីព្រមានពីការបោកប្រាសនិងការបន្លំទិដ្ឋាការ
ស្ថានទូតអាមេរិកបានដឹងថាមានក្រុមហ៊ុនឯកជនមួយចំនួនបានប្រកាសពីកម្មវិធីសិក្សានិងធ្វើការនៅសហរដ្ឋអាមេរិក ហើយសន្យាផ្តល់ទិដ្ឋាការដល់អតិថិជនដែលចូលរួមក្នុងកម្មវិធីទាំងនេះ ។ ក្រុមហ៊ុនទាំងនេះតំរូវអោយមានការបង់លុយដែលមានរាប់ពីរាប់រយទៅរាប់ពាន់ដុល្លា ហើយអាចមានការទាក់ទងជាមួយស្ថាប័នអប់រំនៅសហរដ្ឋអាមេរិក ។ កម្មវិធីសិក្សាមានរាប់ពីការសិក្សាថ្នាក់មធ្យមសិក្សា ឬសាកលវិទ្យាល័យដល់កម្មវិធីទេសចរណ៍ ភោជនីយដ្ឋាន បដិសណ្ឋារកិច្ចជាដើម ។ គេមានប្រកាសផងដែរថា គេមានឥទិ្ធពលជាមួយស្ថានទូតអាមេរិកហើយអាចធានាទិដ្ឋាការដល់អ្នក បើអ្នកបង់ប្រាក់ថ្លែសេវាអោយគេ ។ ចូរប្រយ័ត្ន! ស្ថានទូតសូមព្រមានអោយដឹងជាមុនថាស្ថានទូតអាមេរិកមិនធានាលើការផ្ដល់ទិដ្ឋាការមិនមែនអន្ដោប្រវេសន៍សំរាប់កម្មវិធីសិក្សាឬផ្លាស់ប្ដូរគ្នាផ្នែកអប់រំណាមួយទេ ។ ពលរដ្ឋកម្ពុជាដែលចង់ចូលរួមក្នុងកម្មវិធីណាមួយបែបនេះធ្វើត្រូវធ្វើការស្រាវជ្រាវ ដោយប្រុងប្រយ័ត្នលើអង្គការអាមេរិកដែលជាអ្នករៀបចំឧបត្ថម្ភ ដើម្បីបញ្ជាក់អោយច្បាស់ថាអង្គការនោះពិតជាមានភាពត្រឹមត្រូវមែន។ ថ្លៃសេវាទាំងអស់ត្រូវតែមានភាពសមស្រប មានតំលាភាពនិងអាចសងត្រឡប់វិញបាន ។ លើសពីនេះទៀត ទីភ្នាក់ងារទុច្ចរិតនៅភ្នំពេញបានគាបយកលុយពីអ្នកឈ្នះឆ្នោតផ្សងសំណាងទៅរស់នៅសហរដ្ឋអាមេរិក (DV) ។ ក្រុមហ៊ុនទាំងនេះបានជួយពលរដ្ឋកម្ពុជាក្នុងការដាក់ពាក្យលេងឆ្នោតDV នេះ ហើយបន្ទាប់មក ទារថ្លៃសេវាពីអ្នកឈ្នះយ៉ាងច្រើនសម្បើម ។ អ្នកឈ្នះឆ្នោតមិនត្រូវបង់លុយទេ ដើម្បីអាចទទួលបានលេខរបស់គេនោះ ។ គេមិនត្រូវបង់លុយអោយឈ្មួញកណ្តាលយ៉ាងច្រើននោះឡើយ ។ ស្ថានទូតអាចជួយអ្នកឈ្នះឆ្នោតក្នុងការទាក់ទងជាមួយមជ្ឈមណ្ឌលកុងស៊ុល Kentucky អោយបន្តធ្វើការលើករណីឆ្នោត DV របស់អ្នក ។
មនុស្សឬអង្គការទាំងឡាយណាដែលអះអាងថាអាចជួយសុំទិដ្ឋាការអាមេរិកអោយអ្នកបាន ក្នុងតំលៃយ៉ាងថ្លៃនោះ សុទ្ធតែកុហកទេ ។ មានតែមន្ដ្រីកុងស៊ុលរបស់ស្ថានទូតអាមេរិកទេទើបមានសិទ្ធិសំរេចលើពាក្យសុំទិដ្ឋាការ ។ អ្នកដាក់ពាក្យសុំ ក៏មិនត្រូវរៀបការក្លែងក្លាយឬប្រើឯកសារក្លែងក្លាយឡើយនៅពេលដាក់ពាក្យសុំទិដ្ឋាការដែរ ។ បើគេធ្វើដូច្នេះ គេនឹងត្រូវបានបដិសេធចោល ហើយមិនអាចទទួលទិដ្ឋាការចូលសហរដ្ឋអាមេរិកជារៀងរហូត ។
សូមទាក់ទងស្ថានទូតអាមេរិកតាមអ៊ីម៉េល visasphp@state.gov បើមានឈ្មួញកណ្ដាលណាមួយគាបទារប្រាក់ពីអ្នក ឬរាយការណ៍ពីអំពើទុច្ចរិត ការបន្លំ អំពើមិនគប្បីទាក់ទងនឹងទិដ្ឋាការ និងអំពើខុសច្បាប់ដទៃទៀតទាក់ទងនឹងទិដ្ឋាការអន្ដោប្រវេសន៍និងមិនមែនអន្ដោប្រវេសន៍ ។
ឯកអគ្គរដ្ឋទូត
ដំណឹងថ្មី
សុន្ទរកថា
សេចក្តីប្រកាសពត៌មាន
