បុគ្គលិកស្ថានទូតអាមេរិក នៅទីក្រុងភ្នំពេញជួយអង្គការលំនៅឋានសំរាប់មនុស្សជាតិ
ស្រុកឧត្តុង្គ
ថ្ងៃទី ២៥ ខែកក្កដា ឆ្នាំ ២០០៩
 |
ក្រុមបុគ្គលិកស្ថានទូតអាមេរិកចុះជួយ
សាងសង់ផ្ទះ។ រូបពង្រីក |
នៅថ្ងៃទី ២៥ ខែកក្កដា បុគ្គលិកស្ថានទូតអាមេរិកបានធ្វើដំណើរទៅកាន់ស្រុកឧត្តុង្គ ដើម្បីធ្វើការងារស្ម័គ្រចិត្តអោយគំរោងរបស់អង្គការលំនៅឋានសំរាប់មនុស្សជាតិ (Habitat for Humanity) នៅតាមសហគមន៍។ សហគមន៍ជីវិតថ្មីគឺជាប្រជាជនកម្ពុជាក្រីក្រមួយក្រុម ដែលនៅពេលនេះ កំពុងរស់នៅលើទីតាំងចាក់សំរាមស្ទឹងមានជ័យ ក្បែរក្រុងភ្នំពេញ ហើយដែលត្រូវបានគេអោយប្តូរទីលំនៅទៅស្រុងឧត្តុង្គ។ អង្គការលំនៅឋានសំរាប់មនុស្សជាតិ នៅពេលនេះ កំពុងតែកសាងផ្ទះថ្មីចំនួន ២១ សំរាប់អ្នកដែលត្រូវប្តូរទីលំនៅទាំងនេះ។
កម្មវិធីរបស់អង្គការលំនៅឋានសំរាប់មនុស្សជាតិមានបំណងកាត់បន្ថយភាពក្រីក្រ ដោយផ្តល់លទ្ធភាពដល់សហគមន៍ ក្នុងការទទួលបានសេវាជាមូលដ្ឋានក្នុងតំលៃសមរម្យ និងស្ថានភាពរស់នៅប្រសើរជាងមុន។ អង្គការនេះបានចុះបញ្ជីការការិយាល័យសាខារបស់ខ្លួនលើកដំបូងនៅកម្ពុជា នៅខែមករា ឆ្នាំ ២០០៤។ គំរោងដំបូងៗរបស់អង្គការគឺជួយគ្រួសារក្រីក្រនៅជុំវិញរដ្ឋធានី ដោយផ្តល់កម្ចីខ្នាតតូច ដើម្បីអោយគេអាចសន្សំសំរាប់កែលំអទីជំរក។ តាំងពីពេលនោះមក អង្គការបានជួយកសាង និងជួសជុលផ្ទះសរុបបានចំនួន ៤២៩ ហើយបានជួយដល់គ្រួសារចំនួន ២៤០ ដោយគិតតែនៅក្នុងឆ្នាំនេះតែប៉ុណ្ណោះ។
ក្រុមអ្នកស្ម័គ្រចិត្តចំនួន ១៣ នាក់ មកពីស្ថានទូតអាមេរិក រួមទាំងឯកអគ្គរដ្ឋទូត Carol A. Rodley ផង បានជួយកសាងទីតាំងផ្ទះចំនួន ២ ក្នុងចំណោមទីតាំងផ្ទះទាំង ២១។ ភាគច្រើននៃការងាររបស់ពួកគេនៅថ្ងៃនោះគឺរៀបអិដ្ឋនៅផ្នែកគ្រឹះ។ ដើម្បីកសាងផ្ទះទាំង ២១ អង្គការប៉ាន់ប្រមាណថា ត្រូវការអិដ្ឋជាង ៤ ម៉ឺន ៥ ពាន់អិដ្ឋទើបធ្វើហើយ។ ផ្ទះកសាងដោយអង្គការលំនៅឋានសំរាប់មនុស្សជាតិ នៅប្រទេសកម្ពុជា តាមធម្មតាមានទំហំ ៣១,៥ ម៉ែត្រការេ មានជញ្ចាំងថ្ម មានបន្ទប់អង្គុយលេង បន្ទប់ដេក ចង្ក្រានបាយ និងបង្គន់មួយ។
បើលោកអ្នកនៅប្រទេសកម្ពុជា ហើយចង់រួមចំណែកដល់អង្គការលំនៅឋានសំរាប់មនុស្សជាតិនៅកម្ពុជា សូមទាក់ទងការិយាល័យក្នុងស្រុករបស់យើង តាមអាស្រ័យដ្ឋានដូចខាងក្រោមនេះ៖
HFH Cambodia
PO Pox 2452
Phnom Penh 3
Cambodia
Phone:+855 23997840
Fax:+855 23997840
E-mail: info@hfhic.org
ឯកអគ្គរដ្ឋទូត
ដំណឹងថ្មី
សេចក្តីប្រកាសពត៌មាន
សុន្ទរកថា
